തിരുവനന്തപുരം: ദല്ഹിക്കെതിരായ രഞ്ജി ട്രോഫി ഗ്രൂപ്പ് ബി മത്സരത്തില് ഝാര്ഖണ്ഡിന് മികച്ച സ്കോര്. ഇഷാന് കിഷന്റെ ഇരട്ട ശതകത്തിന്റെ (273) മികവില് ആദ്യ ഇന്നിങ്സില് 493 റണ്സെടുത്തു ഝാര്ഖണ്ഡ്. മറുപടി തുടങ്ങിയ ദല്ഹി രണ്ടാം ദിവസം കളി നിര്ത്തുമ്പോള് മൂന്ന് വിക്കറ്റ് നഷ്ടത്തില് 225 റണ്സില്. തുമ്പ സെന്റ് സേവ്യേഴ്സ് കോളേജ് മൈതാനത്താണ് മത്സരം.
ആറിന് 359 എന്ന നിലയില് രണ്ടാം ദിനം ബാറ്റിങ് തുടര്ന്ന ഝാര്ഖണ്ഡ്, ഇഷാന്റെ ഒറ്റയാള് പോരാട്ടത്തിലാണ് മികച്ച സ്കോറിലെത്തിയത്. തലേന്നത്തെ സ്കോറിനോട് 101 റണ്സ് ചേര്ത്ത താരം പത്താമനായാണ് മടങ്ങിയത്. 336 പന്തില് 21 ഫോറും 14 സിക്സറുമടക്കം .273 റണ്സെടുത്തു ഇഷാന്. ദല്ഹിക്കായി സുബോധ് ഭട്ടി മൂന്നും, പര്വീന്ദര് അവാന, വരുണ് സൂദ്, മിലിന്ദ് കുമാര് എന്നിവര് രണ്ടു വീതവും വിക്കറ്റെടുത്തു.
അഞ്ചാമനായിറങ്ങിയ വിക്കറ്റ് കീപ്പര് ബാറ്റ്സ്മാന് ഋഷഭ് പന്തിന്റെ ആക്രമണോത്സുക ബാറ്റിങ്ങാണ് തിരിച്ചടിയില് ദല്ഹിക്ക് തുണയായത്. 84 പന്തില് ഏഴു ഫോറും എട്ടു സിക്സറും സഹിതം 107 റണ്സുമായി പുറത്താകാതെ നില്ക്കുന്നു ഋഷഭ്. നായകനും ഓപ്പണറുമായ ഉന്മുക്ത് ചന്ദ് (89) കൂട്ട്. 74 റണ്സിനിടെ മൂന്നു വിക്കറ്റ് നഷ്ടമായ ശേഷമാണ് ഋഷഭിന്റെയും ഉന്മുക്തിന്റെ യും സെഞ്ചുറി കൂട്ടുകെട്ട്. ഝാര്ഖണ്ഡിനായി ആഷിഷ് കുമാര്, വികാസ് സിങ്, ആനന്ദ് സിങ് എന്നിവര് വിക്കറ്റുകള് പങ്കിട്ടു.
