കേരളത്തിന് വിജയം

ഹൈദരബാദ്: സി.കെ. നായിഡു ട്രോഫി അണ്ടര്‍ 23 ക്രിക്കറ്റ് മത്സരത്തില്‍ ഹൈദരബാദിനെതിരെ കേരളത്തിന് 29 റണ്‍സിന്റെ വിജയം. രണ്ടാം ഇന്നിങ്ങ്‌സില്‍ വിജയിക്കാന്‍ 198 റണ്‍സ് വേണ്ടിയിരുന്ന ഹൈദരാബാദിനെ 168 റണ്‍സിന് എറിഞ്ഞിട്ടാണ് കേരളത്തിന്റെ ചുണക്കുട്ടികള്‍ വിജയം സ്വന്തമാക്കിയത്. 63 റണ്‍സിന് അഞ്ച് വിക്കറ്റ് വീഴ്‌ത്തിയ അക്ഷയ് കെ.സിയുടെ മികച്ച ബൗളിങ്ങാണ് കേരളത്തിന് വിജയം നേടിക്കൊടുത്തത്. ആദ്യ ഇന്നിങ്ങ്‌സിലും അഞ്ച് വിക്കറ്റ് പിഴുത അക്ഷയ് ഇതോടെ മത്സരത്തില്‍ 10 വിക്കറ്റ് സ്വന്തമാക്കി.

45 റണ്‍സിന് 4 വിക്കറ്റ് നേടിയ ഫാബിദ് അഹമ്മദ് അക്ഷയിന് മികച്ച പിന്തുണ നല്‍കി. ഹൈദരബാദിന്റെ 9 ബാറ്റ്‌സ്മാന്മാര്‍ രണ്ടക്കം കാണാതെ പുറത്തായ കളിയില്‍ 70 റണ്‍സെടുത്ത രവി തേജ ടോപ്‌സ്‌കോറര്‍.

കേരളത്തിന്റെ ഒന്നാം ഇന്നിങ്ങ്‌സ് സ്‌കോറായ 235 റണ്‍സിനെതിരെ ഹൈദരാബാദ് ആദ്യ ഇന്നിങ്ങ്‌സില്‍ 145ന് പുറത്തായി. കേരളത്തിന് 90 റണ്‍സ് ലീഡ്. എന്നാല്‍ രണ്ടാം ഇന്നിങ്ങ്‌സില്‍ കേരളത്തെ 107 റണ്‍സിന് പുറത്താക്കിയതോടെ ഹൈദരാബാദിന്റെ വിജയലക്ഷ്യം 198 റണ്‍സാവുകയായിരുന്നു. എന്നാല്‍ കൃത്യതയാര്‍ന്ന ബൗളിങ്ങിന് മുന്നില്‍ അവര്‍ക്ക് ലക്ഷ്യം ബാലികേറാമലയായി. ടൂര്‍ണമെന്റില്‍ കേരളത്തിന്റെ രണ്ടാം വിജയമാണിത്. നേരത്തെ മുംബൈ അണ്ടര്‍ 23 ടീമിനെയും കേരളം പരാജയപ്പെടുത്തിയിരുന്നു.

വിജയത്തോടെ 6 പോയിന്റുകള്‍ നേടിയ കേരളം മൂന്ന് മത്സരങ്ങളില്‍ നിന്ന് 13 പോയിന്റുകളുമായി എലൈറ്റ് ഗ്രൂപ്പ് സിയില്‍ ഒന്നാമതായി. ഈ മാസം ഏഴിനു തുടങ്ങുന്ന അടുത്ത മത്സരത്തില്‍ കേരളം മഹാരാഷ്ടട്രയെ നേരിടും.