പത്തനാപുരം: പിറവന്തൂര് പഞ്ചായത്ത് ആസ്ഥാനമായ അലിമുക്കില് നിര്മ്മിച്ച ശൗചാലയ ബ്ലോക്ക് തുറക്കാന് നടപടികളില്ലാത്തത് പ്രതിഷേധത്തിന് ഇടയാക്കുന്നു. പ്രധാന ജംഗ്ഷനായ അലിമുക്കില് എത്തിയാല് ജനങ്ങള്ക്ക് പ്രാഥമികാവശ്യങ്ങള് നിറവേറ്റാന് യാതാരു മാര്ഗവുമില്ലാതെ വലയുമ്പോഴാണ് ആറ് വര്ഷം മുമ്പ് നിര്മ്മിച്ച പൊതുകക്കൂസുകള് അടഞ്ഞുകിടക്കുന്നത്. ഇവിടെയെത്തുന്നവര്ക്ക് അടഞ്ഞ് കിടക്കുന്ന മൂത്രപ്പുരകള് കണ്ട് നെടുവീര്പ്പിടുകയേ മാര്ഗമുള്ളൂ.
ടോയ്ലറ്റുകള്ക്ക് മുന്വശത്തും വഴിയിലും ഇപ്പോള് സമീപത്തെ കെഎസ്ഇബി അധികൃതര് അവരുടെ ഫ്യൂസ് കാരിയറുകളും അനുബന്ധ ഉപകരണങ്ങളും കൊണ്ടിട്ടിരിക്കുകയാണ്. ഒപ്പം കാടും കയറുകയാണ്. പത്തനാപുരം പുനലൂര് പാതയിലെ പ്രധാന ജംഗ്ഷനുകളിലൊന്നാണ് അലിമുക്ക്. കേന്ദ്രഗവണ്മെന്റിന്റെ നിര്മല് പുരസ്കാരത്തിന് ലഭിച്ച അഞ്ച് ലക്ഷം രൂപ വിനിയോഗിച്ച് പിറവന്തൂര് പഞ്ചായത്ത് മുന്ഭരണസമിതിയാണ് ആറുവര്ഷം മുമ്പ് ജംഗ്ഷനില് ഈ ബ്ലോക്ക് നിര്മ്മിച്ചത്. ടോയലറ്റ് അടഞ്ഞുതന്നെ കിടക്കുന്നത് മൂലം ജംഗ്ഷനില് എത്തുന്നവര് പ്രാഥമികാവശ്യങ്ങള് നിറവേറ്റാനാകാതെ ബുദ്ധിമുട്ടുകയാണ്. ഉപയോഗശൂന്യമായി കിടന്ന് കാട് കയറി ഇപ്പോള് ഇഴജന്തുക്കളുടെ താവളമായി മാറിയിട്ടും അധികൃതര് തുറക്കാന് നടപടിയെടുക്കാത്തതാണ് പ്രതിഷേധത്തിന് ഇടയാക്കുന്നത്.
അച്ചന്കോവില്, കറവൂര്, പടയണിപ്പാറ ആനകുളം, വന്മള, ചീവോട് നല്ലംകുളം, പുന്നല എന്നിവിടങ്ങളില് നിന്നുമുള്ള റോഡുകള് വന്നുചേരുന്ന പ്രധാന ജംഗ്ഷനാണ് അലിമുക്ക്. അതിനാല് ഈ മേഖലയിലുള്ളവര് പത്തനാപുരം, പുനലൂര്, കൊല്ലം, തിരുവനന്തപുരം തുടങ്ങിയ വിവിധ സ്ഥലങ്ങളിലേക്ക് പോകാനായി ഇവിടെയാണെത്തുന്നത്. ഇവര് പ്രാഥമിക ആവശ്യങ്ങള് നിര്വഹിക്കാനാകാതെ ബുദ്ധിമുട്ടുന്ന അവസ്ഥയാണുള്ളത്. അടിയന്തിരമായി പരിസരത്തെ കാടുകള് നീക്കം ചെയ്ത് ഈ ടോയലറ്റ് ബ്ലോക്ക് പ്രവര്ത്തനസജ്ജമാക്കുന്നതിന് പഞ്ചായത്ത് ‘രണസമിതി നടപടികളെടുത്തില്ലങ്കില് ശക്തമായ സമരപരിപാടികള്ക്ക് ഒരുങ്ങാനാണ് നാട്ടുകാരുടെ തീരുമാനം.
