കോഴിക്കോട്: കോട്ടയ്ക്കല് ആര്യവൈദ്യശാലയുടെ കോഴിക്കോട് ശാഖയുടെ ശതവത്സരാഘോഷങ്ങളുടെ ഭാഗമായുള്ള സായാഹ്നസദസ്സുകള്‍ക്ക് തുടക്കമായി. ആഘോഷങ്ങള്‍ക്ക് തുടക്കംക്കുറിച്ച് ഇന്നലെ വൈകീട്ട് കല്ലായ്‌റോഡ് ബ്രാഞ്ച് ഓഡിറ്റോറിയത്തില്‍ വൈദ്യസംഗമം നടന്നു.
സംഗമത്തില്‍ കണ്ണൂര്‍ ഗവ.ആയുര്‍വേദ കോളേജിലെ പ്രൊഫസര്‍ ഡോ.കെ. മുരളി അഷ്ടാംഗഹൃദയം ഒരു പുനര്‍വായന എന്ന വിഷയം അവതരിപ്പിച്ച് സംസാരിച്ചു. ഡോ.പി.എം. വാരിയര്‍ അധ്യക്ഷത വഹിച്ചു. ഡോ. കെ.എം. മധു, ഡോ. റീന രമേഷ് വാരിയര്‍ എന്നിവര്‍ സംസാരിച്ചു.
രാവിലെ ജീവനക്കാരുടെയും മുന്‍കാല ജീവനക്കാരുടെയും കുടുംബാംഗങ്ങളുടെയും അംഗീകൃത ഡീലര്‍മാരുടെയും കുടുംബസദസ്സ് നടന്നു.
കുടുംബസംഗമം മാനേജിംഗ് ട്രസ്റ്റി വി. രാഘവവാരിയര്‍ ഉദ്ഘാടനം ചെയ്തു. ഡോ.പി.എം.വാരിയര്‍, ഡോ. കെ.മുരളീധരന്‍, ഡോ.എസ്.ജി.രമേഷ്, ഡോ.പി.വി.രവീന്ദ്രന്‍, ഡോ.പി.എ.ഭാസ്‌കരന്‍, ഡോ.എ.അച്യുതന്‍, പ്രൊഫ. കെ.സി.സി.രാജ, രാമകൃഷ്ണന്‍ ഏറാടി, ഡോ.കെ. വി. സുരേഷ് തുടങ്ങിയവര്‍ സംസാരിച്ചു. തുടര്‍ന്ന് വിനോദ് കോവൂരും സംഘവും അവതരിപ്പിച്ച ഹാസ്യ പരിപാടിയും അരങ്ങേറി.ദേശീയ ആയുര്‍വ്വേദ ദിനമായ 28ന് രാവിലെ 10 മണി മുതല്‍ കെ.പി. കേശവമേനോന്‍ ഹാളില്‍ വെച്ച് പ്രമേഹ ത്തെക്കുറിച്ച് പൊതുചര്‍ച്ച നടത്തും. ജില്ലാകലക്ടര്‍ എന്‍. പ്രശാന്ത് ഉദ്ഘാടനം ചെയ്യും. ഡോ.കെ. മാധവന്‍കുട്ടി അദ്ധ്യക്ഷത വഹിക്കും. 30ന് രാവിലെ 9.30ന് ബ്രാഞ്ച് ഓഡിറ്റോറിയത്തില്‍ ഡീലേഴ്‌സ് മീറ്റും വൈകീട്ട് അക്ഷരശ്ലോകസദസ്സും പ്രഭാഷണവും നടക്കും. നവംബര്‍ അഞ്ചിന് വൈകീട്ട് അഞ്ചിന് കോഴിക്കോട് ഓര്‍മകള്‍ അനുഭവങ്ങള്‍ എന്ന പരിപാടിയില്‍ സാമൂഹികസാംസ്‌കാരിക രംഗത്തെ പ്രമുഖര്‍ സംസാരിക്കും. നവംബര്‍ ആറിന് വൈകീട്ട് ആറു മണിക്ക് തളി പത്മശ്രീ ഓഡിറ്റോറിയത്തില്‍ കോട്ടയ്ക്കല് പി.എസ്.വി. നാട്യസംഘത്തിന്റെ കഥകളിപ്പദക്കച്ചേരി നടക്കും. 12 ന് കവിസദസ്സ് നടക്കും. 13ന് ക്വിസ് മത്സരം, സുനിത നെടുങ്ങാടിയും സംഘവും അവതരിപ്പിക്കുന്ന ഗസല്‍ സന്ധ്യ എന്നിവയും നടക്കും. നവംബര്‍ 18,19,20 തിയ്യതികളില്‍ കോഴിക്കോട് ടാഗോര്‍ സെന്റിനറിഹാളിലാണ് ശതശതവത്സരാഘോഷ പരിപാടികള്‍ നടക്കുക.
