കോഴിക്കോട്: നാല്പത്തിയഞ്ചാമത് സംസ്ഥാന പൊലീസ് കായികമേളക്ക് മീറ്റ് റെക്കാര്ഡോടെ കോഴിക്കോട്ട് തുടക്കം. മെഡിക്കല് കോളേജ് ഒളിമ്പ്യന് റഹ്മാന് സ്റ്റേഡിയത്തില് ആദ്യദിവസത്തെ മത്സരങ്ങള് പൂര്ത്തിയായപ്പോള് ഒരു മീറ്റ് റെക്കോര്ഡ് പിറന്നു. വനിതകളുടെ 200 മീറ്റര് ഓട്ടത്തില് പാലക്കാട്, കെഎപി-1 ബറ്റാലിയനിലെ എസ്. സിനിയാണ് സ്വന്തം റെക്കാര്ഡ് തിരുത്തിയത്. 2014ല് സിനിയുടെ പേരിലുള്ള 25.3 സെക്കന്ഡിന്റെ റിക്കാര്ഡാണ് 25.2സെക്കന്ഡില് മറികടന്നത്. ആദ്യദിനം പതിനെട്ട് ഇനങ്ങള് പൂര്ത്തിയായപ്പോള് 38 പോയിന്റോടെ എസ്എപിയും 14 പോയിന്റോടെ വയനാടും മുന്നേറുന്നു.
800മീറ്റര് ഫൈനലില് കെഎപി ഒന്നാംബറ്റാലിയനിലെ ചിഞ്ചുജോസ് സ്വര്ണ്ണം നേടി. 5000 മീറ്ററില് എസ്എപിയുടെ രാകേഷും ഷോട്ടുപുട്ടില് വയനാടിന്റെ രാംസണും ലോംഗ്ജമ്പില് എസ്എപിയുടെ ബേസില് ജോര്ജ്ജും കെഎപിയുടെ മറീന ജോസഫും ഹൈജമ്പില് കെഎപിയുടെ ലിബിന്രാജും ജാവലിന്ത്രോ(ആണ്)യില് എസ്എപിയുടെ കിഷോര്കോമളനും ജാവലിന്ത്രോ(പെണ്)യില് കോഴിക്കോടിന്റെ റസീനയും 400 മീറ്റര്ഹര്ഡില്സില് വയനാടിന്റെ ജോസഫ് പ്രവീണും 800മീറ്ററില് പാലക്കാടിന്റെ ഇളങ്കോവനും സ്വര്ണ്ണം നേടി.
കേരളത്തിലെ ഏറ്റവും വലിയ വകുപ്പ്തല മേളയായ പൊലിസ് മീറ്റില് അന്തര്ദേശീയ തലത്തിലും ദേശീയതലത്തിലും മികവ് തെളിയിച്ചവരുള്പ്പടെ ആയിരത്തിലധികം കായിക താരങ്ങളാണ് മാറ്റുരക്കുന്നത്. മാര്ച്ച് പാസ്റ്റോടയാണ് ഉദ്ഘാടന ചടങ്ങുകള് ആരംഭിച്ചത്. എസ്. സിനി, രാഹുല് ജി. പിള്ള എന്നിവര് ചേര്ന്ന് ദീപശിഖ തെളിയിച്ചു. ഒളിമ്പ്യന് പി.ടി. ഉഷ മേളയുടെ ഉദ്ഘാടനം നിര്വ്വഹിച്ചു. കോഴിക്കോട് ടീം ക്യാപ്റ്റന് റോയ് താരങ്ങള്ക്ക് പ്രതിജ്ഞ ചൊല്ലിക്കൊടുത്തു. എഡിജിപി സുധേഷ്കുമാര്, കണ്ണൂര് റെയ്ഞ്ച് ഐജി ദിനേന്ദ്രകശ്യപ്, കോഴിക്കോട് സിറ്റി പൊലിസ് കമ്മീഷണര് ഉമാബെഹ്റ തുടങ്ങിയവര് പങ്കെടുത്തു.
