ബാഴ്സലോണ: യുവേഫ ചാമ്പ്യന്സ് ലീഗ് ഫുട്ബോളില് വമ്പന്മാര്ക്ക് സൂപ്പര് ജയം. ബാഴ്സലോണ, ബയേണ് മ്യൂണിക്ക്, അത്ലറ്റികോ മാഡ്രിഡ്, ആഴ്സണല്, പിഎസ്ജി, ബെനഫിക്ക തുടങ്ങിയ ടീമുകളെല്ലാം വിജയം നേടി. അതേസമയം മാഞ്ചസ്റ്റര് സിറ്റി തോറ്റു.
മെസ്സി ഹാട്രിക്കില് സിറ്റി തവിടുപൊടി
നൗ കാമ്പില് നടന്ന ഗ്രൂപ്പ് സിയിലെ ഗ്ലാമര് പോരാട്ടത്തില് മറുപടിയില്ലാത്ത നാല് ഗോളുകള്ക്ക് ബാഴ്സലോണ മാഞ്ചസ്റ്റര് സിറ്റിയെ തകര്ത്തു. സൂപ്പര്താരം ലയണല് മെസ്സിയുടെ ഹാട്രിക്കാണ് കളിയിലെ സവിശേഷത. നെയ്മറും ഗോള് േനടി. ചാമ്പ്യന്സ് ലീഗിന്റെ ചരിത്രത്തില് മാഞ്ചസ്റ്റര് സിറ്റിയുടെ ഏറ്റവും ദയനീയ പരാജയമാണിത്.
പന്തടക്കത്തിലും ഷോട്ടുകള് പായിക്കുന്നതിലും ഏറെ മുന്നിട്ടുനിന്ന ബാഴ്സലോണ 17-ാം മിനിറ്റില് ആദ്യ ഗോള് നേടി. ഇനിയേസ്റ്റയുടെ ഷോട്ട് സിറ്റി പ്രതിരോധനിരക്കാരന് തടുത്തിട്ടത് ലഭിച്ച് മെസ്സിക്ക്. മെസ്സിയുടെ ഇടംകാലന് ഷോട്ട് അനായാസം വലയില്. ഈ ഒരു ഗോള് മാത്രമാണ് ആദ്യപകുതിയില് പിറന്നത്. തുടര്ന്നും നിരവധി അവസരങ്ങള് ലഭിച്ചെങ്കിലും അതൊന്നും മുതലാക്കാന് ഇരുടീമുകള്ക്കും കഴിയാതിരുന്നതോടെ ആദ്യപകുതി 1-0ന് ബാഴ്സക്ക് സ്വന്തം.
കളിയുടെ 53-ാം മിനിറ്റില് സിറ്റിയുടെ ഒന്നാം നമ്പര് ഗോളി ക്ലോഡിയോ ബ്രാവോ ചുവപ്പുകാര്ഡ് കണ്ട് പുറത്തുപോയി. ഇതോടെ പത്തുപേരായി അവര് ചുരുങ്ങി. പിന്നീട് ഒരു ഗോള്വീണത് 61-ാം മിനിറ്റില്. ഇനിയേസ്റ്റയുടെ പാസില് നിന്ന് നിറയൊഴിച്ചത് മെസ്സി തന്നെ. എട്ട് മിനിറ്റിനുശേഷം മെസ്സി ഹാട്രിക്ക് തികച്ചു. ഇത്തവണ ലൂയി സുവാരസ് ഒരുക്കിയ അവസരത്തില് നിന്നായിരുന്നു മെസ്സിയുടെ ഗോള്. പിന്നീട് കളിയുടെ 87-ാം മിനിറ്റില് ലഭിച്ച പെനാല്റ്റി സൂപ്പര് താരം നെയ്മര് നഷ്ടപ്പെടുത്തിയെങ്കിലും രണ്ട് മിനിറ്റിനുശേഷം മെസ്സിയുടെ പാസില് നിന്ന് ഗോള് നേടി നെയ്മര് അതിന് പരിഹാരം ചെയ്യുകയും ചെയ്തു. ഗ്രൂപ്പിലെ മറ്റൊരു മത്സരത്തില്
മോച്ചന്ഷെന്ഗ്ലാഡ്ബാക്ക് മറുപടിയില്ലാത്ത രണ്ട് ഗോളുകള്ക്ക് സെല്റ്റിക്കിനെ തകര്ത്തു. ഗോള്രഹിതമായ ആദ്യപകുതിക്കുശേഷം 57-ാം മിനിറ്റില് ലാര്സ് സ്റ്റിന്ഡ്ലും 77-ാം മിനിറ്റില് ആന്ദ്രെ ഹഹനും ലക്ഷ്യം കണ്ടു. ഇതിനിടെ 73-ാം മിനിറ്റില് ബാഴ്സയുടെ ജെര്മി മാത്തേയുവും ചുവപ്പുകാര്ഡ് കണ്ട് പുറത്തുപോയതോടെ അവരും പത്തുപേരായി ചുരുങ്ങി. കളിച്ച മൂന്ന് മത്സരങ്ങളും ജയിച്ച ബാഴ്സലോണ ഒമ്പത് പോയിന്റുമായി ഒന്നാമത്. നാല് പോയിന്റുള്ള സിറ്റി രണ്ടാമതും മോച്ചന്ഷെന്ഗ്ലാഡ്ബാക്ക് മൂന്ന് പോയിന്റുമായി മൂന്നാമതും.
ബയേണ് ജയം 4-1ന്
ഗ്രൂപ്പ് ഡിയില് ജര്മ്മന് ചാമ്പ്യന്മാരായ ബയേണ് മ്യൂണിക്ക് ഡച്ച് ക്ലബ് പിഎസ്വി ഐന്തോവന് വെല്ലുവിളി മറികടന്നത് ഒന്നിനെതിരെ നാല് ഗോളുകള്ക്ക്. 13-ാം മിനിറ്റില് തോമസ് മുള്ളര്, 21-ാം മിനിറ്റില് കിമ്മിച്ച്, 59-ാം മിനിറ്റില് സൂപ്പര്താരം റോബര്ട്ടോ ലെവന്ഡോവ്സ്കി, 84-ാം മിനിറ്റില് ആര്യന് റോബന് എന്നിവര് ബയേണിനായി ലക്ഷ്യം കണ്ടു. ഐന്തോവന്റെ ആശ്വാസഗോള് 41-ാം മിനിറ്റില് നേടിയത് ഇന്ത്യന് വംശജനായ ലൂസിയാനോ നര്സിങ്. ബയേണിന്റെ രണ്ടാം വിജയമാണിത്.
മറ്റൊരു മത്സരത്തില് അത്ലറ്റികോ മാഡ്രിഡിന് തുടര്ച്ചയായ മൂന്നാം ജയം. കളിയിലുടനീളം ലഭിച്ച നിരവധി അവസരങ്ങള് തുലച്ചുകളഞ്ഞ മത്സരത്തിന്റെ 62-ാം മിനിറ്റില് കരാസ്കോയാണ് അത്ലറ്റികോയുടെ വിജയഗോള് നേടിയത്. മൂന്ന് കളികളും വിജയിച്ച് 9 പോയിന്റുമായി അത്ലറ്റികോ ഒന്നാമതും 6 പോയിന്റുമായി ബയേണ് മ്യൂണിക്ക് രണ്ടാമതും നില്ക്കുന്നു.
നാപ്പോളി വീണു
ഗ്രൂപ്പ് ബിയില് സീരിഎ കരുത്തരായ നാപ്പോളിക്ക് അടിതെറ്റി. തുടര്ച്ചയായ മൂന്നാം ജയം ലക്ഷ്യമിട്ടിറങ്ങിയ നാപ്പോളിയെ എവേ മത്സരത്തില് ബസിക്റ്റാസാണ് രണ്ടിനെതിരെ മൂന്ന് ഗോളുകള്ക്ക് അട്ടിമറിച്ചത്. വിന്സന്റ അബൗബക്കറുടെ ഇരട്ട ഗോളാണ് ബെസിക്റ്റാസിന് വിജയം സമ്മാനിച്ചത്. 12-ാം മിനിറ്റില അഡ്രിയാനോ ആദ്യഗോള് നേടി.
38, 86 മിനിറ്റുകളിലായിരുന്നു വിന്സന്റിന്റെ ഗോളുകള്. നാപ്പോളിക്കായി 30-ാം മിനിറ്റില് മെര്ട്ടന്സും 69-ാം മിനിറ്റില് പെനാല്റ്റിയിലൂടെ ഗാബിയാഡിനിയും ലക്ഷ്യം കണ്ടു. മറ്റൊരു മത്സരത്തില് ബെനഫിക്ക 2-0ന് ഡൈനാമോ കീവിനെ പരാജയപ്പെടുത്തി. സാല്വിയോയും സെര്വിയും വിജയികളുടെ ഗോള് നേടി. തോറ്റെങ്കിലും 6 പോയിന്റുമായി നാപ്പോളി ഗ്രൂപ്പില് ഒന്നാമത്. 5 പോയിന്റുള്ള ബസിക്റ്റാസ് നാല് പോയിന്റുമായി ബെനഫിക്ക രണ്ടും മൂന്നും സ്ഥാനങ്ങളില്.
ഓസില് ഷോയില് ഗണ്ണേഴ്സ്
ഗ്രൂപ്പ് എയില് മെസ്യൂട്ട് ഓസിലിന്റെ ഹാട്രിക്ക് കരുത്തിലാണ് ആഴ്സണല് മിന്നുന്ന വിജയം നേടിയത്. ലുഡോ റസ്ഗാഡിനെ മറുപടിയില്ലാത്ത ആറ് ഗോളുകള്ക്ക് അവര് തകര്ത്തു. 56, 83, 87 മിനിറ്റുകളില് ഗോള് നേടി ഓസില് ലക്ഷ്യം തികച്ചു. എതിരാളികളെ കളിയുടെ സമസ്തമേഖലകളിലും ഏറെ പിന്തള്ളി ആധിപത്യം സ്ഥാപിച്ച ആഴ്സണലിന് വേണ്ടി 12-ാം മിനിറ്റില് അലക്സി സാഞ്ചസ് സ്കോറിങ് തുടങ്ങി. 42-ാം മിനിറ്റില് തിയോ വാല്ക്കോട്ടും 46-ാം മിനിറ്റില് ഓക്സലാഡ് ചേംബര്ലെയ്നും ഗണ്ണേഴ്സിനായി വലകുലുക്കി.
മറ്റൊരു മത്സരത്തില് ഫ്രഞ്ച് ചാമ്പ്യന്മാരായ പിഎസ്ജി മറുപടിയില്ലാത്ത മൂന്ന് ഗോളുകള്ക്ക് ബാസലിനെ തകര്ത്തു. 40-ാം മിനിറ്റില് ഏയ്ഞ്ചല് ഡി മരിയ, 62-ാം മിനിറ്റില് ലൂക്കാസ് മൗറ, പരിക്കുസമയത്ത് പെനാല്റ്റിയിലൂടെ എഡിസണ് കവാനി എന്നിവര് പിഎസ്ജിക്കായി ഗോള് നേടി. മൂന്ന് കളികളില് നിന്ന് 7 പോയിന്റുമായി ആഴ്സണലും പിഎസ്ജിയും ഒന്നും രണ്ടും സ്ഥാനങ്ങളില്.
