ഇടുക്കി: കട്ടപ്പന ഗവണ്മെന്റ് കോളേജില് എസ്എഫ്ഐക്കാരുടെ ദുര്നടപ്പ് ചോദ്യം ചെയ്ത അധ്യാപകനെ അടിച്ച് വീഴ്ത്തിയ എസ്എഫ്ഐക്കാരെ ഇതുവരെ പോലീസിന് പിടികൂടാന് കഴിഞ്ഞില്ല. 2010ലായിരുന്നു കൊമേഴ്സ് അധ്യാപകനായ പ്രൊഫ. സിജുവിനെ ഒരു സംഘം എസ്എഫ്ഐക്കാര് ആണി തറച്ച പട്ടികകൊണ്ട് അടിച്ച് വീഴ്ത്തിയത്. ഹാജരില്ലാതെ പരീക്ഷയെഴുതിപ്പിക്കണമെന്ന എസ്എഫ്ഐക്കാരുടെ ആവശ്യം നിരാകരിച്ചതിലുള്ള പ്രതികാരമാണ് അധ്യാപകന് വിനയായത്.
സ്റ്റാഫ് സെക്രട്ടറിയുടെ ചുമതലയുണ്ടായിി
രുന്ന അധ്യാപകന് കോളേജിലെ മെയിന്റനന്സ് ജോലികള്ക്കായി അന്നേ ദിവസം കോളേജില് എത്തിയിരുന്നു. നേരം ഇരുട്ടിയിട്ടും നിര്മ്മാണ ജോലികള് തുടര്ന്നതിനാല് അധ്യാപകന് കോളേജിന് സമീപം താമസിക്കുന്ന വീട്ടിലേക്ക് പോകാനിറങ്ങി. ഈ സമയത്തായിരുന്നു എസ്എഫ്ഐക്കാരുടെ ആക്രമണമുണ്ടായത്. ആണി തറച്ചുള്ള പട്ടികകൊണ്ട് അടിയേറ്റ അധ്യാപകന് ഗുരുതരമായി പരിക്കേറ്റു. പ്രാണരക്ഷയ്ക്കായി തൊട്ടടുത്തുള്ള പ്രിന്സിപ്പലിന്റെ വീട്ടിലേക്ക് ഓടിക്കയറുകയായിരുന്നു. പ്രിന്സിപ്പല് കട്ടപ്പന പോലീസില് വിവരം അറിയിച്ചിട്ടും പോലീസ് എത്തിയില്ല. പിന്നീട് ജില്ലാകളക്ടര് ഇടപെട്ടപ്പോഴാണ് പോലീസ് സംഘം സംഭവസ്ഥലത്തെത്തിയത്. അധ്യാപകന്റെ മൊഴിയെത്തുടര്ന്ന് പോലീസ് കേസെടുത്തെങ്കിലും പ്രതികളെ കണ്ടെത്താന് കഴിഞ്ഞില്ല എന്നാണ് പോലീസ് പറഞ്ഞത്. പോലീസുകാര് അറിഞ്ഞുകൊണ്ട് സിപിഎം-എസ്എഫ്ഐ സംഘം ആസൂത്രണം ചെയ്ത അക്രമമാണ് അധ്യാപകനെതിരെ നടന്നതെന്ന് പോലീസ് നിലപാടില് നിന്ന് വ്യക്തം.
