കൊച്ചി: സോളാര് ഇടപാടിലെ പരാതിയെക്കുറിച്ചന്വേഷിക്കാനായി ഹാജരാകേണ്ടതില്ലെന്ന് അഡ്വക്കറ്റ് ജനറല് പറഞ്ഞതായി സരിത എസ്. നായര് മറുപടി നല്കിയതായി ഡിവൈഎസ്പി എ.സി. ജോസഫിന്റെ മൊഴി. സോളാര് ആരോപണങ്ങളെക്കുറിച്ചന്വേഷിക്കുന്ന ജസ്റ്റിസ് ജി ശിവരാജന് കമ്മീഷനില് മൊഴി നല്കുകയായിരുന്നു അദ്ദേഹം. പെരുമ്പാവൂര് മുടിക്കല് സ്വദേശി സജാദ് അന്നത്തെ എസ്പി സതീഷ് ബിനോവിന് നല്കിയ പരാതിയനുസരിച്ച് എസ്പിയാണ് അന്ന് നാര്ക്കോട്ടിക് സെല് ഡിവൈഎസ്പിയായിരുന്ന തനിക്ക് അന്വേഷണച്ചുമതല നല്കിയതെന്നും ജോസഫ് വ്യക്തമാക്കി.
ബിജു രാധാകൃഷ്ണനെ അന്വേഷണത്തിന്റെ ഭാഗമായി ഫോണില് വിളിച്ചുവെങ്കിലും കിട്ടിയില്ല. മൂന്നു തവണ ലക്ഷ്മി നായര് എന്ന സരിത എസ് നായരെ ഫോണില് വിളിച്ചു. അന്വേഷണത്തിന്റെ ഭാഗമായി ഹാജരാകാനാകില്ലെന്ന് അവര് അറിയിച്ചു. രണ്ടാം തവണ വിളിച്ചപ്പോള് അഡ്വക്കേറ്റ് ജനറല് ഹാജരാകേണ്ടതില്ലെന്ന് പറഞ്ഞതായി അവര് പറഞ്ഞു. മൂന്നാംതവണ വിളിച്ചപ്പോള് വരാനാകില്ലെന്നും വേണമെങ്കില് മുഖ്യമന്ത്രിയുടെ ഓഫീസില്നിന്ന് വിളിച്ചു പറയിക്കാമെന്നും പറഞ്ഞു. ഇക്കാര്യങ്ങളൊന്നും തന്നെ അന്വേഷണച്ചുമതയേല്പിച്ച എസ്പിയെ ധരിപ്പിച്ചില്ലെന്നും മൊഴിയില് പറയുന്നു. മുന്മന്ത്രി ആര്യാടന് മുഹമ്മദിന്റെ സ്പെഷ്യല് പ്രൈവറ്റ് സെക്രട്ടറി നാരായണന് പിള്ളയെയും ഇന്നലെ വിസ്തരിച്ചു.
