കോട്ടയം: ബിജെപി ജില്ലാ ഓഫീസിന് നേരെ സിപിഎം അക്രമണം നടത്തിയത് പോലീസിന്റെയും സിപിഎമ്മിന്റെയും ഗൂഡാലോചനയുടെ ഭാഗമാണെന്ന് ജില്ലാപ്രസിഡന്റ് എന്. ഹരി പറഞ്ഞു. ആക്രമണം നടത്തിയത് പ്രതികളെ ബിജെപി പ്രവര്ത്തകര് കയ്യോടെ പിടികൂടി പോലിസിനെ ഏല്പ്പിച്ചെങ്കിലും വിട്ടയയ്ക്കുകയായിരുന്നു. പോലീസും സിപിഎമ്മിന്റെയും ഒത്തുകളി വെളിച്ചത്ത് വന്നിരിക്കുന്നു. പാലായില് സമാധാനപരമായി പ്രകടനം നടത്തിയവരെ ഒരു പ്രകോപനവുമില്ലാതെ പോലീസ് ലാത്തിച്ചാര്ജ്ജ് നടത്തി വളഞ്ഞുവച്ച് മര്ദ്ദിച്ചു.
പോലീസും സിപിഎമ്മും തമ്മിലുള്ള ഒത്തുകളി അവസാനിപ്പിക്കണം. പോഷകസംഘടനാ നേതാക്കളെപ്പോലെ പോലീസ് ഉദ്യോഗസ്ഥര് പെരുമാറുന്നു. സിപിഎമ്മിന്റെ സെക്രട്ടറിമാര് പോലീസിനെ നിയന്ത്രിക്കുന്നു. ഇത് ബിജെപി അംഗീകരിക്കില്ല.
ബോധപൂര്വ്വം പ്രശ്നങ്ങള് ഉണ്ടാക്കാന് സിപിഎം ശ്രമിക്കുകയാണ്. ബിജെപി ഓഫീസ് ആക്രമിച്ചവരെ അറസ്റ്റു ചെയ്തില്ലെങ്കില് ശക്തമായ തിരിച്ചടി നേരിടേണ്ടിവരുമെന്നും എന്. ഹരി പറഞ്ഞു.
