മലപ്പുറം: പാക്കിസ്ഥാന് തിരിച്ചടി നല്‍കിയ ഭാരതത്തിന്റെ ധീരജവാന്മാര്‍ക്ക് ഐക്യദാര്‍ഢ്യം പ്രഖ്യാപിച്ച് ജില്ലയിലെങ്ങും ബിജെപി പ്രവര്‍ത്തകര്‍ ആഹ്ലാദപ്രകടനം നടത്തി.
പരപ്പനങ്ങാടി: മിന്നല്‍ വേഗത്തില്‍ പാക്കിസ്ഥാന് ചുട്ട മറുപടി നല്‍കിയ ഭാരത സൈന്യത്തിനും കേന്ദ്ര സര്‍ക്കാരിനും അഭിനന്ദനങ്ങളര്‍പ്പിച്ച് പരപ്പനങ്ങാടിയില്‍ സംഘ വിവിധ ക്ഷേത്ര സംഘടനകളുടെ ആഭിമുഖ്യത്തില്‍ പ്രകടനം നടന്നു. ലോക രാജ്യങ്ങളില്‍ പാക്കിസ്ഥാനെ ഒറ്റപ്പെടുത്തിക്കൊണ്ട് നയതന്ത്ര വിജയം നേടിയ കേന്ദ്രത്തിനും പ്രധാനമന്ത്രിക്കും നാട്ടിന്‍പുറങ്ങളിലെ ദേശസ്‌നേഹികള്‍ അഭിവാദ്യമര്‍പ്പിച്ചു. ബിഇഎം സ്‌കൂള്‍ പരിസരത്ത് നിന്നും ആരംഭിച്ച പ്രകടനം നഗരം ചുറ്റി പയനിങ്ങല്‍ ജംഗ്ഷനില്‍ സമാപിച്ചു. വിനീഷ് കോട്ടത്തറ, കെ.പി.വല്‍സരാജ്, ഗണേശന്‍, കെ.വിജേഷ് ചെട്ടിപ്പടി ഷൈജു.കെ, ഷാജി ഉള്ളേരി തുടങ്ങിയവര്‍ നേതൃത്വം നല്‍കി.
വള്ളിക്കുന്ന്: ബിജെപി പഞ്ചായത്ത് കമ്മറ്റിയുടെ നേതൃത്വത്തില്‍ പഞ്ചായത്തിലെ വിവിധ സ്ഥലങ്ങളില്‍ പ്രകടനം നടത്തി. അത്താണിക്കലില്‍ മേഖലാ സെക്രട്ടറി എം.പ്രേമന്‍ ഉദ്ഘാടനം ചെയ്തു. പഞ്ചായത്ത് കമ്മറ്റി പ്രസിഡന്റ് മണ്ണില്‍ മനോജ്, ടി.കെ.രങ്കരാജന്‍ എന്നിവര്‍ സംസാരിച്ചു. അരിയല്ലൂരിലെ പരിപാടിയില്‍ പഞ്ചായത്ത് കമ്മറ്റി ജനറല്‍ സെക്രട്ടറി പി.പി.പ്രേമദാസന്‍, അത്തോളി കൃഷ്ണന്‍, പി.കൃഷ്ണാനന്ദന്‍ എന്നിവരും സംസാരിച്ചു.
താനൂര്‍: ബിജെപിയുടെ നേതൃത്വത്തില്‍ താനൂരില്‍ ആഹ്ലാദ പ്രകടനം നടത്തി. ജില്ലാ ജനറല്‍ സെക്രട്ടറി രവി തേലത്ത് ഉദ്ഘാടനം ചെയ്തു. പാക്കിസ്ഥാന് കനത്ത തിരിച്ചടി നല്‍കിയ സൈന്യവും ഭാരത സര്‍ക്കാരും ദേശസ്‌നേഹികള്‍ക്ക് എന്നും അഭിമാനമാണെന്നും, ഓരോ ഭാരതീയനും സൈന്യത്തിനൊപ്പമാണെന്നും ഭീകരവാദത്തിനെതിരെയുള്ള പോരാട്ടത്തില്‍ മുഴുവന്‍ ദേശസ്‌നേഹികളും അണിനിരക്കുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: