റയലിന്റെ ക്രിസ്റ്റ്യാനോ റൊണാള്ഡോ ബൊറൂസിയക്കെതിരെ ഗോള് നേടുന്നു
ഡോര്ട്ട്മുണ്ട്: യുവേഫ ചാമ്പ്യന്സ് ലീഗില് നിലവിലെ ചാമ്പ്യന്മാരായ റയല് മാഡ്രിഡിന് സമനില. ബൊറൂസിയയാണ് റയലിനെ സമനിലയില് തളച്ചത്. മറ്റുമത്സരങ്ങളില് യുവന്റസ്, ലെസ്റ്റര്, കോപ്പന്ഹേഗന്, സെവിയ തുടങ്ങിയ കരുത്തര് ജയം കണ്ടു.
ബൊറൂസിയ 2- 2 റയല്
ഗ്രൂപ്പ് എഫില് ജര്മ്മന് ക്ലബ് ബൊറൂസിയ ഡോര്ട്ട്മുണ്ടിനെതിരെ കളിതീരാന് മൂന്ന് മിനിറ്റ് ബാക്കിനില്ക്കേ വീണ ഗോളിനാണ് റയല് സമനില വഴങ്ങിയത്. പകരക്കാരനായി ഇറങ്ങിയ ആന്ദ്രെ ഷുറിലാണ് സമനില ഗോള് കണ്ടെത്തിയത്. റയലിന്റെ തുടര്ച്ചയായ മൂന്നാം സമനില. സ്പാനിഷ് ലീഗിലെ അവസാന രണ്ട് കളികളും സമനിലയിലായിരുന്നു.
ബൊറൂസിയക്കെതിരെ രണ്ട് തവണ മുന്നിട്ടുനിന്നശേഷമാണ് സമനില. കളിയുടെ 17-ാം മിനിറ്റില് ക്രിസ്റ്റിയാനോ റൊണാള്ഡോ ലീഡ് നേടിക്കൊടുത്തു. ഗരെത്ത് ബെയ്ല് പിന്കാലുകൊണ്ട് നല്കി യ പാസ് ക്രിസ്റ്റിയാനോ ലക്ഷ്യം തെറ്റാതെ വലയിലെത്തിച്ചു. എന്നാല് ആദ്യപകുതി അവസാനിക്കുന്നതിന് രണ്ട് മിനിറ്റ് മുമ്പ് ഒബോമയാങ്ക് ബൊറൂസിയക്ക് സമനില സമ്മാനിച്ചു.
ഗോളി കെയ്ലര് നവാസിന്റെ പിഴവില് നിന്നായിരുന്നു ഗോള്. റാഫേല് ഗ്വരേരോ എടുത്ത ഫ്രീകിക്ക് നവാസ് തട്ടിയകറ്റിയത് റയല് പ്രതിരോധ താരത്തിന്റെ തലയില്തട്ടി വലയിലേക്ക് നീങ്ങുന്നതിനിടെ ഓബമയോങ്ക് തൊട്ടുകൊടുത്തു. ഇതോടെ ആദ്യ പകുതി 1-1ന് സമനിലയില്.
പിന്നീട് 68-ാം മിനിറ്റില് റാഫേല് വരാനെ ക്ലോസ് റേഞ്ചിലൂടെ റയലിന് വീണ്ടും ലീഡ് നല്കി.
ആദ്യം ക്രിസ്റ്റിയാനോയുടെ പാസില് നിന്ന് കരിം ബെന്സേമ ക്ലോസ് റേഞ്ചില് നിന്ന് നിറയൊഴിച്ചെങ്കിലും പോസ്റ്റില്ത്തട്ടി മടങ്ങി. പന്ത് കിട്ടിയത് വരാനെക്ക്. വരാനെ ലക്ഷ്യം തെറ്റാതെ പന്ത് വലയിലെത്തിച്ചു. എന്നാല് സമനിലക്കായി പൊരുതിയ ബൊറൂസിയ 87-ാം മിനിറ്റില് ലക്ഷ്യം ഷുറ്ലിലൂടെ ലക്ഷ്യം കണ്ടു. ഗ്രൂപ്പിലെ മറ്റൊരു മത്സരത്തില് സ്പോര്ട്ടിങ് ലിസ്ബണ് മറുപടിയില്ലാത്ത രണ്ട് ഗോളുകള്ക്ക് പോളിഷ് ക്ലബ് ലെഗിയ വാഴ്സോയെ തകര്ത്തു. ലിസ്ബന്റെ ആദ്യ വിജയം.
നാലടിച്ച് യുവന്റസ്
ഗ്രൂപ്പ് എച്ചില് യുവന്റസിന് ആദ്യ വിജയം. എവേ മത്സരത്തില് ഡൈനാമോ സെഗ്രബിനെ മറുപടിയില്ലാത്ത നാല് ഗോളുകള്ക്ക് തകര്ത്തു. 24-ാം മിനിറ്റില് മിറാലെം പാനിക്ക്, 31-ാം മിനിറ്റില് ഹിഗ്വയിന്, 57-ാം മിനിറ്റില് ഡിബാല, 85-ാം മിനിറ്റില് ഡാനി ആല്വസ് എന്നിവര് ലക്ഷ്യം കണ്ടു. സെഗ്രബിന്റെ രണ്ടാം പരാജയം. മറ്റൊരു കളിയില് സെവിയയും ആദ്യജയം നേടി. ലിയോണിനെ 1-0ന് തോല്പ്പിച്ചു. 52-ാം മിനിറ്റില് വാന് യെന്ഡര് വിജയഗോള് നേടി.
പോര്ട്ടോയെ അട്ടിമറിച്ച് ലെസ്റ്റര്
ആദ്യമായി ചാമ്പ്യന്സ് ലീഗ് കളിക്കാനെത്തിയ പ്രീമിയര് ലീഗ് ടീം ലെസ്റ്ററിന് തുടര്ച്ചയായ രണ്ടാം വിജയം. ഗ്രൂപ്പ് ജിയില് ഇന്നലെ എഫ്സി പോര്ട്ടോയെ 1-0ന് പരാജയപ്പെടുത്തി. പ്രീമിയര് ലീഗില് വിജയം കണ്ടെത്താന് കഴിയാതെ വിഷമിക്കുന്ന ലെസ്റ്റര് 25-ാം മിനിറ്റില് ഇസ്ലാം സ്ലിമാനി നേടിയ ഗോളിനാണ് എതിരാളികളുടെ തട്ടകത്തില് ചെന്ന് ജയിച്ചത്. മറ്റൊരു മത്സരത്തില് എഫ്സി കോപ്പന്ഹേഗന് മറുപടിയില്ലാത്ത നാല് ഗോളുകള്ക്ക് ബെല്ജിയം ക്ലബ് ബ്രൂഗിനെ തകര്ത്തു. ഗോള്വിട്ടുനിന്ന ആദ്യ പകുതിക്കുശേഷം 53-ാം മിനിറ്റില് ഡെന്സ്വിലിന്റെ സെല്ഫ് ഗോളിലൂടെ മുന്നിലെത്തിയ കോപ്പന്ഹേഗിനായി 64-ാം മിനിറ്റില് ഡെലാനി, 69-ാം മിനിറ്റില് സാന്റന്ഡര്, 90-ാം മിനിറ്റില് ജോര്ജെന്സണ് എന്നിവരും ലക്ഷ്യം കണ്ടു.
ടോട്ടനത്തിന് ജയം
ഗ്രൂപ്പ് ഇയില് നടന്ന കളിയില് ടോട്ടനം 1-0ന് സിഎസ്കെഎ മോസ്കോയെ പരാജയപ്പെടുത്തി. 71-ാം മിനിറ്റില് സണ് ഹ്യുങ് മിന് ഗോള് നേടി. മറ്റൊരു മത്സരത്തില് മെണാക്കോയും ബയേര് ലെവര്ക്യൂസനും 1-1ന് സമനിലയില് പിരിഞ്ഞു.
