ഹരിപ്പാട്: അനന്തപുരം കൊട്ടാരം പൈതൃകസംരക്ഷണ പട്ടികയില്പ്പെടുത്തി ഉചിതമായ രീതിയില് സംരക്ഷിക്കുകയും, മയൂരസന്ദേശത്തിന്റെ നാടായ ഹരിപ്പാട് പുതിയതായി പണിയുന്ന റവന്യു ടവറിന് വലിയകോയിത്തമ്പുരാന്റെ പേര് നല്കണമെന്നും ഭാരതീയവിചാരകേന്ദ്രം ആവശ്യപ്പെട്ടു.
കേരള വര്മ്മ വലിയകോയിത്തമ്പുരാന്റെ 102-ാം ചരമവാര്ഷികാചരണത്തോട് അനുബന്ധിച്ച് സംഘടിപ്പിച്ച പരിപാടിയില് അവതരിപ്പിച്ച പ്രമേയത്തിലാണ് വിചാരകേന്ദ്രം ഇക്കാര്യം ഉന്നയിച്ചിരിക്കുന്നത്.
മലയാളഭാഷയ്ക്കും സാഹിത്യത്തിനും വേണ്ടി ഒരു മനുഷ്യായുസ് പൂര്ണ്ണമായി സമര്പ്പിച്ച വ്യക്തിത്വമാണ് കേരളവര്മ്മ വലിയകോയിത്തമ്പുരാന്റേത്.
കാര്ത്തികപ്പള്ളി താലൂക്കിലെ അനന്തപുരം കൊട്ടാരത്തില് ഏകാന്തവാസത്തിന് വിധേയനായ അദ്ദേഹം. മയൂരസന്ദേശം, മേഘദൂത് ഉള്പ്പടെ നിരവധി ഗ്രന്ഥങ്ങള് രചിയ്ക്കുകയും ചെയ്തു. 22-ാം വയസ്സില് മലയാളഭാഷാസമിതിയംഗമായി. ഇത്രയേറെ പ്രാധാന്യമുള്ള കേരളവര്മ്മ വലിയകോയിത്തമ്പുരാന് അര്ഹതപ്പെട്ട സ്ഥാനം കേരളീയസമൂഹം നല്കേണ്ടതുണ്ട്. അദ്ദേഹത്തെ സംസ്കരിച്ച മാവേലിക്കരയിലോ ഭൗതികാവശിഷ്ടം അടക്കം ചെയ്തിരിക്കുന്ന അനന്തപുരം കൊട്ടാരത്തിലോ ഉചിതമായ ഒരു സ്മാരകം നിലവിലില്ലെന്നും പ്രമേയത്തില് പറയുന്നു.
ഈ സാഹചര്യത്തില് 150 വര്ഷത്തിലധികം പഴക്കമുള്ള അദ്ദേഹം ഉപയോഗിച്ചിരുന്ന പുസ്തകങ്ങള്, അനുബന്ധസാധനങ്ങള് ഉള്പ്പെടുത്തി ഒരു മ്യൂസിയം നിര്മ്മിക്കണമെന്നും ഭാരതീയവിചാരകേന്ദ്രം പ്രമേയത്തിലൂടെ സര്ക്കാരിനോട് ആവശ്യപ്പെട്ടു. ജില്ലാ സെക്രട്ടറി ജെ. മഹാദേവന് അവതാരകനായും പി.എസ്. സുരേഷ്, എന്. പദ്മകുമാര് എന്നിവര് അനുവാദകര് ആയുമാണ് പ്രമേയം അവതരിപ്പിച്ചത്.
