ആലപ്പുഴ: പ്രകൃതി സംരക്ഷണത്തിന്റെയും അവയവദാനത്തിന്റെയും സന്ദേശവുമായി പൂര്വ്വവിദ്യാര്ത്ഥി സംഗമം. കായംകുളം കൃഷ്ണപുരം ടെക്നിക്കല് സ്കൂളില് 54 വര്ഷത്തിനിടെ പഠിച്ചിറങ്ങിയ വിദ്യാര്ത്ഥികളാണ് ജനനന്മ ലക്ഷ്യമിട്ടുള്ള പ്രവര്ത്തനങ്ങള്ക്കായി ഒത്തുകൂടുന്നത്. കൃഷ്ണപുരം പൂര്വ്വവിദ്യാര്ത്ഥി അസോസിയേഷന് ‘കൃപ’യുടെ നേതൃത്വത്തില് ഞായറാഴ്ച്ച നടക്കുന്ന ഒരുമ-2016 എന്ന പരിപാടിയില് 1000ല് അധികം പൂര്വ്വവിദ്യാര്ത്ഥികളും കുടുംബാഗംങ്ങളും അദ്ധ്യാപകരും പങ്കെടുക്കും.
വൃക്ഷത്തൈ വിതരണം, അവയവദാനസമ്മതപത്രം ഒപ്പുവെക്കല്, ഗുരുവന്ദനം അടക്കമുള്ള പരിപാടികളാണ് തയാറാക്കിയിരിക്കുന്നത്.
1001 വൃക്ഷത്തൈകള് സ്കൂളിലും സ്കൂള് സ്ഥിതിചെയ്യുന്ന വാര്ഡിലുമായി നട്ടുപിടിപ്പിക്കും. അതിന്റെ സംരക്ഷണം പൂര്ണമായി കൃപയുടെ നേതൃത്വത്തില് നടത്തും. പരിപാടിയില് പങ്കെടുക്കുന്ന എല്ലാ പൂര്വ്വവിദ്യാര്ത്ഥികള്ക്കും വൃക്ഷത്തൈകള് സമ്മാനിക്കും. ഗുരുവന്ദനത്തിന്റെ ഭാഗമായുള്ള സമാഗമം-2016ല് അധ്യാപകരെ സ്വീകരിക്കുന്നതും വൃക്ഷത്തൈകള് നല്കിയാണ്. ആദ്യകാലത്ത് സ്കൂളില് പഠിപ്പിച്ചിരുന്ന അധ്യാപകന് മുതല് കഴിഞ്ഞ വര്ഷം വിരമിച്ച അദ്ധ്യാപകരെ വരെ ഗുരുവന്ദനത്തില് ആദരിക്കും. അവയവദാന സെമിനാറും 1001 പേരുടെ അവയവദാന സമ്മതപത്ര ഒപ്പുവെക്കലും നടക്കും. അവയവദാനത്തിന് തയാറായാവരുടെ വിവരങ്ങള് കൃപ ഭാരവാഹികള് പിന്നീട് ആരോഗ്യമന്ത്രിക്ക് നേരിട്ട് സമര്പ്പിക്കും.
വൈകിട്ട് നാലിന് സാംസ്ക്കാരിക സമ്മേളനം ചരിത്രകാരന് ഡോ. എം.ജി ശശിഭൂഷണ് ഉദ്ഘാടനം ചെയ്യുമെന്ന് പി.എന് ഹഷീര് (പ്രസിഡന്റ്), പി.എസ് ശ്രീകുമാര്(ജനറല് സെക്രട്ടറി), ഷാജഹാന് ഇ.കെ(ട്രഷറര്), എം.ജിഷ്ണു (ജോയിന്റ് സെക്രട്ടറി) , എ.ഷാനവാസ് (എക്സിക്യൂട്ടീവ് കമ്മറ്റി അംഗം), കെ.ആര് സന്തോഷ് (പ്രോഗ്രാം കമ്മറ്റി കണ്വീനര്)എന്നിവര് പത്രസമ്മേളനത്തില് അറിയിച്ചു.
