ടെഹ്റാന്: ബാസ്കറ്റ്ബോളില് ഇന്ത്യയ്ക്ക് അട്ടിമറി ജയം. ഫിബ ഏഷ്യ ചലഞ്ച് ബാസ്കറ്റ്ബോള് ചാമ്പ്യന്ഷിപ്പില് റാങ്കിങ്ങില് ഏറെ മുന്നിലുള്ള ചൈനയെ വീഴ്ത്തി ഇന്ത്യ, സ്കോര്: 70-64. ഇതോടെ, ഗ്രൂപ്പ് ഇയിലെ നാലു മത്സരങ്ങളില് രണ്ടാം ജയം കുറിച്ച ഇന്ത്യ, ക്വാര്ട്ടര് ഫൈനല് പ്രതീക്ഷ സജീവമാക്കി. ഇന്ന് അവസാന ഗ്രൂപ്പ് പോരാട്ടത്തില് കസാഖിസ്ഥാനെ കീഴടക്കിയാല് ക്വാര്ട്ടറിലേക്കു മുന്നേറാം.
രണ്ട് വര്ഷത്തിനിടെ ആദ്യമായാണ് ലോകത്തെ മികച്ച ടീമുകളിലൊന്നായ ചൈനയെ ഇന്ത്യ തോല്പ്പിക്കുന്നത്. യുവതാരങ്ങള് അമൃത്പാല് സിങ്ങിന്റെയും അംജ്യോതിന്റെയും തകര്പ്പന് പ്രകടനം ഇന്ത്യയെ തുണച്ചു. ജപ്പാനില് പ്രൊഫഷണല് ലീഗ് കളിക്കുന്നതിന്റെ അനുഭവസമ്പത്തില് കൡച്ച അമൃത്പാല് 23 പോയിന്റ് നേടി ടോപ് സ്കോററായി. ചൈനീസ് സൂപ്പര് താരം ഹു ജിന്ക്യുവിന് 19 പോയിന്റ് നേടാനെ ആയുള്ളു.
ചൈനീസ് ആധിപത്യത്തോടെയാണ് മത്സരം തുടങ്ങിയത്. ആദ്യ ക്വാര്ട്ടറില് 17-14നും രണ്ടാമത്തേതില് 27-18നും മുന്നിലായിരുന്നു ചൈന. എന്നാല്, ഇടവേളയ്ക്കു പിരിയും മുന്പ് രണ്ട് പോയിന്റ് ലീഡ് സ്വന്തമാക്കി ഇന്ത്യ, സ്കോര്: 31-29. തിരിച്ചെത്തിയപ്പോഴും മുന്തൂക്കം നിലനിര്ത്തിയ ടീം മത്സരവും കൈപ്പിടിയിലൊതുക്കി.
ഗ്രൂപ്പിലെ ആദ്യ നാലു സ്ഥാനക്കാര്ക്കാണ് ക്വാര്ട്ടര് ഫൈനല് പ്രവേശനം. ഇന്ത്യ മൂന്നാമതാണ്. ചൈന ഒന്നാമത്, ചൈനീസ് തായ്പേയി രണ്ടാമത്. ജോര്ദാന്, ഫിലിപ്പീന്സ്, കസാഖിസ്ഥാന് ഇന്ത്യയ്ക്കു പിന്നില്.
