മുംബൈ: രാജ്യാന്തര ക്രിക്കറ്റില്നിന്ന് സച്ചിന് ടെന്ഡുല്ക്കര് വിരമിച്ചിട്ട് നവംബറില് മൂന്നു വര്ഷം തികയാനിരിക്കെ അതിനു പിന്നിലെ കളികളെക്കുറിച്ച് വീണ്ടും വിവാദം. തിങ്കളാഴ്ച ന്യൂസിലന്ഡ് പര്യടനത്തിനുള്ള ഇന്ത്യന് ടീം പ്രഖ്യാപിക്കാന് വിളിച്ചുചേര്ത്ത വാര്ത്താസമ്മേളനത്തില് മുഖ്യ സെലക്റ്റര് സന്ദീപ് പാട്ടീല് നടത്തിയ ചില അഭിപ്രായങ്ങളാണ് വിഷയം വീണ്ടും സജീവമാക്കിയത്.
സച്ചിന്റെ വിരമിക്കലിനെക്കുറിച്ചുള്ള ചോദ്യത്തിന് സെലക്റ്റര്മാരും ബിസിസിഐയും തമ്മിലുള്ള ചില കാര്യങ്ങള് അതീവ രഹസ്യമാണെന്നായിരുന്നു സന്ദീപ് പാട്ടീല് പറഞ്ഞത്. സെലക്റ്ററെന്ന നിലയില് വിഷമമുണ്ടാക്കിയത് ചില സുഹൃത്തുക്കളെ നഷ്ടമായെന്നതാണ്. എല്ലാം ഇതിന്റെ ഭാഗമെന്നും പാട്ടീല് കൂട്ടിച്ചേര്ത്തു. സച്ചിന്റെ തീരുമാനത്തിനു പിന്നില് ബിസിസിഐയുടെ സമ്മര്ദമുണ്ടെന്ന് അന്നു തന്നെ ആരോപണമുയര്ന്നിരുന്നു. വെസ്റ്റിന്ഡീസിനെതിരെ നാട്ടില് ഒരു ടെസ്റ്റ് പരമ്പര തട്ടിക്കൂട്ടിയത് അതിനാണെന്ന് ഭൂരിഭാഗവും വിശ്വസിച്ചു.
ഇരുന്നൂറ് ടെസ്റ്റ് കളിച്ച ശേഷം സച്ചിന് വിരമിക്കണമെന്ന് സന്ദീപ് പാട്ടീല് ആവശ്യപ്പെട്ടിരുന്നതായി അന്നു തന്നെ വാര്ത്ത വന്നിരുന്നു. ബിസിസിഐ നിഷേധിച്ചെങ്കിലും, വിശദീകരണം നല്കാന് പാട്ടീല് തയാറായിരുന്നില്ല. ഈ സാഹചര്യത്തിലാണ് അദ്ദേഹത്തിന്റെ പുതിയ പരാമര്ശങ്ങള് വീണ്ടും ചര്ച്ചയായത്. 2013 നവംബര് 14ന് മുംബൈയിലെ വാംഖ്ഡെയിലാണ് സച്ചിന് അവസാന ടെസ്റ്റ് മത്സരം കളിച്ചത്. അതിനു മുന്പ് ഏകദിനത്തില് നിന്ന് വിരമിച്ചിരുന്നു.
