ഇടുക്കി: തിരുവോണത്തിന് ഒരു ദിനം ശേഷിക്കെ നാടും നഗരവും ഓണസദ്യ ഒരുക്കുവാനുള്ള നെട്ടോട്ടത്തില്‍. സദ്യവട്ടങ്ങള്‍ ഒരുക്കുവാനുള്ള തിരക്കില്‍ നഗരം അമര്‍ന്ന് കഴിഞ്ഞു. ഓണക്കോടികള്‍ വാങ്ങുവാന്‍ കുട്ടികളുമൊത്ത് എത്തുന്നവരെ കൊണ്ട് വസ്ത്രശാലകള്‍ നിറഞ്ഞു കഴിഞ്ഞു. പ്രത്യേക ഓണം ഡിസ്‌കൗണ്ട് നല്‍കി ഉപഭോക്താവിനെ ആകര്‍ഷിക്കുവാന്‍ കച്ചവട സ്ഥാപനങ്ങള്‍ മത്സരിക്കുു
കയാണ്. ഒന്നെടുത്താല്‍ മറ്റൊന്ന് ഫ്രീ എന്ന വാഗ്ദാനവുമായി നിരവധി വസ്ത്രശാലകളാണ് ജില്ലയില്‍ കച്ചവടം പൊടിപൊടിപ്പിക്കുന്നത്. പച്ചക്കറിക്കള്‍ക്ക് മുന്‍വര്‍ഷങ്ങളെക്കാള്‍ അല്‍പം വിലക്കുറവുള്ളത് ഓണസദ്യ ഒരുക്കുന്നവര്‍ക്ക് അല്‍പം ആശ്വാസമായിട്ടുണ്ട്. ഉപ്പേരിക്ക് മുന്‍വര്‍ഷത്തെക്കാള്‍ വില കൂടിയിട്ടുണ്ട്. നാല് കഷണങ്ങളാക്കിയ ഏത്ത കായ ഉപ്പേരിക്കാണ് ആവശ്യക്കാര്‍ കൂടുതലുള്ളത്. ഇതിന് കിലോയ്‌ക്ക് 370 മുതല്‍ 400 രൂപ വരെയാണ് ഈടാക്കുന്നത്.
സ്വയം സഹായ സംഘങ്ങളുടെ നിരവധി സ്റ്റാളുകളാണ് നഗരത്തിന്റെ വിവിധ ഭാഗങ്ങളില്‍ ഇടം പിടിച്ചിട്ടുള്ളത്. തൊടുപുഴയില്‍ ദീനദയ സേവ ട്രസ്റ്റിന്റെ സ്റ്റാളിലാണ് കൂടുതല്‍ തിരക്ക്. മൊബൈല്‍ ഫോണ്‍ വില്‍പ്പന രംഗത്തും വന്‍ കച്ചവടമാണ് ഓണനാളുകളില്‍ നടക്കുന്നത്. യുവാക്കളെയാണ് ഇവര്‍ ഏറെ പ്രതീക്ഷിക്കുന്നത്. ആകര്‍ഷകമായ ഓഫറുകള്‍ നല്‍കി മൊബൈല്‍ വില്‍പ്പനകാരും രംഗം കൊഴുപ്പിക്കുന്നു. ഓണനാളുകളില്‍ മഴ മാറി നിന്നത് കച്ചവടം ഉഷാറാകുവാന്‍ കാരണമായി.
തിരുവോണ ദിവസം കുടുംബക്കാര്‍ എല്ലാവരും ഒത്തുകൂടി പുത്തന്‍ കോടിയുമിട്ട് ഓണസദ്യ ഉണ്ണുവാനുള്ള തയ്യാറെടുപ്പിലാണ് നാടും നഗരവും.കാലാവസ്ഥ അനുകൂലമായത് കച്ചവടക്കാര്‍ക്ക് ഏറെ ഗുണകരമായി. അത്തംതുടങ്ങിയതിന് ശേഷം കാര്യമായി മഴ പെയ്തില്ല.
