ന്യൂയോര്ക്ക്: രണ്ടാം ലോകയുദ്ധം അവസാനിച്ചതിന്റെ ആഹ്ലാദ പ്രതീകമായി മാറിയ ചുംബന ചിത്രത്തിലെ നായിക ഗ്രെറ്റാ സിമ്മര് ഫ്രീഡ്മാന് (92) അന്തരിച്ചു.
ആസ്ട്രേലിയയില്നിന്ന് 15 ാം വയസില് യുദ്ധം പേടിച്ച് പലായനം ചെയ്ത ഗ്രെറ്റാ സിമ്മര് ഇരുപതാം നൂറ്റാണ്ടിലെ ഏറ്റവും പ്രശസ്ത ചിത്രത്തില് ഇടം പിടിക്കുമ്പോള് 21 വയസുകാരി ദന്തപരിചരണ സഹായി. 1945 ആഗസ്റ്റ് 14 ന്, ജപ്പാന് യുദ്ധം നിര്ത്തി അമേരിക്കക്ക് കീഴടങ്ങി. വാര്ത്ത ആഘോഷിക്കാന് ജനക്കൂട്ടം ന്യൂയോര്ക്ക് സിറ്റിയില് നിരന്നു. അതിനിടെ ഫോട്ടോഗ്രാഫര് ആല്ഫ്രഡ് ഐസന്സ്റ്റെയ്ഡ്റ്റിന് കിട്ടിയ ഫോട്ടോയിലാണ് ഗ്രെറ്റാ സിമ്മര് പതിഞ്ഞത്.
ആഹ്ലാദത്താല്, നാവികന് ജോര്ജ്ജ് മെന്ഡോസാ അടുത്തു കണ്ട പെണ്കുട്ടിയെ ചുംബിച്ചു, ഏറെ വികാരവായ്പ്പില്.
ചിത്രം ലൈഫ് മാസികയില് വന്നു, ടൈംസ് സ്ക്വയറിലെ വിജെ ദിനാഘോഷം എന്ന പേരില്. ചുംബന ചിത്രമായി പിന്നീടിത് ലോകപ്രസിദ്ധമാകുകയായിരുന്നു.
അതോടെ ചിത്രത്തിലുള്ളത് താനാണെന്ന് അവകാശപ്പെട്ട് പലരും വന്നു. ചിത്രത്തില് മുഖം വ്യക്തവുമല്ല. 1980, ആഗസ്റ്റില് മൂന്ന് സ്ത്രീകളുള്പ്പെടെ 14 പേരാണ് അവകാശവാദം ഉന്നയിച്ചത്. തിരക്കിനിടെ, ഫോട്ടോഗ്രാഫര് ആല്ഫ്രഡ് ചിത്രത്തില് പതിഞ്ഞവരുടെ പേരു ചോദിച്ചിരുന്നില്ല. പില്ക്കാലത്താണ് മെന്ഡോന്സയും ഗ്രെറ്റാ സിമ്മറുമാണെന്ന് തിരിച്ചറിഞ്ഞത്.
ഗ്രെറ്റാ സിമ്മര്, അന്ന് സംഭവിച്ചത് പലപ്പോള് വിവരിച്ചിട്ടുണ്ടെന്ന് മകന് ജോഷ്വാ ഫ്രീഡ്മാന് പറയുന്നു: ”അത് ആഘോഷമായിരുന്നു, നഴ്സ് വേഷത്തിലായിരുന്ന എന്നെ സൈനിക വേഷത്തിലൊരാള് അടക്കം പിടിച്ചു, ചുംബിച്ചു, അതാണു സംഭവിച്ചത്,”’എന്നാണ് അമ്മ പറഞ്ഞത്. സംസ്കാരം ആര്ലിങ്ടണ് ദേശീയ സെമിത്തേരിയില്, ഭര്ത്താവ് ഡോ. മിഷാ ഫ്രീഡ്മാന്റെ കല്ലറയ്ക്കടുത്ത്.
ചുംബനം പുസ്തകമായി, പ്രതിമയായി
ലോകമഹായുദ്ധം അവസാനിച്ചതിന്റെ ആഘോഷമായി മാറിയ ചുംബന ചിത്രത്തിന്റെ ചരിത്രം പുസ്തകമായി. ‘ദ കിസിങ് സെയ്ലര്: ദ മിസറി ബിഹൈന്ഡ് ഫോട്ടോ ദാറ്റ് എന്ഡഡ് വേള്ഡ് വാര് സെക്കന്ഡ്’ എഴുതിയത് ലോറന്സ് വേറിയയാണ്.
ചിത്രം ശില്പ്പമാക്കിയത് സെവാര്ഡ് ജോണ്സണ്. ആല്ഫ്രഡ് എടുത്ത ചിത്രത്തിന്റെ രൂപമാണത്. അതല്ല, വിക്ടര് ജോര്ഗന്സണ് എന്ന അത്ര പ്രസിദ്ധനല്ലാത്ത ഒരാളുടെ ചിത്രമാണ് ആധാരമെന്ന് ജോണ്സണ് പറഞ്ഞിട്ടുണ്ട്. ആദ്യം ശില്പ്പം ഫ്ളോറിഡയിലും പിന്നീട് കാലിഫോര്ണിയയിലേക്കും ന്യൂയോര്ക്ക് സിറ്റിയിലേക്കും മാറ്റി. ഇതിന്റെ പകര്പ്പുകള് മറ്റിടങ്ങളിലും സ്ഥാപിച്ചു.
ഫോട്ടോഗ്രാഫര് ആല്ഫ്രഡ് ഐസന്സ്റ്റെയ്ഡ്റ്റ് രണ്ടു പുസ്തകങ്ങളില് ഈ ചിത്രത്തിന്റെ ചരിത്രം പറയുന്നുണ്ട്. ടൈംസ്ക്വയറിലെ ആഘോഷങ്ങളുടെ ഒട്ടേറെ ചിത്രങ്ങള് അദ്ദേഹമെടുത്തു. നിഴല് വീണു തുടങ്ങിയ സമയമായിരുന്നു. ഇരുണ്ട വസ്ത്രങ്ങള്ക്കിടയില് വെള്ളവസ്ത്രക്കാരിയെ കണ്ടതാണ് ഈ ചിത്രം പകര്ത്താന് പ്രേരണയായത്.
