എരുമേലി: കാട്ടാനകൂട്ടം വ്യാപകമായി കൃഷിയിടം നശിപ്പിച്ചു. വെള്ളിയാഴ്ച്ച പുലര്ച്ചെ രണ്ടുമണിയോടെ മുട്ടപ്പള്ളി കുട്ടപ്പായി പടിയില് മുന്നാടതെക്കേതില് വര്ഗീസിന്റെ പുരയിടത്തിനോട് ചേര്ന്നുള്ള കൃഷിയിടത്തിലാണ് കാട്ടാനയിറങ്ങിയത്.
വനാതിര്ത്തി പ്രദേശത്ത് ഒരേക്കര് സ്ഥലത്ത് കൃഷി ചെയ്തിരുന്ന കുലച്ചു നില്ക്കുന്ന നൂറു വാഴകളും, ഇരുനൂറോളം മരച്ചീനിയും നശിപ്പിച്ചു. ബഹളം കേട്ട് ഓടിയെത്തിയ സ്ഥലം ഉടമയും നാട്ടുകാരും ചേര്ന്ന് പടക്കം പൊട്ടിച്ച് ആനകളെ ഓടിക്കുകയായിരുന്നു. ഇതു സംബന്ധിച്ച് കൃഷിവകുപ്പില് പരാതി നല്കി.
ജനവാസമേഖലയോട് ചേര്ന്ന പ്രദേശത്ത് കാട്ടാനകള് കൂട്ടത്തോടെ ഇറങ്ങിയതോടെ മേഖലയിലെ ജനം ഭീതിയിലാണ്.
വരും ദിവസങ്ങളില് കാട്ടാനയെ അകറ്റാന് ഉറക്കമൊഴിച്ച് കാവല് ഇരിക്കാനുള്ള തയ്യാറെടുപ്പിലാണ് പ്രദേശവാസികള്. പഞ്ചായത്തംഗം പ്രകാശ് പുളിക്കന് കൃഷിനാശം സംഭവിച്ച സ്ഥലം സന്ദര്ശിച്ചു. വനാതിര്ത്തിയില് വനംവകുപ്പധികൃതര് സൗരോര്ജ വേലികള് സ്ഥാപിച്ച് വന്യമൃഗങ്ങളുടെ അക്രമണങ്ങളില് നിന്നും രക്ഷിക്കണമെന്ന് നാട്ടുകാര് ആവശ്യപ്പെട്ടു.
