ഇതിഹാസങ്ങള്ക്കും പുരാണങ്ങള്ക്കും എന്നുവേണ്ട ആദ്ധ്യാത്മികഗ്രന്ഥങ്ങള്ക്കെല്ലാം പൊതുവെയുള്ള ഒരു ഗുണമാണ് കൂടുതല് ആഴത്തില് പോകുന്തോറും അവയില്നിന്ന് മൂല്യങ്ങളായ മുത്തുകളും രത്നങ്ങളുമൊക്കെ കണ്ടെടുക്കന് കഴിയും എന്നുള്ളത്. വിഷ്ണുസഹസ്രനാമത്തിലും ഇതുപോലെ ധാരാളം അമൂല്യരത്നങ്ങള് മറഞ്ഞുകിടപ്പുണ്ട്. അവ നമ്മെ ഏറ്റവും ധനികരാക്കാന് പര്യാപ്തവുമാണ്. ”വിദ്യാധനം സര്വ്വധനാല് പ്രധാനം.” അതില് ആത്മവിദ്യയാണ് ഏറ്റവും പ്രധാനം. സാധാരണ വിദ്യകളൊക്കെ പണവും സ്ഥാനമാനങ്ങളും നേടാന് സഹായിക്കും. പക്ഷെ അവയൊന്നും ശാശ്വതമായ നിലനില്പ്പില്ലാത്തതാണ്. സംസാരപാരാവാരം അനായാസാനേ തരണം ചെയ്യാന് ആത്മവിദ്യ മാത്രമേ സഹായിക്കുകയുള്ളൂ.
സഹസ്രനാമത്തില് പറയുന്നു: ”ഔഷധം ജഗതസ്സേതു സത്യധര്മ്മ പരാക്രമഃ
സത്യധര്മ്മാദികളാകുന്ന പരാക്രമമാണ് സംസാരസാഗരം തരണംചെയ്യാനുള്ള ഉത്തമമായ ഔഷധം. പരാക്രമം = പരയിലേക്കുള്ള (ഈശ്വരനിലേക്കുള്ള) ക്രമം (ചര്യ).
”ബ്രാഹ്മണ്യാസക്തചിത്തോ ഭവത ഭവ-
ഭയാംബോധി പാരം തുരീതും”
”സംസാരസാഗരം കടക്കാന് ബ്രഹ്മധ്യാനത്തില് മുഴുകുവിന്” എന്ന് ഭര്ത്തൃഹരി.
ഈശ്വരനിലേക്ക് ചരിച്ചാല് എന്താണ് ഗുണം എന്നാണെങ്കില്, വിവേകചൂഡാമണിയില് ആചാര്യസ്വാമികള് പറയുന്നു:
”സമ്യഗാസ്ഥാപനം ബുദ്ധേ ശുദ്ധേ ബ്രഹ്മണി
സര്വദാ
തത് സമാധാനമിത്യുക്തം നതു
ചിത്തസ്യലാലനം”
”ശുദ്ധബോധസ്വരൂപമായ ബ്രഹ്മത്തില് ബുദ്ധിയെ സ്ഥിരമായി ഉറപ്പിച്ചുനിര്ത്തുന്നതാണ് സമാധാനം എന്നു പറയുന്നത്. മനസ്സിന്റെ യേഥഷ്ടമുള്ള സഞ്ചരണമല്ല അത്.”
ബുദ്ധിയെ ഈശ്വരനില് ഉറപ്പിച്ചുനിര്ത്തിയാല് നമ്മുടെ ചിന്തകളും പ്രവൃത്തികളുമെല്ലാം ഈശ്വരാര്പ്പിതമായിത്തീരും. അപ്പോള് എന്തു സംഭവിക്കും?
”സര്വധര്മ്മാന് പത്യജ്യ
മാമേകം ശരണം വ്രജ
അഹം ത്വാ സര്വ പാപേഭ്യോ
മോക്ഷയിഷ്യാമി മാ ശുചാ”
ഞാന് നിന്നെ സകല പാപങ്ങളില്നിന്നും മോചിപ്പിക്കും. ദുഃഖിക്കേണ്ടതില്ല എന്ന് ഭഗവാന് ഗീതയില് പറയുന്നു.
”ഈശ്വരോ വിക്രമീ ധന്വീ മേധാവീ വിക്രമ ക്രമഃ”
”ഈശ്വരനിലേക്ക് ചരിക്കുന്നവന് ധന്യനാകുന്നു. മനസ്സിന്റെ അധിപനുമാകുന്നു” എന്ന് വിഷ്ണുസഹസ്രനാമം.
വിക്രമം = വിശേഷണമുള്ള ക്രമം.
വിക്രമക്രമം മനസ്സിന്റെ വൃത്തിയെ സൂചിപ്പിക്കുന്നു. മനസ്സിനെ ജയിച്ചാല് ലോകം ജയിച്ചതിന് തുല്യമാണ്. മനസ്സിനെ ത്യജിച്ചാല് സര്വസംഗപരിത്യാഗമായി.
”അമൃതാശോ/മൃതവപുഃ സര്വജ്ഞ സര്വതോമുഖ”
അമൃതം കഴിക്കുന്നവന് ശരീരത്തിന്റെ അമൃതത്വം നേടുന്നു. സര്വജ്ഞന് സര്വതും സിദ്ധിക്കുന്നു.
ആരാണ് സര്വജ്ഞന്? സഹസ്രനാമം പറയുന്നു:
”സര്വദര്ശീ വിമുക്താത്മാ സര്വജ്ഞോ ജ്ഞാനമുത്തമം”
(നശിക്കുന്നതായ) വസ്തുക്കളില്നിന്ന് വേറിട്ട് (നശിക്കാത്തതായ) ആത്മാവിനെ അറിയുന്നതാണ് ഉത്തമമായ ജ്ഞാനം. അങ്ങനെയുള്ളവര്ക്ക് എന്തു സംഭവിക്കുന്നു എന്നാണെങ്കില്,
”തത്ത്വം തത്ത്വവിദേകാത്മാ ജന്മ-മൃത്യു-ജരാതിഗ”
തത്ത്വവും തത്ത്വജ്ഞാനിയും ഒന്നാകുമ്പോള് (ബ്രഹ്മജ്ഞാനി ബ്രഹ്മമായിത്തീരുമ്പോള്) ജനനമരണ ജരാദികളെ അതിഗമിക്കുന്നു. ഒരു മുന്നറിയിപ്പ് കൂടി തരുന്നു, സഹസ്രനാമം,
”അഹസംവത്സരോ വ്യാളഃ പ്രത്യയ
സര്വദര്ശന”
അഹസംവത്സരം (കാലം) പിടിച്ചുനിര്ത്താന് കഴിയാത്തതാണ്. ഈ തത്ത്വം (സത്യം) എല്ലാവരും ഗ്രഹിക്കണം. (പ്രത്യയ സര്വദര്ശന).
നമ്മളെല്ലാം കാലമാകുന്ന സര്പ്പത്തിന്റെ വായിലാണുള്ളതെന്ന് രാമായണം പറയുന്നു.
അതുകൊണ്ട് സമയം കളയാതെ ഭഗവല്പ്രാപ്തിക്കുവേണ്ടി പരിശ്രമിക്കുക. ഇതുതന്നെയാണ് അതിന് ഏറ്റവും പറ്റിയ സുദര്ശനകാലം. ”ഋതു സുദര്ശനകാല പരമേഷ്ടീ പരിഗ്രഹ” എന്നു സഹസ്രനാമം.
”പൂതാത്മാ പരമാത്മാ ച മുക്താനാം
പരമാഗതി”
”പൂതാത്മാവെന്നും (പരിശുദ്ധാത്മാവ്)
പരമാത്മാവെന്നും പറയുന്ന വിഷ്ണുഭഗവാന്തന്നെയാണ് മുക്തന്മാരുടെ പരമമായ ആശ്രയം.”
