പത്തനംതിട്ട: ട്രാഫിക് നിയന്ത്രണം കര്ശനമാക്കാത്തതിനാല് അബാന്ജംഗ്ഷനില് ഗതാഗതക്കുരുക്കേറുന്നു. ട്രാഫിക് സിഗ്നലുണ്ടെങ്കിലും, നിയന്ത്രണങ്ങള് ഇവിടെ ആരും വകവയ്ക്കുന്നില്ല എന്നതാണ് പ്രധാന പ്രശ്നം.
തിരുവല്ല-കുമ്പഴ സംസ്ഥാനപാതയെ റിംഗ്റോഡ് ഛേദിക്കുന്നിടത്താണ് അബാന് ജംഗ്ഷന്. ഇരുവഴികളും തിരക്കേറിയതാണ്. കൊല്ലം, തിരുവനന്തപുരം ജില്ലകളിലേക്കുള്ളതിനു പുറമേ, തമിഴ്നാട്ടിലേക്കുള്ള യാത്രക്കാരും ഈ കവല കടന്നാണ് പോകേണ്ടത്. ശബരിമല മണ്ഡലകാലത്തും മാസപൂജസമയത്തും വാഹനതിരക്ക് ഏറെയാവും.
സിഗ്നല് ലൈറ്റിനു മുന്പായി റോഡില് കുറുകേ വരച്ചിടേണ്ട സീബ്രലൈന് നാല് ഭാഗത്തും മാഞ്ഞ നിലയിലാണ്. സീബ്രാലൈനുകള് കഴിഞ്ഞ് വാഹനങ്ങള് നിര്ത്തിയിടുന്നതോടെ സിഗ്നല് ലൈറ്റുകള് കാണാന് കഴിയാത്ത സ്ഥിതിയാകും. മിക്കപ്പോഴും പിന്നിലുള്ള വാഹനങ്ങളില് നിന്നും ഹോണ് മുഴങ്ങുമ്പോഴാണ് പച്ചലൈറ്റുകള് തെളിഞ്ഞ വിവരം ഇവര്ക്ക് അറിയാന് കഴിയുന്നത്. ട്രാഫിക്ക് പോലീസിന്റെ സേവനം പലപ്പോഴും ഇവിടെ ലഭ്യമാകുന്നില്ലെന്നതും വാഹനയാത്രക്കാരെ ഏറെ കുഴയ്ക്കുന്നുണ്ട്.
