ആലപ്പുഴ: ആലപ്പുഴ നഗരത്തില് നടപ്പാക്കുന്ന അമൃത് കുടിവെള്ളപദ്ധതിയുടെ ഭാഗമായി നഗരത്തിലെ പഴയ ജലവിതരണക്കുഴലുകള് പൂര്ണമായി മാറ്റി സ്ഥാപിക്കുന്നതിന് നടപ്പു സാമ്പത്തികവര്ഷം 56.27 കോടി രൂപ കൂടി അനുവദിച്ചു.
മുന്വര്ഷം 33.90 കോടി അനുവദിച്ചിരുന്നു. ഇതോടെ പദ്ധതിക്ക് അനുവദിച്ച ആകെത്തുക 90.17 കോടിയായി. ആലപ്പുഴ കുടിവെള്ളപദ്ധതിയുടെ കീഴില് പുതിയ പൈപ്പുകള് സ്ഥാപിക്കുന്നതിന് കേരള വാട്ടര് അതോറിറ്റിക്കാണ് തുക കൈമാറുന്നത്. ചീഫ് സെക്രട്ടറി എസ് എം വിജയാനന്ദിന്റെ സാന്നിധ്യത്തില് വെള്ളിയാഴ്ച തിരുവനന്തപുരത്ത് ചേര്ന്ന ഉന്നതതല യോഗമാണ് രണ്ടാംഗഡു അനുവദിച്ചത്.
കേന്ദ്രസര്ക്കാര് സഹായത്തോടെ നടപ്പാക്കുന്ന ‘അമൃത്’ (അടല് ഇന്ഫ്രാസ്ട്രക്ചര് ഫോര് അര്ബന് റിജുവനേഷന് ആന്ഡ് ട്രാന്സ്ഫര്മേഷന്) പദ്ധതിയുടെ സഹായത്തോടെയാണ് പൈപ്പുകള് മാറ്റി സ്ഥാപിക്കുക. ആലപ്പുഴ നഗരസഭ നടപ്പാക്കുന്ന പദ്ധതിക്ക് കേരള വാട്ടര് അതോറിറ്റി മേല്നോട്ടം വഹിക്കും. ഇതിനായി കേരള വാട്ടര് അതോറിറ്റി തയ്യാറാക്കിയ മാസ്റ്റര് പഌന് നഗരസഭാ അധികൃതര്ക്ക് കൈമാറിയിരുന്നു.
നഗരത്തിലെ 52 വാര്ഡുകളെ ഒമ്പതു മേഖലകളായി തിരിച്ചാണ് പദ്ധതി നടപ്പാക്കുക. കുടിവെള്ളപദ്ധതിയുടെ ആധുനികവല്ക്കരണവും നവീകരണവും ആണ് ഇതിലൂടെ ലക്ഷ്യമിടുന്നത്. അഞ്ചുവര്ഷത്തിനുള്ളില് പദ്ധതി പൂര്ത്തിയാക്കും. 2015–16 സാമ്പത്തികവര്ഷത്തില് തുടങ്ങി 2019–20 വര്ഷത്തില് പൂര്ത്തിയാകും. ആദ്യഘട്ടത്തില് നഗരത്തില് നാല് കൂറ്റന് ജലസംഭരണികള് സ്ഥാപിക്കും.
71 ലക്ഷംലിറ്റര് സംഭരണശേഷിയുള്ളവയാകും ഇവ. കൊമ്മാടി (21 ലക്ഷം ലിറ്റര്), തത്തംപള്ളി (12 ലക്ഷം ലിറ്റര്), പഴവങ്ങാടി (10 ലക്ഷം ലിറ്റര്), വലിയകുളം (28 ലക്ഷം ലിറ്റര്) എന്നിവിടങ്ങളിലാണ് ജലസംഭരണികള് സ്ഥാപിക്കുക. 70 കോടിരൂപ അടങ്കല് വരുന്ന ഇവയുടെ നിര്മാണത്തിനുള്ള ഭരണാനുമതി അടുത്തദിവസങ്ങളില് ലഭിക്കും.കൂടാതെ അടുത്ത സാമ്പത്തിക വര്ഷത്തില് ഒമ്പതു മേഖലകളിലും ഓരോ ടാങ്ക് സ്ഥാപിക്കും. അഞ്ചു മേഖലകളിലെ പൈപ്പുകള് അക്കൊല്ലത്തോടെ പൂര്ണമായി മാറ്റിസ്ഥാപിക്കും.
പദ്ധതി വേഗം പൂര്ത്തിയാക്കുക എന്ന ലക്ഷ്യത്തോടെ നഗരറോഡുകളുടെ ഇരുവശങ്ങളിലും പൈപ്പിടും. റോഡുകള് അധികമായി വെട്ടിപ്പൊളിക്കുന്നത് ഒഴിവാക്കാനാണിത്.എല്ലാ വീടുകളിലും 24 മണിക്കൂറും ശുദ്ധജലം എത്തിക്കാന് പദ്ധതി ലക്ഷ്യമിടുന്നു.
