കണ്ണൂര്: ഭരണസ്വാധീനമുപയോഗിച്ച് ആര്എസ്എസ്-ബിജെപി നേതാക്കളെ കള്ളക്കേസില് കുടുക്കാന് സിപിഎം നേതൃത്വം ഗൂഡാലോചന നടത്തുകയാണെന്ന് ബിജെപി സംസ്ഥാന ജനറല് സെക്രട്ടറി എ.എന്.രാധാകൃഷ്ണന് വാര്ത്താസമ്മേളനത്തില് പറഞ്ഞു. പയ്യന്നൂരിലെ കൊലപാതകത്തില് യാതൊരു പങ്കുമില്ലാത്ത ആര്എസ്എസ്- ബിജെപി നേതാക്കളെ കേസില് പ്രതിചേര്ക്കാന് സിപിഎം നേതൃത്വം ശ്രമിച്ചിരുന്നു. പിന്നീട് ആര്എസ്എസ് ജില്ലാ കാര്യവാഹിനെ പോലീസ് അറസ്റ്റ് ചെയ്തെങ്കിലും നിരപരാധിയാണെന്ന് കണ്ട് വിട്ടയക്കുകയായിരുന്നു. തുടര്ന്ന് സിപിഎം നേതാക്കള് പോലീസിനെ ഭീഷണിപ്പെടുത്തുകയും ഭീഷണിക്ക് വഴങ്ങി വിട്ടയക്കപ്പെട്ടവരെ ഗൂഢാലോചനയില് ഉള്പ്പെടുത്തി റിമാന്റ് റിപ്പോര്ട്ട് സമര്പ്പിക്കുകയുമായിരുന്നു. സിപിഎം നേതൃത്വം ഒരുഭാഗത്ത് കൊലപാതകം നടത്തുകയും മറുഭാഗത്ത് പോലീസിനെ ഭീഷണിപ്പെടുത്തുകയുമാണ്. ഇരട്ടനീതിയാണ് കേരളത്തില് നടപ്പിലാക്കുന്നത്. പരസ്യമായി കലാപത്തിനാഹ്വാനം ചെയ്ത്കൊണ്ട് പ്രസംഗം നടത്തിയ കോടിയേരിക്കെതിരെ കേസെടുക്കാന് വിമുഖത കാണിച്ച പോലീസ് ബാലകൃഷ്ണപ്പിള്ളക്കെതിരെ കേസെടുത്തത് ഇതാണ് വ്യക്തമാക്കുന്നത്.
2014 ലെ പാര്ലമെന്റ് തെരഞ്ഞെടുപ്പിന് ശേഷമാണ് പയ്യന്നൂരില് ആര്എസ്എസ്-ബിജെപി പ്രവര്ത്തകര്ക്കും അവരുടെ വീടുകള്ക്കും നേരെ സിപിഎം നിരന്തരമായി അക്രമം അഴിച്ചുവിടാന് ആരംഭിച്ചത്. കഴിഞ്ഞ പാര്ലമെന്റ് തെരഞ്ഞെടുപ്പില് പയ്യന്നൂര് നിയോജക മണ്ഡലത്തില് 4000 വോട്ടില് നിന്ന് ബിജെപി വോട്ട് 12000 ആയി വര്ധിച്ചു. 2014 ഡിസംബര് 7 ന് ആര്എസ്എസ് ജില്ലാ കാര്യവാഹ് രാജേഷ്, യുവമോര്ച്ച ജില്ലാ പ്രസിഡണ്ട് അരുണ് കുമാര്, കൊല്ലപ്പെട്ട രാമചന്ദ്രന് എന്നിവരുടെ വീടുകള് അക്രമിച്ചിരുന്നു. ഇതേ വീടുകള് തന്നെയാണ് സിപിഎം പ്രവര്ത്തകനായ ധനരാജിന്റെ കൊലപാതകത്തിന് ശേഷവും അക്രമിച്ചത്. 2014 ല് പയ്യന്നൂരില് നടന്ന അക്രമ സംഭവങ്ങളില് അറുപതോളം സിപിഎമ്മുകാരെ പ്രതിചേര്ത്തെങ്കിലും ഇതുവരെയും ആറുപേരെ മാത്രമാണ് അറസ്റ്റ് ചെയ്തത്. കൊല്ലപ്പെട്ട രാമചന്ദ്രന്റെ വീട്ടില് നേരത്തെ റീത്ത് വെക്കുകയും ഭീഷണി മുഴക്കുകയും ചെയ്തിരുന്നു. രാമചന്ദ്രന്റെ കൊലപാതകം നേരത്തെ തന്നെ ആസൂത്രണം ചെയ്തതാണെന്ന് വ്യക്തമായ സാഹചര്യത്തില് ഗൂഡലോചന അന്വേഷിക്കണമെന്നും നിരപരാധികളായ ആര്എസ്എസ്, ബിജെപി നേതാക്കളെ കള്ളക്കേസില് കുടുക്കുന്നതിനെതിരെ നിയമപോരാട്ടം നടത്തുമെന്നും അദ്ദേഹം പറഞ്ഞു.
സിപിഎം അക്രമങ്ങള്ക്കും, സിപിഎം-പോലീസ് കൂട്ടുകെട്ടിനുമെതിരെ 18 ന് വൈകുന്നേരം 4.30 ന് പയ്യന്നൂരില് പ്രതിഷേധക്കൂട്ടായ്മ സംഘടിപ്പിക്കും. ബിജെപി സംസ്ഥാന പ്രസിഡണ്ട് കുമ്മനം രാജശേഖരന്, സംസ്ഥാന ജനറല് സെക്രട്ടറിമാരായ എം.ടി.രമേശ്, കെ.സുരേന്ദ്രന് തുടങ്ങിയവര് പങ്കെടുക്കും. പ്രതിഷേധ പരിപാടിയുടെ ഭാഗമായി 22 ന് രാവിലെ 10 മണിക്ക് സെക്രട്ടറിയേറ്റ് മാര്ച്ച് നടത്തുമെന്നും അദ്ദേഹം പറഞ്ഞു. ബിജെപി ജില്ലാ അധ്യക്ഷന് പി.സത്യപ്രകാശും വാര്ത്താസമ്മേളനത്തില് പങ്കെടുത്തു.
