ന്യൂദല്ഹി: സൗദിയിലെ തൊഴില് പ്രശ്ന പരിഹാരത്തിന് സംസ്ഥാന പഞ്ചായത്ത് വകുപ്പ് മന്ത്രി കെ.ടി ജലീല് സൗദിയിലേക്ക് പോകേണ്ടതില്ലെന്ന് കേന്ദ്രവിദേശകാര്യമന്ത്രാലയത്തിന്റെ വിശദീകരണം. സൗദിയില് ഭാരത പൗരന്മാര്ക്ക് വേണ്ട കാര്യങ്ങളെല്ലാം കേന്ദ്രസര്ക്കാര് ചെയ്യുന്നുണ്ട്. അനവസരത്തില് അപേക്ഷിച്ചതിനാലാണ് കെ.ടി ജലീലിന് നയതന്ത്ര പാസ്പോര്ട്ട് നിഷേധിച്ചതെന്നും കേരളം ഉന്നയിക്കുന്ന ആരോപണങ്ങള് തെറ്റിദ്ധാരണ മൂലമാണെന്നും വിദേശകാര്യ വക്താവ് വികാസ് സ്വരൂപ് അറിയിച്ചു.
തൊഴില് നഷ്ടപ്പെട്ട ഭാരത പൗരന്മാര്ക്ക് മാനുഷിക പരിഗണന മുന്നിര്ത്തി സൗജന്യ ഭക്ഷണവും താമസവും ചികിത്സയും നല്കുമെന്ന് സൗദി സര്ക്കാര് ഉറപ്പുനല്കിയിട്ടുണ്ട്. ഇവര്ക്ക് തൊഴില് നല്കാന് നിരവധി കമ്പനികള് തയ്യാറായിട്ടുണ്ട്. ജോലി ചെയ്ത സ്ഥാപനങ്ങളിലെ ശമ്പള കുടിശികയും മറ്റാനുകൂല്യങ്ങളും ലഭിക്കാന് സൗദി സര്ക്കാര് ഇടപെടും. ഇതിനായി തൊഴിലാളികള്ക്ക് നിയമസഹായം ലഭിക്കാന് ഭാരതം അഭിഭാഷകരെ ഏര്പ്പെടുത്തും.
സൗദി, ഭാരത സര്ക്കാരുകള് ചേര്ന്ന് തൊഴില് പ്രശ്നത്തിന് പരിഹാരം കാണാനുള്ള ശ്രമത്തിലാണ്.
സൗദിയില് തുടരാന് ആഗ്രഹിക്കാത്തവര്ക്ക് നാട്ടിലേക്ക് മടങ്ങാം.
ഭാരതത്തില് നിന്നുള്ള 7,700 തൊഴിലാളികള്ക്ക് തൊഴില് നഷ്ടമായ സംഭവത്തില് പരിഹാരം കാണാന് കേന്ദ്രവിദേശകാര്യസഹമന്ത്രി ജനറല് വി.കെ സിങ് മൂന്നു ദിവസമായി സൗദിയില് തങ്ങുകയാണ്. സൗദി സര്ക്കാരുമായി ബന്ധപ്പെട്ടുകൊണ്ട് ചെയ്യേണ്ട കാര്യങ്ങളെല്ലാം കേന്ദ്രസര്ക്കാര് ചെയ്യുന്നുണ്ട്. എന്നാല് ഇതില് സംസ്ഥാന മന്ത്രിക്ക് യാതൊന്നും ചെയ്യാനില്ല. മറ്റു തെറ്റിദ്ധാരണകളുടെ ആവശ്യമില്ല.നയതന്ത്ര പാസ്പോര്ട്ട് അനുവദിക്കുന്നതിന് തടസ്സങ്ങളില്ലെന്നും കേന്ദ്രസര്ക്കാര് വ്യക്തമാക്കി. സിങ്ങ് ഇവിടെത്തുടര്ന്ന് ഭാരതീയരെ മടക്കിക്കൊണ്ടുപോകുന്നതിലും ഇതിന് ലഭിക്കുന്ന പ്രചാരണത്തിലും സൗദിക്ക് അതൃപ്തിയുണ്ട്. അതാണ് കാരണം.
അതിനിടെ കെ.ടി ജലീലിന് പാസ്പോര്ട്ട് നിഷേധിച്ച വിഷയത്തില് എന്തെങ്കിലും രാഷ്ട്രീയ കാരണങ്ങളുണ്ടോയെന്ന് കെ.സി വേണുഗോപാല് ലോക്സഭയില് ഇന്നലെ ചോദ്യമുന്നയിച്ചു. ഇക്കാര്യത്തില് സുഷമാ സ്വരാജ് തിങ്കളാഴ്ച ലോക്സഭയില് മറുപടി നല്കുമെന്ന് പാര്ലമെന്ററികാര്യമന്ത്രി അനന്ത്കുമാര് അറിയിച്ചു.
അന്താരാഷ്ട്ര തലത്തില് അപമാനകരമായ സംഭവമാണ് സൗദി ഭരണകൂടം നേരിടുന്നത്. പരാതിപരിഹാര സംവിധാനം രൂപീകരിച്ച് എത്രയും വേഗം പ്രശ്നം അവസാനിപ്പിക്കാനാണ് സൗദി രാജാവിന്റെ തീരുമാനം. ഭാരതത്തിലെ മാധ്യമങ്ങള് ഇക്കാര്യത്തില് അമിതമായ പ്രാധാന്യം നല്കുന്നതില് സൗദിക്ക് അതൃപ്തിയുണ്ട്. ഇതാണ് കൂടുതല് സര്ക്കാര് പ്രതിനിധികളെ സൗദിയിലേക്ക് അയക്കേണ്ടതില്ലെന്ന നിലപാടിലേക്ക് വിദേശകാര്യമന്ത്രാലയത്തെ എത്തിച്ചത്. ഭാരത പൗരന്മാരോടുള്ള സൗദിയുടെ അനുകൂല നിലപാട് നഷ്ടപ്പെടുത്തുന്ന നടപടികള് ഉണ്ടാകരുതെന്ന നിര്ദ്ദേശവും കേന്ദ്രസര്ക്കാര് മുന്നോട്ടുവെച്ചിട്ടുണ്ട്.
