ആലപ്പുഴ: പാമ്പു കടിയേറ്റു മരിച്ച പട്ടികജാതിക്കാരനായ യുവാവിന്റെ 79 വയസുള്ള പിതാവിനു മൂന്നു മാസത്തിനകം നഷ്ടപരിഹാരം നല്കണമെന്നു വനംവകുപ്പിനോടു മനുഷ്യാവകാശ കമ്മിഷന് ജുഡീഷ്യല് അംഗം പി.മോഹനദാസ് ഉത്തരവിട്ടു.
ആലപ്പുഴ ഗുരുപുരം വി.വി.മുകുന്ദന് സമര്പ്പിച്ച പരാതിയിലാണ് ഉത്തരവ്. മുകുന്ദന്റെ മകന് രതീഷ്കുമാര് 2011 ഫെബ്രുവരി എട്ടിനാണു കോട്ടയം മണര്കാട്ട് കുഴഞ്ഞുവീണു മരിച്ചത്. പാമ്പുകടിയേറ്റതാണു മരണകാരണമെന്നു പോസ്റ്റ്മോര്ട്ടം റിപ്പോര്ട്ടില് വ്യക്തമായിരുന്നു. രതീഷിന്റെ വരുമാനത്തിലാണു കുടുംബം പുലര്ന്നിരുന്നത്.
റാന്നി ഡിവിഷനല് ഫോറസ്റ്റ് ഓഫിസറില്നിന്നു മനുഷ്യാവകാശ കമ്മിഷന്വിശദീകരണം ആവശ്യപ്പെട്ടിരുന്നു. വന്യമൃഗങ്ങളുടെ ആക്രമണം കാരണം മരിക്കുന്നതു സംബന്ധിച്ച പരാതികള് മൂന്നു മാസത്തിനുള്ളില് സമര്പ്പിക്കണമെന്നും പരാതിക്കാരന് പരാതി വൈകി നല്കിയതിനാല് പരിഗണിക്കാന് കഴിയില്ലെന്നുമായിരുന്നു വിശദീകരണം. മാസങ്ങള്ക്കുശേഷമാണു മകന്റെ മരണകാരണം വ്യക്തമായി മനസിലാക്കിയതെന്നും അക്കാരണത്താലാണ് അപേക്ഷ നല്കാന് വൈകിയതെന്നും പരാതിക്കാരന് കമ്മിഷനെ അറിയിച്ചു. പ്രകൃതിദുരന്തത്തില്പ്പെടുത്തി ധനസഹായത്തിന് അപേക്ഷിച്ചപ്പോള് കോട്ടയം ജില്ലയില് അപേക്ഷിക്കണമെന്നു പറഞ്ഞ് അപേക്ഷ നിരസിച്ചു.
റാന്നി ഫോറസ്റ്റ് ഓഫിസിലും മുഖ്യമന്ത്രിയുടെ ജനസമ്പര്ക്ക പരിപാടിയിലും സുതാര്യകേരളത്തിലും അപേക്ഷ നല്കിയെങ്കിലും പരിഹാരമുണ്ടായില്ലെന്നും മുകുന്ദന് കമ്മിഷനു മൊഴി നല്കി. പരാതിക്കാരനു നഷ്ടപരിഹാരം നല്കാന് ചട്ടത്തില് ഇളവു നല്കി തുക അനുവദിക്കണമെന്നു കമ്മിഷന് നിര്ദേശിച്ചു. തുക നല്കിയശേഷം റാന്നി ഡിവിഷനല് ഫോറസ്റ്റ് ഓഫിസര് വിശദീകരണം നല്കണമെന്നും ഉത്തരവില് പറയുന്നു.
