ആലപ്പുഴ: നഗരത്തിലെ ഗതാഗതക്കുരുക്ക് അഴിക്കുന്നതിനായി ശവക്കോട്ടപ്പാലം, ജില്ലാ കോടതിപ്പാലം എന്നിവിടങ്ങളില്‍ പുതിയ പാലം നിര്‍മ്മിക്കും. ജില്ലാ കോടതി പാലത്തിന് ഇരുവശവുമായി പുതിയ പാലം നിര്‍മ്മിച്ച് നടുവിലുള്ള ഇപ്പോഴത്തെപ്പാലം ഉയര്‍ത്താനാണ് ഉദ്ദേശിക്കുന്നതെന്ന് ഉദ്യോഗസ്ഥര്‍ യോഗത്തില്‍ വിശദീകരിച്ചു. പള്ളാത്തുരുത്തി മുതല്‍ ആര്യാട് വരെ ആലപ്പുഴയ്ക്ക് കിഴക്കന്‍ ബൈപ്പാസ് നിര്‍മ്മിക്കും. കൂടാതെ നെഹ്‌റുട്രോഫി പാലം രണ്ടണ്‍ുവരിയായിട്ടാകും നിര്‍മ്മിക്കുക.
കെഎസ്ആര്‍ടിസി സ്ഥലത്ത് 150 ബസ്സുകള്‍ക്കുള്ള പാര്‍ക്കിങ് സൗകര്യം, 25 ബസ്സുകള്‍ക്കുള്ള ഗ്യാരേജ് സൗകര്യം, 1000 യാത്രക്കാര്‍ക്ക് ഒരേ സമയം വരാനും പോകാനുമുള്ള സൗകര്യം, ടോയ്‌ലറ്റ്, കഫറ്റേറിയ, ജീവനക്കാരുടെ വിശ്രമസ്ഥലം എന്നിവയുള്‍പ്പടെ പ്രാധനപ്പെട്ട ആവശ്യങ്ങള്‍ തയ്യാറാക്കി ജില്ലാ കളക്ടര്‍ക്ക് സമര്‍പ്പിക്കാന്‍ നിര്‍ദ്ദേശിച്ചിട്ടുണ്ട്. ഇതെല്ലാ ഹബ്ബിന്റെ ഭാഗമായുള്ള പ്രവര്‍ത്തികളില്‍പ്പെടുത്തും.പ്രൈവറ്റ് ബസ്സുകളില്‍ വന്നിറങ്ങുന്ന യാത്രക്കാര്‍ക്ക് കെഎസ്ആര്‍ടിസി ബസ്റ്റാന്‍ഡില്‍ എത്തിച്ചേരുന്നതിന് ഇപ്പോഴുള്ള ബുദ്ധിമുട്ട് പരിഹരിക്കും.
ഇവിടെ നിന്നുള്ള ബസ്സുകള്‍ എല്ലാം കെഎസ്ആര്‍ടിസി സ്റ്റേഷന്‍ വഴി കടന്നുപോകാന്‍ സൗകര്യമുണ്ടാക്കും. ഇതിനായി ഫ്‌ളൈ ഓവര്‍ ആവശ്യമാണെങ്കില്‍ അതും പരിഗണിക്കുമെന്ന് മന്ത്രി തോമസ് ഐസക് പറഞ്ഞു. ജലഗതാഗത വകുപ്പിന്റെ യാഡുകളെ തമ്മില്‍ ബന്ധിപ്പിക്കുകയും യാത്രസൗകര്യം വര്‍ധിപ്പിക്കുകയും ചെയ്യും.
