ആമുഖം
നീലാംബുജ ശ്യാമള കോമളാംഗം
സീതാ സമാരോപിത വാമഭാഗം
പാണൗ മഹാസായക ചാരുചാപം
നമാമി രാമം രഘുവംശനാഥം
(നീലത്താമരപോലെ സുന്ദരവും കറുത്ത നിറമുള്ള അംഗങ്ങളോടുകൂടിയതുമായ, സീത ഇടത്തുഭാഗത്തു സ്ഥിതിചെയ്യുന്ന, രണ്ടു കൈകളിലും അമ്പും വില്ലും ധരിച്ച, രഘുകുലനാഥനായ രാമനെ ഞാന് നമിക്കുന്നു)
സര്വ്വസദ്ഗുണ സമ്പന്നനും കരുത്തുറ്റയാളുമായ, ഒരു ഉത്തമോദാഹരണമായ, പുരുഷന്റെ ജീവിതം; ജനങ്ങള്ക്കായി സത്യധര്മ്മങ്ങളുടെ പാഠം പകര്ന്നുനല്കും വിധം സുന്ദരമായി പറയാന് വാല്മീകി മഹര്ഷി ആഗ്രഹിക്കുന്നു. സമുദ്രം പോലെ ഗാംഭീര്യവും ഹിമവാനെപ്പോലെ സ്ഥിരതയുമുള്ള ശ്രീരാമന്റെ ചരിത്രം നാരദ മഹര്ഷി സംക്ഷിപ്തമായി പറഞ്ഞുകൊടുക്കുന്നു.
അടുത്ത ദിവസം രാവിലെ കുളിക്കാനായി പോയ മഹര്ഷി ഒരു ക്രൗഞ്ചപ്പക്ഷിയെ എയ്തിട്ട വേടനെ ശപിച്ചുപറഞ്ഞ വാക്യം ഒരു ശ്ലോകമായിത്തീരുന്നു. തുടര്ന്നെത്തിയ ബ്രഹ്മാവ് ഇതേ ഈണത്തില് ശ്രീരാമകഥ എഴുതാന് നിര്ദ്ദേശിക്കുകയും ആ കാവ്യം ചന്ദ്ര സൂര്യന്മാരും പര്വ്വതങ്ങളും ഉള്ള കാലത്തോളം പ്രസിദ്ധമായിത്തീരുമെന്ന് അനുഗ്രഹിക്കുകയും ചെയ്യുന്നു.
രാമകഥ ഇന്നും, സഹസ്രാബ്ദങ്ങള്ക്കു ശേഷവും നവംനവങ്ങളായ ഭാവങ്ങളോടെ എഴുതുകയും പറയുകയും ചെയ്തുകൊണ്ടിരിക്കുന്നു. ഭാരതത്തിലെ എല്ലാ ഗ്രാമങ്ങളിലും വീടുകളിലും രാമായണ വായന അതതു സ്ഥാനീയ ഭാഷകളില് അനുഷ്ഠാനങ്ങളോടെ പാരായണം ചെയ്യപ്പെടുന്നു. കുടുംബ ജീവിതം, സാമൂഹ്യ വ്യവസ്ഥകളും ആചാരങ്ങളും, രാഷ്ട്രീയ ചിന്തനം, ഭരണകൂടാദര്ശം, വിദേശ ബന്ധങ്ങള് എന്നിങ്ങനെ മിക്കവാറും എല്ലാ മേഖലകളിലും രാമായണകഥയുടെ സ്ഥായിയായ സ്വാധീനവും അടയാളവും നമുക്കിന്നും നിത്യേനയെന്നോണം കാണാം.
ഭാരതീയരുടെ നിത്യജീവിതംതന്നെ കരുപ്പിടിപ്പിക്കുന്നതില് രാമായണ പാത്രങ്ങളുടെയും കഥയുടെയും പങ്ക് നിസ്തര്ക്കമാണല്ലോ. അങ്ങനെയുള്ള രാമായണഗ്രന്ഥം വര്ഷത്തിലൊരിക്കലെങ്കിലും പൂര്ണ്ണമായി പാരായണം ചെയ്യുന്നതിനും അതുവഴി രാമായണാദര്ശങ്ങളില്നിന്ന് ജനജീവിതത്തിലേക്ക് ഒരു പുതിയ ഊര്ജ്ജം പ്രസരിക്കുന്നതിനും വഴിയൊരുക്കുകയാണ് രാമായണ മാസാചരണംകൊണ്ട് നമ്മുടെ നാട്ടില് ഉദ്ദേശിക്കുന്നത്.
വീടുകളില് അയല്പക്കത്തുള്ള എട്ടുപത്തു വീട്ടുകാരെ ക്ഷണിച്ച് രാമായണ പാരായണം നടത്തുന്നത് ഒരു പുണ്യകര്മ്മമാണ്. അതോടൊപ്പം, വഴിതെറ്റാവുന്ന പുതിയ തലമുറയ്ക്കടക്കം മുഴുവന് സമൂഹത്തിനും അവരുടെ തനിമയും ധര്മ്മവും പരിചയപ്പെടുത്താനുള്ള അവസരവുമാണ്. അതില്ലെങ്കില് തന്റെ കൈയിലുള്ള രത്നം ഉപേക്ഷിച്ച് മറ്റുള്ളവരുടെ പക്കലുള്ള സ്ഫടിക കഷ്ണത്തെ വിലമതിക്കുന്ന കാഴ്ച നാം നിത്യേന കാണുന്നുണ്ടല്ലോ? സ്വധര്മ്മവും കുടുംബവും ത്യജിച്ച് താല്ക്കാലിക കാമസംതൃപ്തി നല്കുന്നവരുടെകൂടെ ഒളിച്ചോടുന്ന വാര്ത്തകളും നാം നിത്യേക കേള്ക്കുന്നു. അത്തരം പതനങ്ങള് തടയാനും ആത്മഹത്യയിലേക്കു പോലും നയിക്കുന്ന വിഷാദാത്മക മനോഭാവത്തെ ഇല്ലാതാക്കാനും രാമായണത്തിനു കഴിയും.
രാമകഥയുടെ മഹിമ ഇന്ന് ഭാരതത്തില് മാത്രമല്ല, നിരവധി വിദേശരാഷ്ട്രങ്ങളിലും അംഗീകരിക്കപ്പെട്ട സത്യമാണ്. ഇന്തോനേഷ്യക്കാരില് ഹിന്ദുക്കള് വളരെ ചുരുങ്ങിയ സംഖ്യയിലേ ഉള്ളു. എന്നാല് അവിടെ എല്ലാ മതസ്ഥരും രാമായണം വായിക്കുന്നു. രാമലീല വേദിയില് അവതരിപ്പിക്കുമ്പോള് അവയിലെ കഥാപാത്രങ്ങളായി അഭിനയിക്കുകയും ചെയ്യുന്നു. നൂതന ആദ്ധ്യാത്മിക പ്രസ്ഥാനങ്ങള് രാമകഥയെ എല്ലാ ഭൂഖണ്ഡങ്ങളിലും രാജ്യങ്ങളിലും എത്തിച്ചിരിക്കുന്നു. അവിടങ്ങളിലെ സാഹിത്യകൃതികളിലും സിനിമകളിലുംവരെ രാമായണ സ്വാധീനം സ്പഷ്ടമായി കാണാനവും.
(തുടരും)
