മാന്നാര്: സിവില് സപ്ലൈസ് വകുപ്പിന്റെ മാവേലി സ്റ്റോര്, ലാഭം, സൂപ്പര്മാര്ക്കറ്റുകളില് താത്ക്കാലിക ജീവനക്കാരെ തിരുകി കയറ്റാന് സിപിഐ നേതാക്കളുടെ ശ്രമം. വര്ഷങ്ങളായി ഈ സ്ഥാപനങ്ങളില് ജോലി ചെയ്യുന്ന വനിത ജീവനക്കാരെ ഒരു മുന്നറിയിപ്പും നല്കാതെ പിരിച്ചു വിട്ട് പുതിയ ആള്ക്കാരെ നിയമിക്കണമെന്നാണ് ഇവരുടെ ആവശ്യം. ജോലി വാഗ്ദാനം ചെയ്ത് ചില നേതാക്കള് പണപ്പിരിവും ആരംഭിച്ചതായാണ് അറിയാന് സാധിക്കുന്നത്.
സപ്ലൈകോയിലെ സ്ഥിര നിയമനങ്ങള് പിഎസ്സി വഴിയാണ് നടത്തുന്നത്. എന്നാല് ഇത് സര്ക്കാരിന് വലിയ സാമ്പത്തിക ബാധ്യതയാകുമെന്നതിനാല് ഭൂരിഭാഗം സ്ഥലങ്ങളിലും മാനേജര് ഒഴിച്ചുള്ള തസ്തികകളില് താത്ക്കാലിക ജീവനക്കാരാണ്.
ദിവസ വേതന അടിസ്ഥാനത്തിലും സാധനങ്ങള് പായ്ക്ക് ചെയ്യുന്നതിന് അനുസരിച്ചുമാണ് ഇവര്ക്ക് പ്രതിഫലം ലഭിക്കുന്നത്. ഇതില് നിശ്ചിത ശതമാനം തുക പിഎഫ് പിടിക്കുന്നു. പിന്നീട് പ്രതിമാസം കൈയില് കിട്ടുന്നത് 3000 മുതല് 5000രൂപവരെ. ഇത് ഇല്ലാതാക്കാനാണ് നേതാക്കള് ശ്രമിക്കുന്നതെന്നാണ് തൊഴിലാളികള് പറയുന്നത്.
സിവില് സപ്ലൈസ് വകുപ്പ് സിപിഐയ്ക്ക് ലഭിച്ചതോടെ പ്രദേശിക നേതാക്കള് മുതല് ഏരിയ, ജില്ലാ നേതാക്കള് വരെ വ്യാപകമായ ഇടപെടലുകളാണ് നടത്തുന്നത്. ഇപ്പോള് താത്ക്കാലികമായി നിയമിച്ചാലും പിന്നീട് സ്ഥിരപ്പെടുത്തുമെന്ന് പറഞ്ഞ് പണപ്പിരിവും പല നേതാക്കളും ആരംഭിച്ചിട്ടുണ്ട്.
ചെങ്ങന്നൂര് താലൂക്കില് ഇത്തരം ഇടപെടലുകള്ക്ക് നേതൃത്വം നല്കുന്നത് വിഭാഗീയതയുടെ പേരില് ഏരിയ സെക്രട്ടറി സ്ഥാനത്തു നിന്നും നീക്കം ചെയ്ത ഒരു നേതാവാണെന്നും ആക്ഷേപമുണ്ട്.
