പയ്യന്നൂര്‍: സംഗീത കലാനിധി സഞ്ജയ് സുബ്രഹ്മണ്യം തന്റെ അനിതരസാധാരണമായ ആലാപനശൈലി പുറത്തെടുത്തപ്പോള്‍ അയോദ്ധ്യ ഓഡിറ്റോറിയത്തിലെ പുരുഷാരം അനിര്‍വചനീയമായ ആനന്ദലഹരിയിലാറാടി. ജാഗ്രത് സ്വപ്‌നസുഷുപ്തി അവസ്ഥകളുടെയും അപ്പുറത്തേക്ക് ആനന്ദത്തിന്റെ തുരീയാവസ്ഥയിലേക്ക് അനുവാചകരെ നയിക്കുന്ന മായിക സംഗീതം. ആത്മ പ്രകാശം പരത്തുന്ന അവിഷ്‌കരണവും അതുല്യമായ രാഗാലാപനശൈലിയുമായി നാല്‍പത്തിയെട്ടുകാരനായ ഈ സംഗീത പ്രതിഭ ആലാപനം നടത്തുമ്പോള്‍ ഹൃദയ ദ്രവീകരണ ശക്തിയുള്ള ശാരീരം സംഗീതാസ്വാദനത്തിന്റെ ദിവ്യ ഭാവതലങ്ങളിലേക്ക് ആസ്വാദക മനസ്സ് ചേക്കേറുന്നു. നാല്‍പത്തിയൊന്ന് നാള്‍ നീണ്ടു നില്‍ക്കുന്നതു രീയം സംഗീതോത്സവത്തിന്റെ മുപ്പത്തിയഞ്ചാം സന്ധ്യയാണ് അലൗകികമായ ആലാപനഭംഗികൊണ്ട് സഞ്ജയ് സുബ്രഹ്മണ്യം അവിസ്മരണീയമാക്കിയത്. വയലിനില്‍ എസ്.വരദരാജനും മൃദംഗത്തില്‍ നാഞ്ചില്‍ അരുളും ഘടത്തില്‍ തൃപ്പൂണിത്തറ രാധാകൃഷ്ണനും വൈഭവം കാട്ടി.
മുപ്പത്തിയാറാം ദിനമായ ഇന്ന് മൈസൂര്‍ ചന്ദന്‍ കുമാര്‍ പുല്ലാങ്കുഴല്‍ കച്ചേരി നടത്തും മധൂര്‍ ശ്രീനിധി (വയലിന്‍) ജയചന്ദ്രറാവു (മൃദംഗം) തൃപ്പുണിത്തുറ രാധാകൃഷ്ണന്‍ (ഘടം) എന്നിവര്‍ പക്കമേളമൊരുക്കും
