ആലപ്പുഴ: ദേശീയ ചിന്താധാരയ്ക്ക് എതിരായ ചിന്തകളാണ് യഥാര്ത്ഥ സാഹിത്യം എന്ന് പ്രചരിപ്പിക്കപ്പെടുന്ന ആപത്തുകാലമാണിതെന്ന് അന്താരാഷ്ട്രപുസ്തകോത്സവ സമിതി ജനറല് സെക്രട്ടറി ഇ. എന് . നന്ദകുമാര്. ആലപ്പുഴയില് ആഗസ്റ്റില് നടത്തുന്ന ഏഴാമത് അന്താരാഷ്ട്രപുസ്തകോത്സവത്തിന്റെ സ്വാഗതസംഘ രൂപീകരണയോഗം ഉത്ഘാടനം ചെയ്യുകയായിരുന്നു അദ്ദേഹം. ദല്ഹിയിലെ ജവഹര്ലാല് നെഹ്റു യൂണിവേഴ്സിറ്റിയില് ഇന്നേവരെ നെഹ്റുവിനെ കുറിച്ചോ ഗാന്ധിജിയെ കുറിച്ചോ പഠനങ്ങള് നടന്നിട്ടില്ല. അവിടെ നടന്നത് മാര്ക്സിയന് സിദ്ധാന്ത പഠനങ്ങള് മാത്രമാണ്.
അധ്യാപകരെ റിക്രൂട്ട് ചെയ്യുന്നതുപോലും മാര്ക്സിയന് സിദ്ധാന്തങ്ങളുടെ അറിവ് എത്രത്തോളം ഉണ്ടെന്നു മനസിലാക്കിയാണ്. ഇടതുപക്ഷമാണെന്ന് തെളിയിച്ചെങ്കില് മാത്രമേ സാഹിത്യ രംഗത്തു ഇടമുണ്ടാകുവെന്ന അവസ്ഥയാണ് ഇന്ന്. മുഴുവന് ഭാരതത്തിലും ആസൂത്രിതമായി ഇത്തരത്തിലുള്ള ഇടപെടലുകള് ഉണ്ടാവുന്നു. വായനയുടെ ലോകത്തേയ്ക്കും ദേശീയ ചിന്താധാരയുടെ കടന്നുകയറ്റം ഉണ്ടായെങ്കിലേ ഇത്തരം മൂല്യച്യുതികള് ഇല്ലാതാക്കുവാന് സാധിക്കൂ. കേരളത്തിന്റെ സാംസ്കാരിക രംഗത്തെ ആലപ്പുഴയുടെ സംഭാവന വളരെ വലുതാണ്. ഈ തിരിച്ചറിവാണ് ആലപ്പുഴയില് അന്താരാഷ്ട്ര പുസ്തകോത്സവം നടത്തുവാന് ഇടയായതെന്നും അദ്ദേഹം കൂട്ടിച്ചേര്ത്തു.
പുസ്തകോത്സവ സമിതി അദ്ധ്യക്ഷന് ഡോ: അമ്പലപ്പുഴ ഗോപകുമാര് അധ്യക്ഷത വഹിച്ചു. വിഭാഗ് പ്രചാര് പ്രമുഖ് ജെ. മഹാദേവന്, പുസ്തകോത്സവസമിതി ജനറല് സെക്രട്ടറി കെ. ആര്. സുബ്രഹ്മണ്യന്, ആര്. രുദ്രന്, പി.ആര്. ശിവശങ്കരന്, പ്രൊഫ. സോളമന്, എ. വി. ഷിജു. ജി. വിനോദ് കുമാര് എന്നിവര് സംസാരിച്ചു. ജില്ലാ പ്രചാര് പ്രമുഖ് രൂപേഷ് സ്വാഗതവും വി.എസ്. പ്രസാദ് നന്ദിയും പറഞ്ഞു
