ആലപ്പുഴ: സിപിഎം വിരുദ്ധനെ ഉന്നത പദവിയില് നിയമിക്കാനുള്ള നീക്കം വിവാദത്തില്. അഡീഷനല് ഗവ. പ്ലീഡര് തസ്തകയിലേക്കാണ് മുന് മുസ്ലിംലീഗ് നേതാവായ ആലപ്പുഴയിലെ അഭിഭാഷകനെ സിപിഎം പരിഗണിച്ചത്.
ജില്ലയിലെ ഒരു സിപിഎം മന്ത്രിയുടെ താല്പ്പര്യപ്രകാരമാണ് ഈ നേതാവിന് ഈ തസ്തിക നല്കാന് ധാരണയായിരിക്കുന്നത്. മുന്പ് യുഡിഎഫിന്റെ ഭരണകാലത്ത് ഈ തസ്തിക കൈകാര്യം ചെയ്ത നേതാവ് ഇപ്പോള് മുസ്ലിംലീഗിലില്ല. പകരം ഒരു സംഘടനയുടെ ചുമതലയാണ് ഈ അഭിഭാഷകനുള്ളത്. ഇടത് അനുകൂല അഭിഭാഷക സംഘടനയിലെ മുതിര്ന്ന പല അഭിഭാഷകരെയും ഒഴിവാക്കിയാണ് സിപിഎം ജില്ലാസെക്രട്ടേറിയറ്റ് ഈ നേതാവിനെ അഡീഷനല് ഗവ. പ്ലീഡര് തസ്തികയില് നിയമിക്കാന് തീരുമാനിച്ചിരിക്കുന്നത്.
ഒരു ഗവ. പ്ലീഡര് പബ്ലിക്ക് പ്രോസിക്യൂട്ടറും നാല് അഡീഷനല് പബ്ലിക് പ്രോസിക്യൂട്ടര്മാരുമാണുള്ളത്. തഹസീല്ദാര് മുഖേന കലക്ടര്ക്ക് ലഭിക്കുന്ന അപേക്ഷ ജില്ലാജഡ്ജി പരിശോധിച്ചശേഷം കലക്ടര് നല്കുന്ന റിപ്പോര്ട്ടിന്റെ അടിസ്ഥാനത്തിലാണ് ഈ തസ്തികയില് നിയമനം നടക്കുക. രാഷ്ട്രീയ പാര്ട്ടികള്ക്ക് വീതംവെച്ചിരിക്കുന്ന ഈ സുപ്രധാന തസ്തികകളില് ഒരെണ്ണം സിപിഐക്ക് ഉള്ളതാണ്. മറ്റ് മൂന്ന് അഡീഷനല് പബ്ലിക് പ്രോസിക്യൂട്ടര് തസ്തികളില് ഒന്നാണ് മന്ത്രിയുടെ താല്പ്പര്യപ്രകാരം മുന് മുസ്ലിംലീഗ് നേതാവിന് നല്കാന് ധാരണയായിരിക്കുന്നത്.
മുസ്ലിം പ്രാതിനിധ്യം ഉറപ്പിക്കാന് വേണ്ടിയാണ് ഈ അഭിഭാഷകനെ ഉള്പ്പെടുത്താന് തീരുമാനിച്ചതെന്ന് ചില സിപിഎം നേതാക്കള് പറയുന്നു.
എന്നാല് ഇടത് അനുകൂല അഭിഭാഷക സംഘടനയില് മുതിര്ന്ന മുസ്ലിം അഭിഭാഷകര് ഉണ്ടെങ്കിലും അവരെയൊക്കെ ഒഴിവാക്കിയാണ് ഈ അഭിഭാഷകനെ നിയമിക്കാന് തീരുമാനിച്ചത്. ഇതില് അഭിഭാഷക സംഘടന കടുത്ത പ്രതിഷേധത്തിലാണ്. പബ്ലിക് പ്രോസിക്യൂട്ടര് തസ്തികയിലേക്കുള്ള നിയമനവും വിവാദമായിട്ടുണ്ട്. മുമ്പ് ഈ പദവി വഹിച്ച സിവില് കേസ് മാത്രം കൈകാര്യം ചെയ്യുന്ന അഭിഭാഷകനെയാണ് വീണ്ടും ഈ തസ്തികയില് നിയമിക്കാന് തീരുമാനിച്ചിരിക്കുന്നത്.
ഇതും കടുത്ത വിമര്ശനങ്ങള്ക്ക് കാരണമായിട്ടുണ്ട്. തീരുമാനം പുനപരിശോധിച്ചില്ലെങ്കില് വലിയ പൊട്ടിത്തെറിയായിരിക്കും ഇടത് അഭിഭാഷക സംഘടനയില് ഉണ്ടാകുക എന്നുമറിയുന്നു.
