ദുബായ്: സൗദി അറേബ്യയില് ജിദ്ദയിലെ അമേരിക്കന് കോണ്സുലേറ്റിനു സമീപമുണ്ടായ ചാവേര് ആക്രമണവുമായി ബന്ധപ്പെട്ട് 12 പാക്കിസ്ഥാന് പൗരന്മാരെ പോലീസ് അറസ്റ്റ് ചെയ്തു. ഇവരടക്കം 19 പേരാണ് കേസില് അറസ്റ്റിലായിരിക്കുന്നത്.
കോണ്സുലേറ്റിനു നേരെ പൊട്ടിത്തെറിച്ച ചാവേര് പാക്കിസ്ഥാന് പൗരന് അബ്ദുള്ള വാഖാര് ഖാന്(35) ആണെന്ന് സൗദി അറേബ്യ ആഭ്യന്തര മന്ത്രാലയം വ്യക്തമാക്കിയിരുന്നു. കാര് ഡ്രൈവറായ ഇയാള് ഭാര്യയ്ക്കും മാതാപിതാക്കള്ക്കും ഒപ്പം 12 വര്ഷമായി ജിദ്ദയില് താമസിക്കുകയായിരുന്നു.
തിങ്കളാഴ്ചയാണ് ചാവേര് ആക്രമണം ഉണ്ടായത്. മദീനയിലെ പ്രവാചക പള്ളി, ദമാമിനടുത്തെ ഖത്തീഫിലെ ഷിയാ പള്ളി, ജിദ്ദയിലെ അമേരിക്കന് കോണ്സുലേറ്റ് എന്നിവിടങ്ങളിലാണ് ആക്രമണങ്ങള് നടന്നത്. ഏഴ് പേര് കൊല്ലപ്പെടുകയും രണ്ട് പേര്ക്ക് പരുക്കേല്ക്കുകയും ചെയ്തു.
ആക്രമണങ്ങളുടെ ഉത്തരവാദിത്തം ഒരു ഭീകരവാദ സംഘടനയും ഇതുവരെ ഏറ്റെടുത്തിട്ടില്ല. 2004ല് ജിദ്ദയിലെ കോണ്സുലേറ്റിനു നേര്ക്കുണ്ടായ ആക്രമണത്തില് ഒമ്പതു പേര് കൊല്ലപ്പെട്ടിരുന്നു.
