ഇരിട്ടി: ഒരു മാസം മുമ്പ് ക്രിമിനല് സംഘം വീട്ടില്ക്കയറി വെട്ടിപ്പരിക്കേല്പ്പിച്ച 7 വയസ്സുകാരന് കാര്ത്തിക്കിന്റെ വീടിനു നേരെ നിരന്തരം നടക്കുന്ന അക്രമത്തെക്കുറിച്ച് സമഗ്രമായ അന്വേഷണം നടത്തി യഥാര്ത്ഥ കുറ്റക്കാരെ നിയമത്തിനു മുന്നില് കൊണ്ടുവരണമെന്ന് ബിജെപി മുഴക്കുന്ന് പഞ്ചായത്ത് കമ്മറ്റി ആവശ്യപ്പെട്ടു. കഴിഞ്ഞ മേയ് മുപ്പതിനായിരുന്നു കാര്ത്തിക്കിനെ വീട്ടില്ക്കയറി ഒരുസംഘം ക്രിമിനലുകള് വെട്ടിപ്പരിക്കേല്പ്പിച്ചത്. അക്രമത്തില് വിറങ്ങലിച്ചു പോയ കുട്ടിക്ക് ദിവസങ്ങളോളം ചികിത്സയും കൗണ്സിലിങ്ങും കൊടുത്ത ശേഷമാണ് സ്കൂളില് പോലും അയക്കാന് സാധിച്ചത്. എന്നാല് ഇതിനു ശേഷവും വീടിനുനേരെ അക്രമങ്ങള് നടക്കുകയാണ്. കഴിഞ്ഞ മാസം 27 ന് വീടിന്റെ ജനല് ഗ്ലാസ് എറിഞ്ഞു പൊളിക്കുകയും ബൈക്ക് മറിച്ചിടുകയും ചെയ്തു. ബുധനാഴ്ചയും വീട്ടില് മറ്റൊരക്രമം നടന്നിരിക്കയാണ്. ഇത്തവണ വീട്ടില് ആളില്ലാത്ത സമയത്ത് വീടിനകത്തു തീയിടുകയാണ് ചെയ്തിരിക്കുന്നത്. കട്ടിലും കിടക്കയും തുണിത്തരങ്ങളും, പുസ്തകങ്ങളും കത്തി നശിച്ചു. യഥാര്ത്ഥ പ്രതികളെ പിടികൂട്ടാന് കഴിയാത്ത പോലീസിന്റെ നിഷ്ക്രിയത്വമാണ് വീണ്ടും വീണ്ടും ഇത്തരം അക്രമങ്ങള് അരങ്ങേറാന് ഇടയാക്കുന്നതെന്നു യോഗം കുറ്റപ്പെടുത്തി. എത്രയും പെട്ടെന്ന് ഇതില് ഉള്പ്പെട്ട യഥാര്ത്ഥ പ്രതികളെ പിടികൂടി നിയമത്തിനു മുന്നില് കൊണ്ടുവരാന് പോലീസ് തയ്യാറാവാത്ത പക്ഷം ശക്തമായ സമരപരിപാടികള് നടത്താന് ബിജെപി തയ്യാറാവേണ്ടി വരുമെന്നും യോഗം മുന്നറിയിപ്പ് നല്കി.
യോഗത്തില് പ്രസിഡന്റ് വി.മുരളീധരന് അദ്ധ്യക്ഷത വഹിച്ചു. എന്.വി.ഗിരീഷ്, ആര്.പി.പത്മനാഭന്, എം.ഹരിദാസ്, കെ.വിനീത, കെ.ഉമേശന് തുടങ്ങിയവര് പ്രസംഗിച്ചു.
