കോഴിക്കോട്: കക്കോടിയിലെ പൂവ്വത്തൂരില് പൊതുസ്ഥലത്ത് മദ്യപിച്ചെന്ന സംഭവത്തില് അന്വേഷിക്കാനെത്തിയ ചേവായൂര് എസ്.ഐ ഷാജഹാനടക്കമുളള സംഘത്തെ നാട്ടുകാരില് ഒരു വിഭാഗം ആക്രമിച്ചതുമായി ബന്ധപ്പെട്ട കേസന്വേഷണം ഊര്ജ്ജിതമാക്കി.
ഔദ്യോഗിക കൃത്യനിര്വ്വഹണത്തിന് തടസ്സം നില്ക്കല്, പൊലീസിനെ ആക്രമിക്കല്, കസ്റ്റഡിയിലെടുത്ത പ്രതികളെ രക്ഷപ്പെടുത്തി കൊണ്ടുപോകല് എന്നിങ്ങനെയുളള വകുപ്പുകളിലാണ് കേസ്. പ്രതികള് ഒളിവില് പോയിരിക്കുകയാണെന്ന് പൊലീസ് പറഞ്ഞു.
ചേവായൂര് സി.ഐ വി.ജോണാണ് അന്വേഷണത്തിന് നേതൃത്വം നല്കുന്നത്. മൂന്ന് സ്ത്രീകളെ പൊലീസ് മര്ദ്ദിച്ചെന്നാരോപിച്ച് പ്രദേശവാസികളായ മൂന്ന് പേര് ചേവായൂര് എസ്.ഐക്കും മറ്റ് പൊലീസുകാര്ക്കുമെതിരെ നോര്ത്ത് അസിസ്റ്റന്റ് കമ്മിഷണര്ക്ക് പരാതി നല്കിയിട്ടുണ്ട്. സ്ത്രീകള് ബീച്ച് ഗവണ്മെന്റ് ആശുപത്രിയില് ചികില്സ തേടിയിരുന്നു. ഈ സംഭവത്തിലും അന്വേഷണം തുടരുകയാണ്. പൊലീസിനെതിരായ കേസില് കഴമ്പില്ലെന്ന നിലപാടിലാണ് പൊലീസ്. കൗണ്ടര് കേസിന് വേണ്ടിയാണ് ഇവര് ആശുപത്രിയില് ചികില്സ തേടി പോയതെന്നും ഇവരെ പൊലീസ് ഒന്നും ചെയ്തിട്ടില്ലെന്നുമുളള നിലപാടിലാണ് പൊലീസ്. എന്നാല് പൊലീസിന്റെ വാദം തെറ്റാണെന്നും പൊലീസ് സ്ത്രീകളെ മര്ദ്ദിച്ചിട്ടുണ്ടെന്നുമാണ് പ്രദേശവാസികള് പറയുന്നത്. പൊലീസ് അതിക്രമം കാണിച്ചെന്ന പ്രദേശവാസികളുടെ പരാതിയില് സിറ്റി സ്പെഷല് ബ്രാഞ്ചും അന്വേഷണം തുടങ്ങി.
സംഭവത്തില് പൊലീസ് ആറ് പേര്ക്കെതിരെയാണ് കേസെടുത്തത്. സ്ഥലവാസികളായ സുനില്, രജില്, ഷാജി, റിജേഷ്, പ്രജി, മിറാസ് എന്നിവര്ക്കെതിരെയാണ് പ്രഥമ വിവര റിപ്പോര്ട്ട് തയ്യാറാക്കിയിട്ടുളളത്. കണ്ടാലറിയാവുന്ന 40 പേര്ക്കെതിരെയും കേസുണ്ട്.
