ന്യൂദല്ഹി: ദല്ഹിയില് മലയാളി വിദ്യാര്ത്ഥി രജത് മേനോനെ മര്ദ്ദിച്ചു കൊന്ന കേസിന്റെ അന്വേഷണ മേല്നോട്ടം പോലീസ് കമ്മീഷണര് അലോക് കുമാര് വര്മ്മ ഏറ്റെടുത്തു. കേന്ദ്ര ആഭ്യന്തരമന്ത്രി രാജ്നാഥ്സിങ്ങിന്റെ നിര്ദ്ദേശപ്രകാരമാണിത്. രാജ്നാഥ്സിങ്ങുമായി ബിജെപി ദേശീയ നിര്വാഹക സമിതിയംഗം പി.കെ. കൃഷ്ണദാസ് നടത്തിയ കൂടിക്കാഴ്ചയെ തുടര്ന്നാണ് തീരുമാനം.
രജതിന്റെ കുടുംബത്തിനാവശ്യമായ സുരക്ഷ ഏര്പ്പെടുത്തണമെന്ന് മന്ത്രി പോലീസ് കമ്മീഷണര്ക്ക് നിര്ദ്ദേശം നല്കി. ഇതിന്റെ അടിസ്ഥാനത്തില് കുടുംബത്തിന് പോലീസ് സംരക്ഷണത്തിന് ഉത്തരവിട്ടു. ലഹരി മാഫിയയുടെ അക്രമത്തിന് വേദിയായ മയൂര് വിഹാറില് ഉന്നത പോലീസ് ഉദ്യോഗസ്ഥരെത്തി ജനങ്ങളുമായി ചര്ച്ച നടത്തും.
ഇതിനായി ഡിസിപിയെ നിയോഗിച്ചു. ജനങ്ങളുടെ സുരക്ഷയ്ക്കാവശ്യമായ നടപടികള് ഡിസിപി സ്ഥലത്തെത്തി യോഗം വിളിച്ച് ചര്ച്ച ചെയ്ത് തീരുമാനിക്കണമെന്നും ആഭ്യന്തരമന്ത്രി നിര്ദ്ദേശിച്ചു.
ദല്ഹിയിലെ മലയാളി സമൂഹത്തിന്റെ സുരക്ഷിതത്വത്തിന് പ്രാധാന്യം നല്കുമെന്ന് രാജ്നാഥ്സിങ് ഉറപ്പുനല്കിയെന്ന് പി.കെ. കൃഷ്ണദാസ് പറഞ്ഞു. എന്. വേണുഗോപാല്, അഡ്വ. ജോജോ ജോസ് എന്നിവരും നിവേദക സംഘത്തിലുണ്ടായിരുന്നു. മയൂര് വിഹാറിലെ ലഹരിമാഫിയയെ അമര്ച്ച ചെയ്യണമെന്നാവശ്യപ്പെട്ട് പ്രൊഫ. റിച്ചാര്ഡ് ഹേ എംപി കേന്ദ്ര ആഭ്യന്തരമന്ത്രിക്ക് കത്തുനല്കി.
