പ്രധാനമ്രന്തി നരേന്ദ്ര മോദിക്കൊപ്പം സെല്ഫിയെടുക്കുന്ന ഇന്ത്യന് താരങ്ങള്
ന്യൂദൽഹി: റിയോ ഒളിമ്പിക്സിൽ രാജ്യത്തിന്റെ അഭിമാനമാകേണ്ട കായിക താരങ്ങൾക്ക് പ്രോത്സാഹനവും ആശംസയുമേകി പ്രധാനമന്ത്രി നരേന്ദ്ര മോദി. ഓരോരുത്തർക്കും അടുത്തെത്തി നേരിട്ടു തന്നെ കുശലം പറഞ്ഞു മോദി. നേട്ടങ്ങളുണ്ടാക്കി തിരിച്ചെത്തുമ്പോൾ പോലും അകറ്റി നിർത്തുന്നവരെ കണ്ട കായികതാരങ്ങൾക്ക് പ്രധാനമന്ത്രിയുടെ സമീപനം സമ്മാനിച്ചത് അത്ഭുതവും ആവേശവും.
ഇന്നലെ ന്യൂദൽഹിയിലെ മനേക്ഷാ സെന്ററിലായിരുന്നു റിയോ സംഘവുമായുള്ള പ്രധാനമന്ത്രിയുടെ കൂടിക്കാഴ്ച. താരങ്ങൾക്കൊപ്പം സെൽഫിയെടുക്കാനും മോദി നിന്നുകൊടുത്തു.
ഷൂട്ടിങ് താരങ്ങൾ ജിത്തു റായ്, മാനവ്ജിത് സിങ് സന്ധു, ഹീന സിദ്ധു, ബാഡ്മിന്റൺ താരങ്ങൾ പി.വി. സിന്ധു, കെ. ശ്രീകാന്ത്, ബോക്സിങ് താരം ശിവ ഥാപ്പ, അത്ലറ്റുകൾ സുധ സിങ്ങ്, ലളിത ബബ്ബർ തുടങ്ങിയ പ്രമുഖർ കൂടിക്കാഴ്ചയ്ക്കെത്തി. പരിശീലകരായ പി. ഗോപീചന്ദ്, ഗുർബത് സിങ് സന്ധു, വനിതാ ഹോക്കി ടീം കോച്ച് നീൽ ഹോവുഡ് തുടങ്ങിയവരും താരങ്ങൾക്കൊപ്പമുണ്ടായിരുന്നു.
കായികമന്ത്രി ജിതേന്ദ്ര സിങ്, കായിക സെക്രട്ടറി രാജീവ് യാദവ്, ദേശീയ കായിക കൗൺസിൽ അധ്യക്ഷൻ വിജയ് മൽഹോത്ര, ഇന്ത്യൻ ഒളിമ്പിക് അസോസിയേഷൻ അധ്യക്ഷൻ എൻ. രാമചന്ദ്രൻ, സെക്രട്ടറി ജനറൽ രാജീവ് മേത്ത, ഹോക്കി ഇന്ത്യ പ്രസിഡന്റ് നരീന്ദർ ബത്ര, സെക്രട്ടറി ജനറൽ മുഹമ്മദ് മുഷ്താഖ് അഹമ്മദ് തുടങ്ങിയവരും ചടങ്ങിനെത്തി.
