എടത്വാ: പെണ്മക്കളുമൊത്ത് വാടക ഷെഡ്ഡില് അന്തിയുറങ്ങുന്ന വിധവയായ ഷൈലമ്മയുടെ പുനരധിവാസ പദ്ധതിക്ക് ഫണ്ട് സമാഹരണം ആരംഭിച്ചു. തലവടി പുതുപ്പറമ്പ് പാരേത്തോട് പുളിക്കത്തറ പരേതനായ പ്രഹഌദന്റെ ഭാര്യ ഷൈലമ്മയാണ് രണ്ടു പെണ്മക്കളും ബാല്യം വിട്ടൊഴിയാത്ത മകനുമൊന്നിച്ച് അടച്ചുറപ്പില്ലാത്ത ഒറ്റമുറി വാടകഷെഡ്ഡില് പതിറ്റാണ്ടുകളായി അന്തിയുറങ്ങുന്നത്.
ഇവര് ഷൈലമ്മയുടെ സ്വദേശമായ തലവടിയിലെ പുന്നശ്ശേരി സൈനബ രവികുമാറിന്റെ ഉടമസ്ഥതയിലുള്ള ഒറ്റമുറി വാടകഷെഡ്ഡിലാണ് പത്തുവര്ഷമായി കഴിയുന്നത്. 2013 മെയ് പത്തിന് പ്രഹഌദന് ഹൃദയസ്തംഭനം മൂലം മരിച്ചു. വീട് ലഭിക്കുന്നതിനായി പലതവണ തലവടി ഗ്രാമപഞ്ചായത്ത് ഓഫീസില് അപേക്ഷ നല്കിയെങ്കിലും സ്വന്തമായി സ്ഥലം ഇല്ലാത്തതിനാല് ഇവരുടെ അപേക്ഷ നിരസിക്കപ്പെട്ടു. ഒബിസി വിഭാഗത്തില്പെട്ടവരായതിനാല് മൂന്ന് സെന്റ് കുടികിടപ്പവകാശം പോലും ലഭ്യമായില്ല.
ആലംബഹീനരായ ഈ കുടുംബത്തിന്റെ ദുരിതം പരിഹരിക്കാന് 11-ാം വാര്ഡ് മെമ്പര് അജിത്ത്കുമാര് പിഷാരത്ത് ഇടപെട്ട് പുനരധിവാസ പദ്ധതിക്കുള്ള നടപടി ആരംഭിച്ചു. ജില്ല പഞ്ചായത്ത് അംഗം ബിനു ഐസക് രാജു നടുവിലേപ്പറമ്പില് ജി.കെ. പിള്ളയുടെ കൈയ്യില് നിന്ന് ആദ്യഫണ്ട് ഏറ്റുവാങ്ങി സമാഹരണം ഉദ്ഘാടനം ചെയ്തു.
വാര്ഡംഗം അജിത്ത്കുമാര് പിഷാരത്ത് അദ്ധ്യക്ഷത വഹിച്ചു. മെമ്പര് പി.കെ. വര്ഗീസ്, ഗോപിനാഥ് ആനന്ദാലയം, തോമസുകുട്ടി ചാലുങ്കല്, വി. ദാമോദരന്, സജികുമാര്, ഗോപിനാഥ് പുത്തന്പറമ്പില് എന്നിവര് പ്രസംഗിച്ചു.
