ഇരിട്ടി: വിദ്യാര്ത്ഥിയെ പഠിപ്പിക്കുന്നവനല്ല വിദ്യാര്ത്ഥിയെ പഠിക്കുകയും അവനെ അവന്റെ അഭിരുചിക്കനുസരിച്ച് വളര്ത്തുന്നവനുമാവണം അദ്ധ്യാപകനെന്ന് പയ്യന്നൂര് മലയാള ഭാഷാ പാഠശാലാ ഡയരക്ടര് ടി.പി.ഭാസ്കരപ്പൊതുവാള് പറഞ്ഞു. ഇരിട്ടി നഗരസഭയും പുന്നാട് സ്റ്റേറ്റ് ബാങ്ക് ഓഫ് ട്രാവന്കൂര് നന്മ സോഷ്യല് സര്ക്കിളും സംയുക്തമായി നഗരസഭാ മേഖലയില് എസ്എസ്എല്സി, പ്ലസ് ടു പരീക്ഷകളില് ഉന്നതവിജയം നേടിയ വിദ്യാര്ഥികളെ അനുമോദിക്കുന്ന ചടങ്ങായ വിജയോത്സവം 2016 ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഇന്ന് വിദ്യാലയങ്ങളില് വിദ്യാര്ഥികള്ക്ക് വേണ്ടത് പത്തുശതമാനം പോലും പഠിപ്പിക്കുന്നില്ല. ഒരു വാക്കിനോട് നല്ല എന്ന വാക്ക് ചേര്ക്കുമ്പോഴാണ് ആ വാക്ക് അര്ത്ഥപൂര്ണ്ണമാവുന്നത്. നല്ല ഡോക്ടരാകണം, നല്ല എന്ജിനീയരാവണം നല്ല പൗരനാവണം എന്നുപറയുന്ന വിദ്യാര്ത്ഥിക്കേ നല്ല മകനും മകളും ആവാന് കഴിയൂ. അങ്ങനെ പറയാന് കഴിയാത്തവരാണ് തങ്ങളെ പോറ്റി വളര്ത്തുകയും പഠിപ്പിക്കുകയും ചെയ്ത ശേഷം തങ്ങളുടെ മാതാപിതാക്കളെ വൃദ്ധസദനങ്ങളിലെത്തിക്കുന്നത്. മുന്നിരയിലിരുന്ന് പഠിച്ചവനല്ല പിന്നിരയിലിരുന്നു പഠിച്ചവരാണ് പലപ്പോഴും ലോകത്തെ മാറ്റിമറിച്ചിട്ടുള്ളത്. അദ്ദേഹം പറഞ്ഞു.
ഇരിട്ടി ഫാല്ക്കന് പ്ലാസ ഹാളില് നടന്ന ചടങ്ങില് ഇരിട്ടി നഗരസഭാ ചെയര്മാന് പി.പി. അശോകന് അദ്ധ്യക്ഷത വഹിച്ചു. ഇരിട്ടി ഹയര്സെക്കന്ഡറി സ്കൂള് പ്രിന്സിപ്പാള് കെ.സുരേശന്, പ്രധാനാദ്ധ്യാപിക എന്.പ്രീത, മുന്സിപ്പല് വൈസ് ചെയര്പേഴ്സന് കെ.സരസ്വതി, മുന്സിപ്പല് കൗണ്സിലര്മാരായ പി.പി.ഉസ്മാന്, പി.എന്.രവീന്ദ്രന്, സി.മുഹമ്മദാലി, ഇന്ദുമതി, അബ്ദുള് റഹിമാന്, പി.കെ.ബള്ക്കീസ്, മര്ച്ചന്റ് അസ്സോസ്സിയേഷന് സെക്രട്ടറി പി.കെ. മുസ്തഫ ഹാജി തുടങ്ങിയവര് പ്രസംഗിച്ചു.
