ആലപ്പുഴ: ഭക്ഷ്യമന്ത്രി പി. തിലോത്തമനെ കാഴ്ചക്കാരനാക്കി അദ്ദേഹത്തിന്റെ വകുപ്പുമായി ബന്ധപ്പെട്ട് പൊതുമരാമത്ത് മന്ത്രി ജി. സുധാകരന് നയങ്ങള് പ്രഖ്യാപിക്കുന്നതില് സിപിഐക്ക് പ്രതിഷേധം. ജില്ലയില് നിന്ന് രണ്ടുമന്ത്രിമാര് മാത്രമേ ഉള്ളൂവെന്ന നിലയിലാണ് സിപിഎമ്മും സര്ക്കാര് സംവിധാനങ്ങളും ഈ സര്ക്കാരിന്റെ തുടക്കം മുതല്തന്നെ പ്രവര്ത്തിക്കുന്നത്.
സിപിഐയെ ബോധപൂര്വ്വം കൊച്ചാക്കുന്ന സമീപനമാണ് കാലങ്ങളായി സിപിഎം സ്വീകരിക്കുന്നത്. ഇതിനിടെയാണ് പതിറ്റാണ്ടുകല്ക്കുശേഷം ജില്ലയിലെ സിപിഐക്ക് ഒരു മന്ത്രിസ്ഥാനം ലഭിക്കുന്നത്. പക്ഷേ ഇക്കാര്യം സിപിഎമ്മോ അവരുടെ മന്ത്രിമാരോ അംഗീകരിക്കാന് തയ്യാറാകുന്നില്ല എന്നു വ്യക്തമാക്കുന്നതാണ് അടുത്തിടെയായി നടക്കുന്ന സംഭവങ്ങള്.
ഇതില് ഒടുവിലത്തേതാണ് സപ്ലൈകോയുടെ റംസാന് ചന്തയുടെ ഉദ്ഘാടന ചടങ്ങിലെ സുധാകരന്റെ പ്രകടനമെന്നാണഅ സിപിഐക്കാര് കുറ്റപ്പെടുത്തുന്നത്. സപ്ലൈക്കോയില് നിന്നുള്ള സബ്സിഡി സാധനങ്ങള്ക്ക് 2021 വരെ വിലകൂട്ടില്ലെന്ന് വകുപ്പുമന്ത്രിയായ തിലോത്തമനെ സാക്ഷിയാക്കി പ്രഖ്യാപിച്ച കയ്യടി നേടിയത് ജി. സുധാകരനായിരുന്നു. യഥാര്ത്ഥത്തില് സ്വന്തം വകുപ്പുമായി ബന്ധപ്പെട്ട് ഇത്രയും പ്രാധാന്യമുള്ള തീരുമാനം പൊതുജനങ്ങളെ അറിയിക്കേണ്ട ഉത്തരവാദിത്വം തിലോത്തമനായിരുന്നു. സിപിഐ ജില്ലാ സെക്രട്ടറി ടി.ജെ. ആഞ്ചലോസ് അടക്കമുള്ളവരെ സാക്ഷിയാക്കിയായിരുന്നു ഭക്ഷ്യവകുപ്പിന്റെ തീരുമാനങ്ങള് ഭക്ഷ്യമന്ത്രിയെ കാഴ്ചക്കാരനാക്കി പൊതുമരാമത്ത് മന്ത്രി പ്രഖ്യാപിച്ചത്.
സിപിഐയോ മന്ത്രിയോ ഇക്കാര്യത്തില് പരസ്യമായ പ്രതിഷഏധം ഉയര്ത്തിയില്ല. എന്നാല് പ്രാദേശിക നേതാക്കളിലും അണികളിലും അമര്ഷം ശക്തമാണ്. സിപിഎം തുടരുന്ന വല്യേട്ടന് മനോഭാവത്തിനെതിരെ ശക്തമായി പ്രതികരിക്കാന് സിപിഐ ജില്ലാ നേതൃത്വം തയ്യാറാകണമെന്നാണ് ഇവര് ആവശ്യപ്പെടുന്നത്. കഴിഞ്ഞ നിയമസഭാ തെരഞ്ഞെടുപ്പില് സിപിഐ മത്സരിച്ച മണ്ഡലങ്ങളില് സിപിഎം സ്വീകരിച്ച നിലപാട് മറക്കരുതെന്നും അവര് ഓര്മ്മിപ്പിക്കുന്നു.
