കണ്ണൂര്‍: പള്ളിക്കുന്ന് രാധാവിലാസം യുപി സ്‌കൂളിലും തിലാന്നൂര്‍ യുപി സ്‌കൂളിലും സ്മാര്‍ട്ട് ക്ലാസ് റൂമിന്റെ ഉദ്ഘാടനം പ്രൊഫ.റിച്ചാര്‍ഡ് ഹെ എംപി നിര്‍വ്വഹിച്ചു. റിച്ചാര്‍ഡ് ഹെയുടെ എംപി ഫണ്ടുപയോഗിച്ചാണ് രണ്ട് സ്‌കൂളുകളിലും സ്മാര്‍ട്ട് ക്ലാസ് റൂം, മള്‍ട്ടിവിഷന്‍ തിയറ്റര്‍, സൗണ്ട് സിസ്റ്റം, ഇന്ററാക്ടീവ് വൈറ്റ് ബോര്‍ഡ്, മള്‍ട്ടി മീഡിയ തിയറ്റര്‍ തുടങ്ങിയവ ആരംഭിച്ചത്. അറിവിന്റെ അനന്തസാധ്യതകള്‍ പുതുതലമുറക്ക് പകര്‍ന്ന് നല്‍കുന്നതിനുവേണ്ടിയാണ് മോദി സര്‍ക്കാര്‍ സ്മാര്‍ട്ട് ക്ലാസ് റൂം പദ്ധതികള്‍ ആരംഭിച്ചത്. രാജ്യത്തിന്റെ വിവിധ ഭാഗങ്ങളിലെ സ്‌കൂള്‍ വിദ്യാര്‍ത്ഥികളാണ് ഇതിന്റെ ഗുണഭോക്താക്കള്‍.
സമൂഹത്തിലെ അറിവിന്റെ നൂതന ചക്രവാളങ്ങള്‍ തുറക്കാന്‍ പുതിയ സ്മാര്‍ട്ട് ക്ലാസ് റൂമുകള്‍കൊണ്ട് സാധിക്കണമെന്ന് പള്ളിക്കുന്ന് രാധാവിലാസം യുപി സ്‌കൂളില്‍ പുതിയ കെട്ടിടത്തിന്റെയും സ്മാര്‍ട്ട് ക്ലാസ്‌റൂമിന്റെയും ഉദ്ഘാടനം നിര്‍വ്വഹിച്ച് കൊണ്ട് റിച്ചാര്‍ഡ് ഹെ എംപി പറഞ്ഞു. അറിവിന്റെ അനന്തവിഹായസ്സില്‍ നിന്ന് സാമ്പത്തികമായി പിന്നോക്കം നില്‍ക്കുന്ന വിദ്യാര്‍ത്ഥികള്‍ മാറ്റി നിര്‍ത്തപ്പെടരുത്. അവര്‍ക്ക് കൂടി ഗുണകരമായ രീതിയില്‍ ഈ പദ്ധതി നമുക്ക് ഉപയോഗിക്കാന്‍ സാധിക്കണം. ആഴ്ചയിലൊരു ദിവസമെങ്കിലും മറ്റ് സ്‌കൂളുകളിലെ വിദ്യാര്‍ത്ഥികള്‍ക്ക് ഇതിന്റെ ഗുണം ലഭിക്കണം. അറിവ് പകര്‍ന്ന് നല്‍കുന്നതില്‍ നാം വേര്‍തിരിവ് കാണിക്കരുതെന്നും അദ്ദേഹം പറഞ്ഞു. വിദ്യാര്‍ത്ഥികളെ അധ്യാപകര്‍ സ്വന്തം മക്കളെ പോലെ കരുതലോടെയും സ്‌നേഹത്തോടെയും പഠിപ്പിക്കണം. സമൂഹത്തില്‍ ഹിതകരമായ മാറ്റം വരുത്താന്‍ സല്‍സ്വഭാവികളായ പൗരന്‍മാരെ വളര്‍ത്തിയെടുക്കാന്‍ നല്ല അധ്യാപകര്‍ക്ക് മാത്രമേ സാധിക്കുകയുള്ളു എന്നും റിച്ചാര്‍ഡ് ഹെ പറഞ്ഞു. സ്‌കൂള്‍ മാനേജര്‍ രവീന്ദ്രനാഥ് ചേലേരി അധ്യക്ഷത വഹിച്ചു. പാപ്പിനിശ്ശേരി ഉപജില്ല എഇഒ കെ.വി.സുരേന്ദ്രന്‍, കൗണ്‍സിലര്‍ ടി.കെ.വസന്ത, പിടിഎ പ്രസിഡണ്ട് ടി.ജയപ്രകാശ്, മദര്‍ പിടിഎ പ്രസിഡണ്ട് കെ.ദീപ കൃഷ്ണന്‍ തുടങ്ങിയവര്‍ സംസാരിച്ചു. പ്രധാനാധ്യാപിക കെ.പി.രാജശ്രീ സ്വാഗതവും സ്റ്റാഫ് സെക്രട്ടറി യു.കെ.ദിവാകരന്‍ നന്ദിയും പറഞ്ഞു.
തിലാന്നൂര്‍ യുപി സ്‌കൂളില്‍ മള്‍ട്ടി വിഷന്‍ തിയറ്റര്‍ കണ്ണൂര്‍ കോര്‍പറേഷന്‍ മേയര്‍ ഇ.പി.ലത ഉദ്ഘാടനം ചെയ്തു. കോര്‍പറേഷന്‍ വിദ്യാഭ്യാസ സ്റ്റാന്റിംഗ് കമ്മറ്റി ചെയര്‍പേഴ്‌സണ്‍ ഷാഹിന മൊയ്തീന്‍ എന്റോവ്‌മെന്റ് വിതരണം ചെയ്തു. കണ്ണൂര്‍ ഡയറ്റ് ഫാക്കല്‍റ്റി കെ.ആര്‍.അശോകന്‍, കണ്ണൂര്‍ നോര്‍ത്ത് എസ്എസ്എ ബിപിഒ കെ.സി.ശ്രീജിത്, സ്‌കൂള്‍ സ്റ്റാഫ് സെക്രട്ടറി വി.അരവിന്ദാക്ഷന്‍ തുടങ്ങിയവര്‍ സംസാരിച്ചു. കണ്ണൂര്‍ കോര്‍പറേഷന്‍ കൗണ്‍സിലര്‍ എം.രാജീവന്‍ അധ്യക്ഷത വഹിച്ചു. സ്‌കൂള്‍ പ്രധാനാധ്യാപിക എം.പി.പത്മജ സ്വാഗതവും മള്‍ട്ടി വിഷന്‍ തിയറ്റര്‍ കണ്‍വീനര്‍ രാജിത്ത് കുളവയല്‍ നന്ദിയും പറഞ്ഞു.
