ലോകബാങ്ക് മേധാവി ജിം യോങ്ങ് കിങ് ന്യൂദല്ഹിയില് പ്രധാനമന്ത്രി നരേന്ദ്ര മോദിയെ സന്ദര്ശിച്ചപ്പോള്
ന്യൂദല്ഹി: നരേന്ദ്ര മോദി സര്ക്കാരിന്റെ സുപ്രധാന പരിപാടികളില് ഒന്നായ സൗരോര്ജ്ജ പദ്ധതിയില് ലോകബാങ്ക് നൂറുകോടി നിക്ഷേപിക്കും. മോദിയുമായുള്ള ചര്ച്ചയില് ലോകബാങ്ക് മേധാവി ജിം യോങ്ങ് കിങ് വാഗ്ദാനം ചെയ്തതാണിത്.
ഭാരതത്തിന്റെ സൗരോര്ജ്ജ ഉല്പ്പാദനം വര്ദ്ധിപ്പിക്കാനാണിതെന്ന് കിങ്ങ് പറഞ്ഞു. ഏതെങ്കിലും ഒരു രാജ്യത്ത് സോളാര് പദ്ധതികള്ക്ക് ലോകബാങ്ക് ഇത്രയേറെ മുതല്മുടക്കിന് തയ്യാറാകുന്നത് ഇതാദ്യമാണ്. ഇതിനു പുറമേ ഭാരതത്തിന്റെ നേതൃത്വത്തിലുള്ള അന്താരാഷ്ട്ര സൗര സഖ്യവുമായി സഹകരിക്കാനുള്ള കരാറിലും കിങ്ങ് ഒപ്പുവച്ചു. 121 രാജ്യങ്ങള് അംഗമായ സൗരസഖ്യത്തിന്റെ സോളാര് പദ്ധതിയില് 2030നകം നൂറു ലക്ഷം ഡോളര് മുതല് മുടക്കാനുള്ളതാണ് കരാര്. ധനമന്ത്രി അരുണ് ജെയ്റ്റ്ലി, ഊര്ജ്ജ മന്ത്രി പീയൂഷ് ഗോയല് എന്നിവരും ചടങ്ങില് പങ്കെടുത്തു.
ഭാരതത്തിന്റെ സൗരോര്ജ്ജ ഉല്പ്പാദനം വര്ദ്ധിപ്പിക്കാനുള്ള പദ്ധതിയില് പലതരത്തിലാകും ലോകബാങ്ക് സഹകരിക്കുക. മേല്ക്കൂരകളില് സൗരപാനലുകള് സ്ഥാപിക്കുക, സോളാര് പാര്ക്കുകള്ക്കുള്ള അടിസ്ഥാന സൗകര്യങ്ങള് ഒരുക്കി നല്കുക, സൗര സങ്കേതികവിദ്യ വിപണിയില് എത്തിക്കുക, ധാരാളം സോളാര് വൈദ്യുതിയുള്ള സംസ്ഥാനങ്ങളില് നിന്ന് പ്രസരണ ലൈനുകള് വലിക്കുക തുടങ്ങിയ കാര്യങ്ങളിലാകും ലോകബാങ്ക് സഹകരിക്കുന്നത്. ഗ്രിഡുമായി ബന്ധപ്പെടുത്തിയ മേല്ക്കൂര സോളാര് പദ്ധതിക്ക് 6250 ലക്ഷം ഡോളറിന്റെ കരാറും ഒപ്പിട്ടു.
നാനൂറ് മെഗാവാട്ട് സോളാര് പ്ളാന്റുകള് സ്ഥാപിക്കാനാകും ലോകബാങ്ക് സഹായം നല്കുക. സൗരോര്ജ്ജം മൂന്നിരട്ടിയാക്കാനുള്ള പദ്ധതി ഭാരതത്തില് വലിയ പരിവര്ത്തനമുണ്ടാക്കുമെന്ന് കിങ്ങ് പറഞ്ഞു. ഭാരതത്തിന്റെ പദ്ധതികളെ ഞങ്ങള് കഴിയുന്നത്ര പിന്തുണയ്ക്കും. അദ്ദേഹം പറഞ്ഞു.
