കണ്ണൂര്: മുസ്ലീം ലീഗ് പ്രവര്ത്തകനായിരുന്ന അരിയില് അബ്ദുള് ഷുക്കൂര് വധക്കേസ് അട്ടിമറിക്കാനുള്ള സര്ക്കാര് ശ്രമത്തിനെതിരെ ഗവര്ണ്ണര് ഇടപെടണമെന്നാവശ്യപ്പെട്ട് ഷുക്കൂറിന്റെ മാതാവ് പി.സി.ആത്തിക്ക കത്തയച്ചു. സംസ്ഥാന സര്ക്കാറിന്റെ നിയമ ഉപദേശകനായ എം.കെ.ദാമോദരന് പ്രതികള്ക്കായി ഹൈക്കോടതിയില് ഹാജരായത് പ്രതികളെ രക്ഷിക്കാനുള്ള സര്ക്കാര് ശ്രമത്തിന്റെ ഭാഗമാണെന്നും വിഷയത്തില് ഇടപെടണമെന്നും ഗവര്ണ്ണര് ജസ്റ്റിസ് പി.സദാശിവത്തിനയച്ച കത്തില് പറയുന്നു.
അഡ്വക്കേറ്റ് ജനറലും ഹൈക്കോടതിയില് പ്രതികള്ക്ക് അനുകൂലമായ നിലപാട് സ്വീകരിച്ചത് കേസ് അട്ടിമറിക്കാനുള്ള സര്ക്കാര് ഗൂഢാലോചനയാണെന്ന് സംശയിക്കുന്നു. മകനെ വെട്ടിക്കൊന്ന കേസില് എംഎല്എയും പ്രമുഖ നേതാവും ഉള്പ്പെട്ടതിനാല് സര്ക്കാര് കേസ് അട്ടിമറിക്കാനുള്ള ശ്രമമാണ് നടത്തുന്നത്. തനിക്കും കുടുംബത്തിനും നീതി ലഭ്യമാക്കാന് ഗവര്ണ്ണര് നേരിട്ട് ഇടപെടണമെന്ന് കത്തില് ആവശ്യപ്പെട്ടു.
അരിയില് ഷൂക്കൂര് കേസ് സിബിഐ അന്വേഷിക്കണമെന്ന ഹൈക്കോടതി സിംഗിള് ബെഞ്ച് ഉത്തരവിനെതിരെ സിപിഎം ജില്ലാ സെക്രട്ടറി പി.ജയരാജനും ടി.വി.രാജേഷ് എംഎല്എയും നല്കിയ ഹരജിയില് ഹൈക്കോടതിയില് വാദം തുടരുകയാണ്. 2012 ഫെബ്രുവരി 20നാണ് കണ്ണപുരം കീഴറയിലെ വെള്ളുവന്ക്കടവില് ഷുക്കൂര് കൊല്ലപ്പെട്ടത്. സിപിഎം ജില്ലാ സെക്രട്ടറി പി.ജയരാജന് സഞ്ചരിച്ച വാഹനവ്യൂഹത്തെ അരിയിലില് വെച്ച് ആക്രമിക്കപ്പെട്ടതിന് മണിക്കൂറുകള്ക്കകമാണ് ഷുക്കൂര് കൊല്ലപ്പെട്ടത്.
