പാരീസ്: ഫ്രഞ്ച് ചാമ്പ്യന്മാരായ പാരീസ് സെന്റ് ജര്മ്മനെ പരിശീലിപ്പിക്കാന് ഉനെയ് എംറി. നിലവിലെ പരിശീലകനായിരുന്ന ലോറന്റ് ബ്ലാങ്ക് രാജിവെച്ചതിനെ തുടര്ന്നാണ് എംറിയെ പരിശീലകനായി ക്ലബ് അധികൃതര് നിയമിച്ചത്. സ്പാനിഷ് ക്ലബ് സെവിയയില് നിന്നാണ് എംറി പാരീസിലേക്കെത്തുന്നത്.
സെവിയക്ക് തുടര്ച്ചയായി മൂന്നുതവണ യൂറോപ്പ ലീഗ് കിരീടം നേടിക്കൊടുത്ത പരിശീലകനെന്ന ബഹുമതിയുമായാണ് എംറി ബ്ലാങ്കിന്റെ പകരക്കാരനായി വരുന്നത്. സെവിയയിലെത്തുന്നതിന് മുന്പ് സ്പാര്ട്ടക് മോസ്കോ, വലന്സിയ, അല്മേറിയ തുടങ്ങിയ ടീമുകളെയും എംറി പരിശീലിപ്പിച്ചു. എംറിയുടെ കീഴില് പരിശീലനം നേടിയ സെവിയ കളിക്കാനിറങ്ങിയ 205 കളികളില് 107 എണ്ണം വിജയിക്കാന് കഴിഞ്ഞിരുന്നു.
അതേസമയം എംറിയുടെ ഒഴിവില് സെവിയയെ പരിശീലിപ്പിക്കാനായി എത്തുന്നത് ചില്ലറക്കാരനല്ല. ചരിത്രത്തിലാദ്യമായി ചിലിക്ക് കോപ്പ അമേരിക്ക കിരീടം നേടിക്കൊടുത്ത ജോര്ജെ സാംപോളിയാണ് ടീമിന്റെ പുതിയ പരിശീലകന്. 2015ലെ ടൂര്ണമെന്റിലായിരുന്നു ചിലിയുടെ നേട്ടം. രണ്ട് വര്ഷത്തെ കരാറാണ് സാംപോളിയുമായി ടീം ഒപ്പിട്ടത്. ആദ്യമായാണ് സാംപോളി ഒരു യൂറോപ്യന് ക്ലബിനെ പരിശീലിപ്പിക്കാനൊരുങ്ങുന്നത്. എങ്കിലും മികച്ച ആത്മവിശ്വാസത്തിലാണ് 56കാരനായ സാംപോളി.
കഴിഞ്ഞ ജനുവരിയിലാണ് സാംപോളി ചിലിയുടെ കോച്ച് സ്ഥാനത്തുനിന്ന് രാജിവച്ചത്.
കഴിഞ്ഞ വര്ഷം ലോകത്തെ ഏറ്റവും മികച്ച പരിശീലകനുള്ള മത്സരത്തില് ലൂയി എന്റിക്വെയ്ക്ക് തൊട്ട് പിന്നില് എത്തിയിരുന്നു സാംപോളി. ബാഴ്സലോണ, റയല് മാഡ്രിഡ്, അത്ലറ്റികോ തുടങ്ങിയ വമ്പന്മാരെ മറികടക്കാനുള്ള കരുത്ത് ടീമിന് ഉണ്ടാക്കിനല്കുക എന്നതാണ് സാംപോളിയുടെ വെല്ലുവിളി.
