ചെന്നൈ: ഭക്ഷണം ജൈവ വസ്തുക്കള്കൊണ്ടാകണമെന്ന ആഗ്രഹം വ്യാപകമാകുമ്പോള് ഇതാ ഞെട്ടിയ്ക്കുന്ന മറ്റൊരു വാര്ത്ത. നാം ഇന്നുപയോഗിക്കുന്ന ഭക്ഷ്യവസ്തുക്കളില് മിക്കതിന്റെയും ജന്മദേശം വിദേശങ്ങളിലാണ്. അതേ സമയം, നമ്മുടെ നാടന് വിഭവങ്ങള് നമ്മുടെ നിത്യജീവിതശീലത്തില് ഏതാണെന്ന് സ്വയം തിരിച്ചറിയാന് കഴിയാത്ത സ്ഥിതി വിശേഷവും. ഗോതമ്പും ഉരുളക്കിഴങ്ങും മുതല് ആപ്പിള് വരെയുളള ഭക്ഷ്യവസ്തുക്കളിലേറെയും നമ്മുടെ സ്വന്തമെന്ന മട്ടിലാണ് നമ്മുടെ ഉപയോഗം.
എന്നാല്, ഇവ ഇപ്പോള് മാര്ക്കറ്റിലെത്തുന്നത് വിദേശത്ത് നിന്നാണെന്നുമാത്രമല്ല, അവയുടെ ജന്മദേശവും വിദേശങ്ങളാണ്. ഏറെ ചര്ച്ചകള്ക്കും തര്ക്കങ്ങള്ക്കും ഇട നല്കുന്ന ഈ വെളിപ്പെടുത്തല് രാജ്യന്തര ശാസ്ത്രജ്ഞന്മാര് നടത്തിയ ഒരു പഠനത്തെ അടിസ്ഥാനമാക്കിയാണ്. ഭാരതത്തിലുപയോഗിക്കുന്ന പച്ചക്കറികളിലും പഴങ്ങളിലും ഭക്ഷ്യധാന്യങ്ങളിലും മൂന്നിലൊന്നും വിദേശരാജ്യങ്ങളില് നിന്നെത്തിയവയാണ്.
നമ്മുടെ ശരീരത്തിലെത്തുന്ന ഊര്ജ്ജത്തിന്റെ 45ശതമാനവും വിദേശ ഉത്പന്നങ്ങളില് നിന്നുളളവയാണെന്നും അടുത്തിടെ പുറത്ത് വന്ന ഒരു പഠനം വ്യക്തമാക്കുന്നു.
ആഗോളതലത്തില് 66ശതമാനം കലോറിയും എത്തുന്നത് വിദേശ ഭക്ഷ്യവസ്തുക്കളില് നിന്നാണ്. രാജ്യാന്തര ശാസ്ത്രജ്ഞന്മാരുടെ ഒരുസംഘമാണ് ഇതേക്കുറിച്ചുളള പഠനം നടത്തിയത്. 177 രാജ്യങ്ങളിലെ 132 തരം പഴങ്ങളെയും പച്ചക്കറികളെയും പഠന വിധേയമാക്കി. എല്ലാ ഭക്ഷ്യവിഭവങ്ങളും എവിടെ നിന്നാണ് വരുന്നതെന്നറിയാന് ഇവയുടെ കഴിഞ്ഞ നൂറ് വര്ഷത്തെ ചരിത്ര-ഭാഷാ, ജനിതക ഘടകങ്ങള് പരിശോധിച്ചതായും പഠനത്തിന് നേതൃത്വം നല്കിയ കോളിന് ഖോരി പറഞ്ഞു. മുന്പ് ശാസ്ത്രജ്ഞര് ചെയ്തിട്ടില്ലാത്ത രീതികളാണ് തങ്ങള് അവലംബിച്ചതെന്നും അദ്ദേഹം വ്യക്തമാക്കി.
ഭാരത ഉപഭൂഖണ്ഡത്തില് വൈവിധ്യമാര്ന്ന അരികളും മറ്റ് ധാന്യങ്ങളുമുണ്ട്. ഇവയ്ക്ക് പുറമെ കരിമ്പ്, ഏത്തപ്പഴം, മാങ്ങ, നാരങ്ങ, വിവിധ കിഴങ്ങുകള് എന്നിവയും ഇവിടെ ലഭ്യമാണ്. എന്നാല് നമ്മുടെ രാജ്യത്തെ സാധാരണ ഭക്ഷ്യവിഭവങ്ങളില് ഉള്പ്പെട്ടിട്ടുളള പലതും നമ്മുടെ രാജ്യത്ത് ഉണ്ടായിട്ടുളളതല്ലെന്നും പഠനം ചൂണ്ടിക്കാട്ടുന്നു.
ഉദാഹരണത്തിന് ഉള്ളി, ഇത് പശ്ചിമ ഏഷ്യയില് നിന്ന് വന്നതാണ്. ഉരുളക്കിഴങ്ങും തക്കാളിയും മറ്റും ദക്ഷിണ അമേരിക്കയിലെ ആന്ഡിയന് മേഖലയില് നിന്ന് വന്നതാണ്. മുളകാകട്ടെ മധ്യഅമേരിക്കയില് നിന്നാണ് എത്തിയത്. കടുകും മറ്റും മെഡിറ്ററേനിയനില് നിന്നാണ് വന്നത്. വെളുത്തുളളിയും ആപ്പിളും മധ്യ അമേരിക്കയില് നിന്നും ഗോതമ്പ് പശ്ചിമേഷ്യയില് നിന്നുമാണ് ആയിരക്കണക്കിന് വര്ഷങ്ങള്ക്ക് മുമ്പ് ഭാരതത്തിലെത്തിയത്.
നൂറ്റാണ്ടുകള്ക്ക് മുമ്പ് നടന്ന കുടിയേറ്റങ്ങളിലൂടെയാണ് ഇവയും നമ്മുടെ നാട്ടിലെത്തിച്ചേരുകയും നമ്മുടെ ജീവിതത്തിന്റെ ഭാഗമാകുകയും ചെയ്തത്. ഇതിന് പുറമെ വാണിജ്യബന്ധങ്ങളിലൂടെയും ഇവയില് പലതും നമ്മുടെ നാട്ടിലെത്തി. 23 പ്രദേശങ്ങളിലായി വിവിധതരം ഭക്ഷ്യവിഭവങ്ങള് വ്യാപിച്ച് കിടക്കുന്നു. എന്നാല് ഇവയെല്ലാം തന്നെ ഇന്ന് ലോകത്തെല്ലായിടത്തും തന്നെ ഉത്പാദിപ്പിക്കപ്പെടുന്നുവെന്നാണ് ശാസ്ത്രസംഘം കണ്ടെത്തിയിട്ടുളളത്.
മധ്യ അമേരിക്കയില് ഉത്ഭവിച്ച ആപ്പിള് ഇന്ന് ലോകത്ത് ഏതാണ്ട് എല്ലായിടത്തും തന്നെ ഉത്പാദിപ്പിക്കപ്പെടുന്നു. ഇവയില് പക്ഷേ വന്തോതില് ജനിതക വ്യതിയാനം ഉണ്ടായിട്ടുണ്ട്. ഇതുതന്നെയാണ് എണ്ണപ്പനയുടെ കാര്യത്തിലും സംഭവിച്ചിട്ടുളളത്. ഇന്നുളള എണ്ണപ്പനകളിലേറെയും പാശ്ചാത്യ, മധ്യആഫ്രിക്കന്, നിയോ ട്രോപ്പിക്കല് ജനിതക വൈവിധ്യമുളളതാണ്. പുതിയതരം ഭക്ഷ്യവിഭവങ്ങളുടെ ഉത്പാദനം അത്ര കഠിനമല്ലെന്നും പഠനസംഘം ചൂണ്ടിക്കാട്ടുന്നു.
