ചങ്ങനാശേരി: മാനവസേവ മാധവസേവ എന്ന തത്വചിന്ത ജീവിതത്തില്‍ പകര്‍ത്തിയ സന്യാസിശ്രേഷ്ഠനായിരുന്നു സ്വാമി ആതുരദാസെന്ന് ക്‌നാനായ മെത്രാപ്പോലീത്ത കുര്യാക്കോസ് മോര്‍ സേവേറിയോസ് അഭിപ്രായപ്പെട്ടു.
സ്വാമി ആതുരദാസിന്റെ 103-ാമത് ജയന്തി ആഘോഷത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. ആത്മസമര്‍പ്പണവും സ്വന്തം സമ്പാദ്യവും സമൂഹത്തിന്റെ നന്മക്കായി നല്‍കിയ വിശാലഹൃദയനായിരുന്നു സ്വാമി ആതുരദാസ്. ഈ കാലഘട്ടത്തില്‍ സ്വാമികളുടെ ആദര്‍ശങ്ങള്‍ക്ക് പ്രസക്തിയേറി വരികയാണെന്നും അദ്ദേഹം കൂട്ടിച്ചേര്‍ത്തു. അദ്ധ്യാത്മികതയ്‌ക്കും സന്യാസത്തിനും പുതിയമുഖം നല്‍കിയ മഹാത്മാവാണ് സ്വാമി ആതുരദാസെന്നും മനുഷ്യരെ സ്‌നേഹിക്കുക എന്നതായിരുന്നു അദ്ദേഹത്തിന്റെ വിശ്വാസപ്രമാണമെന്നും സി.എഫ്.തോമസ് എംഎല്‍എ പറഞ്ഞു. ജയന്തി ആഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ജനങ്ങളെ തന്റെ പ്രവര്‍ത്തനങ്ങളിലൂടെയും സംഭാഷണങ്ങളിലൂടെയും സ്വാമി സ്വാധീനിച്ചു. സാധാരണക്കാരുടെയും പാര്‍ശ്വവത്ക്കരിക്കപ്പെട്ടവരുടെയും ആവശ്യങ്ങളില്‍ ഇടപെട്ടുകൊണ്ട് സ്വാമി തന്റെ ജീവിതത്തിലൂടെ വലിയ സന്ദേശമാണ് സമൂഹത്തിന് നല്‍കിയത്. തന്റെ കര്‍മ്മരംഗത്തിലൂടെ ഹോമിയോ ചികിത്സാശാഖയെ അദ്ദേഹം വിപുലമാക്കി. ഹോമിയോ കോളേജിന്റെ ആസ്ഥാനം കുറിച്ചിയിലെത്തിയത് അദ്ദേഹത്തിന്റെ പ്രവര്‍ത്തന മികവിന് തെളിവാണെന്നും സി.എഫ് തോമസ് കൂട്ടിച്ചേര്‍ത്തു.
;മുന്‍ തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് അഡ്വ.എം.പി.ഗോവിന്ദന്‍ നായര്‍ അനുസ്മരണ പ്രഭാഷണം നടത്തി. കുറിച്ചി പഞ്ചായത്ത് പ്രസിഡന്റ് ആര്‍.രാജഗോപാല്‍, സി.കെ.ശശീന്ദ്രന്‍, ഡോ.വേണുഗോപാല്‍, ഡോ.ഇ.കെ.വിജയകുമാര്‍ തുടങ്ങിയവര്‍ സംസാരിച്ചു. ആതുരസേവാസംഘം പ്രസിഡന്റ് പി.ഗോപാലകൃഷണന്‍ നായര്‍ അദ്ധ്യക്ഷത വഹിച്ചു.
