ന്യൂദല്ഹി: രഘുറാം രാജന് പോയെന്നും ഇനി തന്റെ ലക്ഷ്യം അരവിന്ദ് കേജ്രിവാളാണെന്നും ബിജെപി നേതാവ് ഡോ. സുബ്രഹ്മണ്യന് സ്വാമി. ദല്ഹി മുഖ്യമന്ത്രി കേജ്രിവാളിന്റെ വസതിക്ക് മുന്നില് ബിജെപി എംപി മഹേഷ് ഗിരി നടത്തുന്ന നിരാഹാര സമരത്തില് പങ്കെടുക്കാനെത്തിയതായിരുന്നു സ്വാമി.
റിസര്വ് ബാങ്ക് ഗവര്ണ്ണര് സ്ഥാനത്ത് രഘുറാം രാജന് രണ്ടാം അവസരം നല്കരുതെന്നാവശ്യപ്പെട്ട് ശക്തമായി രംഗത്തെത്തിയത് സുബ്രഹ്മണ്യന് സ്വാമിയായിരുന്നു. ഭാരതത്തിന്റെ സുപ്രധാന സാമ്പത്തിക നടപടികളും തീരുമാനങ്ങളും രഘുറാം രാജന് അമേരിക്കയ്ക്ക് ചോര്ത്തികൊടുത്തെന്ന് സ്വാമി ആരോപിച്ചിരുന്നു.
നിരവധി ആരോപണങ്ങള് ഉയര്ന്നതോടെ വരുന്ന സപ്തംബറില് തന്നെ വിരമിക്കുമെന്ന് രഘുറാം രാജന് അറിയിച്ചിരുന്നു. കേജ്രിവാളിന്റെ ജീവിതകാലം മുഴുവനും അയാള് തട്ടിപ്പുകാരനായാണ് തുടരുന്നത്. ഐഐടിയില് മെറിറ്റില് പ്രവേശനം നേടിയ ആളാണ് കെജ്രിവാളെന്നാണ് അയാളുടെ അവകാശവാദം. എന്നാല് എങ്ങനെയാണ് കെജ്രിവാള് പ്രവേശനം നേടിയതെന്നതിന്റെ രേഖകള് തന്റെ കൈവശമുണ്ട്.
ഇനി താന് കേജ്രിവാളിന്റെ പിന്നാലെയുണ്ട്, സ്വാമി പറഞ്ഞു. ദല്ഹിയില് ഒരു ഉദ്യോഗസ്ഥന്റെ കൊലപാതകത്തില് മഹേഷ് ഗിരി എംപിക്ക് പങ്കുണ്ടെന്ന് കെജ്രിവാള് കഴിഞ്ഞ ദിവസം ആരോപണം ഉന്നയിച്ചിരുന്നു. ഇതേ തുടര്ന്ന് കേജ്രിവാള് പരസ്യമായി മാപ്പുപറയണമെന്നാവശ്യപ്പെട്ട് മഹേഷ് ഗിരി മുഖ്യമന്ത്രിയുടെ വസതിക്ക് മുന്നില് നിരാഹാര സമരം പ്രഖ്യാപിക്കുകയായിരുന്നു.
