സിംല: സിംലയിലെ ഛറബ്രയില് പ്രിയങ്കാ വാദ്ര ബംഗ്ലാവ് പണിയുന്നത് വിവാദത്തില്. ഹിമാലയ ഗിരിനിരകള്ക്കു സമീപം വനമേഖലയില്, രാഷ്ട്രപതിയുടെ അവധിക്കാല വസതിക്കടുത്താണ് കെട്ടിട്ട നിര്മ്മാണം പുരോഗമിക്കുന്നത്. പരിസ്ഥിതി പ്രധാന്യം കൂടിയുള്ള അതീവ സുരക്ഷാ മേഖലയില്, നിര്മ്മാണം അനുവദിക്കരുതെന്നാവശ്യപ്പെട്ട് സ്ഥലം എംഎല്എയും ബിജെപി നേതാവുമായ സുരേഷ് ഭരദ്വാജ് കേന്ദ്ര ആഭ്യന്തര മന്ത്രിക്ക് കത്തെഴുതി. പ്രിയങ്കയ്ക്ക് ഇവിടെ അവധിക്കാല വസതി നിര്മ്മിക്കാന് നല്കിയ അനുമതി റദ്ദാക്കണമെന്നാണ് ആവശ്യം. ഹിമാചല് പ്രദേശ് കോണ്ഗ്രസ് ഭരണത്തിലാണ്. വീരഭദ്രസിങാണ് മുഖ്യമന്ത്രി.
രാഷ്ട്രപതിയുടെ അവധിക്കാല വസതി ഇരിക്കുന്ന ഇവിടം അതീവ സുരക്ഷാ മേഖലയാണ്. ഈ വസതിക്കു സമീപമോ ഇതിനടുത്തുള്ള ഹെലിപ്പാഡിനു സമീപമോ സുരക്ഷാപരമായ കാരണങ്ങളാല് കെട്ടിടനിര്മ്മാണം അനുവദനീയമല്ല. മുന്പ് ഇക്കാരണങ്ങളാല് പലര്ക്കും ഇവിടെ കെട്ടിട നിര്മ്മാണത്തിന് അനുമതി നിഷേധിച്ചിട്ടുമുണ്ട്. അദ്ദേഹം കത്തില് ചൂണ്ടിക്കാട്ടുന്നു.
രാഷ്ട്രപതിയും പ്രധാനമന്ത്രിയും താമസിക്കുന്നതാണ് ഈ വസതി. മാത്രമല്ല വിവിഐപി ആവശ്യങ്ങള്ക്കുള്ളതാണ് ഹെലിപ്പാഡ്. ഈ സ്ഥലം കെട്ടിട നിര്മ്മാണത്തിന് വിലക്കുള്ള മേഖലയാണ്. അതിനാല് ഇവിടുത്തുകാര് തുച്ഛ വിലയ്ക്കാണ് തങ്ങളുടെ വസ്തു വില്ക്കുന്നത്. ചുളു വിലയ്ക്കാണ് പ്രിയങ്ക ഇവിടെ 4000 ചതുരശ്ര മീറ്റര് വസ്തു വാങ്ങിയത്. ഇവിടെ വീട് നിര്മ്മിക്കാന് പ്രിയങ്ക അനുമതി തന്ത്രത്തില് തരപ്പെടുത്തുകയായിരുന്നു. ഇവിടെ പ്രിയങ്ക മൂന്നു നില കോട്ടേജാണ് പണിയുന്നത്. കഴിഞ്ഞ ദിവസം സോണിയയും പ്രിയങ്കയും ഇവിടെ എത്തി നിര്മ്മാണം വിലയിരുത്തിയിരുന്നു.
ഈ വസ്തു മുന്പ് വാങ്ങിയ പലര്ക്കും ഇവിടെ വസതി നിര്മ്മിക്കാന് അനുമതി നല്കിയിരുന്നില്ല. 2007ലാണ് പ്രിയങ്ക ഇൗ ഭൂമി വാങ്ങിയത്. 2004 ഒക്ടോബറിലാണ് ഇവിടെ നിര്മ്മാണ പ്രവര്ത്തനങ്ങള് തടയാന് ആവശ്യപ്പെട്ട് രാഷ്ട്രപതിയുടെ സെക്രട്ടറിയേറ്റ് സംസ്ഥാന സര്ക്കാരിന് ഉത്തരവ് നല്കിയത്.
വിരമിച്ച നാവിക സേനാ ഉദ്യോഗസ്ഥനായ ദേവീന്ദര്ജിത്ത് സിങ് ഇവിടെ സ്ഥലം വാങ്ങി കെട്ടിടം നിര്മ്മിക്കാന് നല്കിയ അപേക്ഷ തള്ളിയിരുന്നു. അനുമതി നല്കാന് കഴിയുമോയെന്ന് ചോദിച്ച് ഹിമാചല് പ്രിന്സിപ്പല് സെക്രട്ടറി നല്കിയ കത്തിന് പോലീസ് ഡയറക്ടര് ജനറല് നല്കിയ മറുപടി സുരക്ഷാപരമായ കാരണങ്ങളാല് അത് സാധ്യമല്ലെന്നായിരുന്നു. അതേസ്ഥലം ഉള്പ്പെടെയാണ് പ്രിയങ്ക വാങ്ങിയത്.
