കണ്ണൂര്: മാടായിപ്പാറയില് വനവല്ക്കരണം നടത്താനുളള നീക്കം ആവാസ വ്യവസ്ഥ തകര്ക്കുമെന്ന് മാടായിപ്പാറ സംരക്ഷണ സമിതി പ്രവര്ത്തകര് ചൂണ്ടിക്കാട്ടി. മാടായിപ്പാറയിലെ അപൂര്വ്വ സസ്യജൈവ സമ്പത്തുകളുടെ വളര്ച്ചയെയും നിലനില്പ്പനേയും അവയുടെ ആവാസ വ്യവസ്ഥയേയും ദോഷകരമായി ബാധിക്കുമെന്നതിനാല് ഇത്തരം നീക്കങ്ങളില് നിന്ന് അധികൃതര് പിന്മാറണമെന്നാണ് സമിതിയുടെ ആവശ്യം. മരങ്ങളില്ലാത്ത മാടായിപ്പാറയാണ് പ്രദേശത്തിന്റെ സവിശേഷതയും ആകര്ഷകത്വവും. ഇത്തരം സവിശേഷതകളുമായി പൊരുത്തപ്പെടുന്ന ദേശാടന പക്ഷികളാണ് ഇവിടെ വര്ഷംതോറും വന്നു ചേരുന്നത്. പാറയുടെ തനിമയ്ക്ക് മാറ്റമുണ്ടാകരുതെന്നുളളതു കൊണ്ടാണ് സംരക്ഷണ സമിതി പ്രവര്ത്തകരുള്പ്പെടെ മാടായിപ്പാറ പ്രദേശത്ത് മരങ്ങള് വെച്ചുപിടിപ്പിക്കാതിരുന്നത്. മരങ്ങള് നടുകയെന്നത് മാത്രമല്ല പരിസ്ഥിതി പ്രവര്ത്തനമെന്നും ഒരു പ്രത്യേക സ്ഥലത്ത് മാത്രം വളരുന്ന സസ്യങ്ങളുടേയും ജീവജാലങ്ങളുടേയും ആവാസ വ്യവസ്ഥ തകര്ക്കാതിരിക്കലും സംരക്ഷിക്കലും പരിസ്ഥിതി പ്രവര്ത്തനമാണെന്ന് സംരക്ഷണ സമിതി പ്രസ്താവനയില് ചൂണ്ടിക്കാട്ടി. സപുഷ്പികളായ 600 ഓളം അത്യപൂര്വ്വമായ സസ്യവൈവിധ്യമുളള പ്രദേശമാണ് മാടായിപ്പാറ പ്രദേശം. മറ്റ് ഒരിടത്തും കാണാത്ത അപൂര്വ്വ സസ്യങ്ങളാണ് ഇവയില് പലതും. വൃക്ഷങ്ങളുടെ കീഴില് ഇത്തരം സസ്യങ്ങള് വളരുകയില്ല. മരങ്ങളില് ചേക്കേറാത്ത സ്വഭാവമുളളവയാണ് ദേശാടനം നടത്തുന്ന പക്ഷിവര്ഗ്ഗങ്ങള്. പ്രദേശത്ത് മരം നടാന് വരുന്നവര് മറ്റ് സ്ഥലങ്ങള് നോക്കി പോകണമെന്നും സംരക്ഷണ സമിതി പ്രവര്ത്തകര് ചൂണ്ടിക്കാട്ടി. ചില സംഘടനകളും സര്ക്കാര് ഏജന്സികളും മേഖലയില് വ്യാപകമായി വനവല്ക്കരണത്തിന് നീക്കം നടത്തുന്നുണ്ടെന്നും ഇത്തരം ശ്രമങ്ങളില് നിന്നും അത്തരം സംഘടനകള് പിന്മാറണമെന്നും മാടായിപ്പാറ സംരക്ഷണ സമിതി പ്രവര്ത്തകര് ചൂണ്ടിക്കാട്ടി.
മാടായിപ്പാറയിലെ വനവല്ക്കരണം ആവാസ വ്യവസ്ഥ തകര്ക്കും: സംരക്ഷണ സമിതി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.