ന്യൂദൽഹി: കാൻസർ രോഗത്തെ നിമിഷ നേരങ്ങൾക്കകം ഉന്മൂലനം ചെയ്യാൻ കഴിയുന്ന ചെറുപഴത്തെ ശാസ്ത്രജ്ഞർ കണ്ടെത്തി. ബ്രിസ്ബെയിനിലെ ക്യുഐഎംആർ ബെർഗോഫർ മെഡിക്കൽ റിസർച്ച് ഇൻസ്റ്റിറ്റ്യൂട്ടിലെ ഡോക്ടർ ഗ്ലെൻ ബോയലും സംഘവുമാണ് ഈ പഴത്തെ വടക്കൻ ക്യൂൻസ് ലാൻഡിൽ നിന്നും കണ്ടെത്തിയത്.
വടക്കൻ ക്യൂൻസ് ലാൻഡിലെ മഴക്കാടുകളിൽ തഴച്ച് വളരുന്ന ബ്ലഷ്വുഡ് എന്ന മരത്തിലാണ് കാൻസറെ പ്രതിരോധിക്കാൻ ശേഷിയുള്ള പഴം ഉണ്ടാകുന്നത്. ശാസ്ത്രജ്ഞർ ഇവ കണ്ടെത്തിയ ശേഷം മൃഗങ്ങളിൽ പരീക്ഷണം നടത്തുകയായിരുന്നു.
പൂച്ച, നായ തുടങ്ങിയ മൃഗങ്ങളിലാണ് പരീക്ഷണം നടത്തിയത്. ഇതിന്റെ സത്ത് അടങ്ങിയ ഇബിസി-46 എന്ന ഒരൊറ്റ ഇഞ്ചക്ഷൻ രോഗാവസ്ഥയിലുള്ള മൃഗങ്ങളിൽ കുത്തി വച്ചു. തുടർന്ന് അഞ്ച് നിമിഷങ്ങൾക്ക് കൊണ്ട് ഇതിന്റെ പ്രവർത്തനം മൃഗങ്ങളുടെ കാൻസർ ബാധിച്ച ശരീര ഭാഗത്ത് കാണാൻ സാധിച്ചു. ദിവസങ്ങൾക്കകം മുഴകൾ സങ്കോചിച്ച് പൂർണ്ണാവസ്ഥയിൽ എത്തിച്ചേരുകയും ചെയ്തു.
എന്തായാലും ശാസ്ത്രലോകം ഏറെ സൂക്ഷമായിട്ടാണ് ഈ ഔഷധ പഴത്തെ വീക്ഷിക്കുന്നത്. മൃഗങ്ങളിൽ രോഗാവസ്ഥയ്ക്ക് വരുത്തിയ ശമനം മനുഷ്യനിലും സാധ്യമാക്കാൻ കഴിയുമെന്നാണ് ഇവർ പ്രതീക്ഷിക്കുന്നത്. തലയിലും കഴുത്തിലും ഉണ്ടാകുന്ന കാൻസറുകൾക്ക് ഏറെ ഫലപ്രദമാണ് ഈ പഴമെന്നാണ് ശാസ്ത്രജ്ഞർ അവകാശപ്പെടുന്നത്.
