വര്ക്കല: വര്ക്കല മുസിപ്പാലിറ്റിയിലെ 17-ാം വാര്ഡില്പ്പെട്ട പുത്തന്ചന്ത ജംഗ്ഷനില് നിന്നും ചെറുകുന്നം ഭാഗത്തേക്ക് പോകുന്ന ടെലിഫോണ് എക്സ്ചേഞ്ച് റോഡ് തകര്ന്ന് തരിപ്പണമായി അപകടാവസ്ഥയിലായിട്ട് മൂന്നുവര്ഷത്തിലേറെയായി. ചെമ്മണ്ണുപാതയായിരുന്ന റോഡ് ആറുവര്ഷങ്ങള് മുന്പാണ് പ്രദേശവാസികളുടെ മുറവിളിയെ തുടര്ന്നു. വര്ക്കല മുന്സിപ്പാലിറ്റി പദ്ധതിയില് ഉള്പ്പെടുത്തി ടാറിംഗിന് മുന്നോടിയായിട്ടുള്ള മെറ്റലിംഗ് നടത്തിയത്. എന്നാല് ഭരണമാറ്റം വന്നതോടെ റോഡിന്റെ പണിയില് നിന്നും മുനിസിപ്പാലിറ്റി ഭാഗികമായി പിന്മാറി. ഇതോടെ നിരവധി വാഹനങ്ങള് കടന്നുപോകുന്ന റോഡില് മെറ്റലിളകി അപകടാവസ്ഥയിലായി. സ്വാകാര്യ ബസ് സര്വ്വീസ് ഒഴികെ മറ്റുള്ള എല്ലാ വാഹനങ്ങളും യഥേഷ്ടം സഞ്ചരിക്കുന്ന റോഡില്, വാഹനങ്ങളുടെ നിരന്തരമായുള്ള സഞ്ചാരത്തില് മെറ്റലിളകി കുന്നുകൂടിയിരിക്കുകയാണ്. ഇരുചക്രവാഹനാപകടങ്ങള് ഇവിടെ സര്വസാധാരണമായി മാറിയിരിക്കുകയാണ്. വര്ക്കല എസ്എന് കോളേജ്, ശിവഗിരി ഹയര് സെക്കണ്ടറി സ്കൂള്, ശിവഗിരി മഹാസമാധി, ശിവഗിരി നഴ്സിംഗ് കോളേജ്, ശാരദാഗിരി സ്കൂള്, ഗുരുകുലം എന്നിവിടങ്ങളിലേക്ക് എളുപ്പത്തില് പോകാവുന്ന റിംഗ് റോഡാണ് ഇത്.
അപകടങ്ങള്ക്കുപുറമെ ജീവഹാനി വരുത്തുന്നതിലും ചെറുകുന്നം റോഡ് പിന്നിലല്ല. ഒരുവര്ഷത്തിന് മുന്പാണ് പുത്തന് ചന്തയിലെ പ്രമുഖ പച്ചക്കറി വ്യാപാരി ഈ റോഡില് തെന്നിവീണ് തലപാറയിലിടിച്ച് മരിച്ചത്. റോഡിന്റെ സമീപവാസികളില് ഏറിയപേര്ക്കും ഈ റോഡില് തെന്നിവീണ് പരിക്കേറ്റിട്ടുണ്ട്. എന്നാല് കൂനിന്മേല്കുരുവെന്നപോലെ റോഡുതുടങ്ങുന്ന ഭാഗത്തും രണ്ടു പ്ലാവുകള് ഏത് നിമിഷവും നിലംപൊത്താവുന്ന നിലയിലാണ്. കാറ്റില് ഇതിന്റെ ശിഖരങ്ങള് നിലംപതിച്ചുകൊണ്ടിരിക്കുന്നു. ഇതുമൂലം ഈ റോഡിലൂടെയുള്ള യാത്ര വളരെ ദുഷ്കരമായിരിക്കുകയാണ്. യാത്രക്കാരുടെ സുരക്ഷിതത്വത്തിന് ഉടനടി പരിഹാരം കാണണമെന്നുള്ള ആവശ്യവുമായി സ്ഥലത്തെ യുവജനസംഘടനകള് രംഗത്തെത്തിക്കഴിഞ്ഞു.
