ന്യൂദല്ഹി: ജെഎന്യു സ്റ്റുഡന്റ്സ് യൂണിയന് പ്രസിഡന്റ് കനയ്യ കുമാറും മറ്റൊരു യൂണിയന്റെ നേതാവ് ഉമര് ഖാലീദും രാജ്യവിരുദ്ധമുദ്രാവാക്യം വിളിക്കുന്നതിന്റെ വീഡിയോ ദൃശ്യങ്ങള് കെട്ടിച്ചമച്ചതല്ലെന്നും വ്യാജമല്ലെന്നും ഫോറന്സിക് റിപ്പോര്ട്ട്. സിബിഐ ഫോറന്സിക് ലാബിലെ പരിശോധനാ ഫലങ്ങള് ഇന്നലെ ദല്ഹി പോലീസ് പുറത്തുവിട്ടു.
മൊത്തം ഏഴു ദൃശ്യങ്ങളാണ് ഉണ്ടായിരുന്നത്. ഇവയില് രണ്ടെണ്ണം വ്യാജമാണെന്നാണ് ദല്ഹി സര്ക്കാര് നടത്തിയ ഫോറന്സിക് പരിശോധനയില് കണ്ടെത്തിയത്. എഡിറ്റു ചെയ്യാത്ത വീഡിയോ ദൃശ്യങ്ങളുടെ അടിസ്ഥാനത്തിലാണ് കനയ്യ അടക്കം ഒന്പതു പേര്ക്ക് എതിരെ കേസ് എടുത്തതെന്നും ഈ വീഡിയോകള് യഥാര്ഥമാണെന്ന് ഫോറന്സിക് പരിശോധനയില് കണ്ടെത്തിയതായും പോലീസ് അറിയിച്ചു.
ഒരു ഹിന്ദി ചാനലില് നിന്ന് ലഭിച്ച എഡിറ്റ് ചെയ്യാത്ത ദൃശ്യങ്ങളാണ് സിബിഐ ലാബിലേക്ക് അയച്ചുകൊടുത്തത്. ഇതിനൊപ്പം കാമറയും മെമ്മറി കാര്ഡും കഌപ്പിംഗ് അടങ്ങിയ സിഡിയും ലാബില് നല്കിയിരുന്നു. ഈ എട്ടാം തീയതി ലാബിലെ പരിശോധനാ റിപ്പോര്ട്ട് ലഭിച്ചു. ദൃശ്യങ്ങള് യഥാര്ഥമാണെന്നാണ് കണ്ടെത്തിയിട്ടുള്ളത്.പോലീസ് അധികൃതര് പറഞ്ഞു.
